ဟစ်ပ်ဟော့ပ် စင်တင်ပွဲ မျှော်စင်ကျွန်းတွင် လာမည် မျှော်

၃၀.၄.၂၀၁၃၊ အင်္ဂါနေ့

ဘိုဘို အန်တာတိန်းမန့် မှ ဦးစီးပြီး ဟစ်ဟော့ပ် အဆိုတော် စိုင်းစိုင်းခမ်းလှိုင်၊ ဘန်နီဖြိုး၊ စနဲ (Snare) ၊ လွှမ်းပိုင်တို့ ၄ ဦး၏ ဟစ်ပ်ဟေ့ာပ် စင်တင်ပွဲကို မေ ၂၇ တွင် ရန်ကုန် မျှော်စင်ကျွန်း၌ ညနေ ၆ နာရီတွင် ဖျော်ဖြေမည်ဟု ဘိုဘို အန်တာတိန်းမန့် မန်နေဂျာ ဦးချစ်က ပြောသည်။

၎င်းပွဲတွင် စီဒီများ၊ ဒီဂျေများ အပြင် တေးဂီတ အဖွဲ့ဖြင့်လည်း တီးခတ်ဖျော်ဖြေမည် ဖြစ်ပြီး လက်မှတ်တစောင် ၆၅၀၀ ကျပ် သတ်မှတ်ထားကြောင်း၊ လက်မှတ်များကို မေလ ၁၅ ရက်နေ့တွင် စတင် ရောင်းချမည်ဖြစ်ကြောင်း ၊ ပွဲများကို အဆက်မပြတ် တင်ဆက်ရန် ရည်ရွယ်ချက်ဖြင့် ကျင်းပခြင်းဖြစ်ပြီး ၎င်းပွဲသည် ဘိုဘိုအင်တာတိန်းမန့် အတွက် သင်္ကြန် အပြီးတွင် ပထမဆုံး ပြန်လည် ကျင်းပခြင်းဖြစ်ကြောင်း သိရသည်။

၎င်းပွဲတွင် ဖျော်ဖြေမည့် တေးသံရှင် စနဲ က “သီချင်း ၁၀ ပုဒ်လောက် ဆိုဖို့ ရှိပါတယ်။ ဘိုဘိုနဲ့ ဖျော်ဖြေတာ ၂၀၁၀ တုန်း ကတည်းကနေ အခုဆိုရင် ပွဲ ၃၀ ကျော်ပါပြီ။ ပုံမှန်လုပ်နေတဲ့ အန်တာတိန်းမန့် တခုအနေနဲ့ ဘိုဘိုက အဆင်ပြေပါတယ်။ စင်ဒီဇိုင်း၊ စပီကာတွေက အစ ပြောင်းလဲအောင် လုပ်ပေးနေတဲ့ အတွက် ကောင်းပါတယ်။ ဘယ်နိုင်ငံ ကပဲ လာကြည့်ကြည့် တိုးတက်နေအောင် ကြိုးစားထားတယ်” ဟု ဧရာဝတီသို့ ပြောသည်။

တေးသံရှင် စနဲသည် ၂၀၀၀ ပြည့်နှစ်ကစ၍ ဟစ်ပ်ဟော့ပ် လောကသို့ ဝင်ရောက်ခဲ့ပြီး ပရိသတ်ကို တေးသီချင်း ၃၀ ကျော် ချပြခဲ့ပြီး ဖြစ်ကြောင်း၊ ကိုယ်ပိုင်သီချင်း ၁၀၀ ကျော် ပိုင်ဆိုင်ကြောင်း၊ ၂၀၁၀ က Rap Game တေးစီးရီး၊ ၂၀၁၃ ဖေဖော်ဝါရီ ၁၀ ရက်နေ့တွင် ဘကြီးဖြိုးနဲ့ ဦးနေဝင်း စီးရီးများ ထွက်ခဲ့ကြောင်း လက်ရှိတွင် အရှေ့တောင်အာရှ အားကစား ပြိုင်ပွဲ ဆီးဂိမ်း အတွက် သီချင်းရေးနေကြောင်း သိရသည်။

တေးသံရှင် လွှမ်းပိုင်က “သီချင်း ၁၂ ပုဒ်လောက် ဆိုမှာပါ။ ပထမပိုင်း ၆ ပုဒ်ကို ဒီဂျေနဲ့ နောက် ၆ ပုဒ်ကို Band နဲ့ ဆိုဖို့ များတယ်။ အသေးစိတ်ကို ဘိုဘိုအန်တာတိန်းမန့်က ကိုဘိုဆန်းနဲ့ တိုင်ပင်နေပါတယ်။ ဘိုဘိုနဲ့ဆိုတာ အခုဆိုရင် ပွဲ ၄၀ လောက် ရှိတော့မယ်။ နောက်ပိုင်း ပါဖောမန့်တွေကို ပိုအသားပေး လုပ်ဖို့ ရှိတယ်။ ပရိသတ်လည်း ကြည့်ရတာ ပိုတန်မယ်၊ ဖျော်ဖြေမှု အရသာ ပိုခံစားရအောင် လုပ်မှာပါ” ဟု ဧရာဝတီသို့ ပြောသည်။

လွှမ်းပိုင်က Bobby Soxer နှင့် အတူ သီဆိုထားသော ဒုံးပျံ ဗီစီဒီကို ၂၀၁၃ ဇွန်တွင် ဖြန့်ချိမည် ဖြစ်ပြီး တကိုယ်တော် စီးရီးကို ၂၀၁၃ နှစ်ကုန်တွင် ဖြန့်မည်ဖြစ်ကြောင်း၊ ဆုချစ်ဇော် အတွက် အီလက်ထရီု စတိုင်လ် ဆီးဂိမ်း သီချင်း ရေးပေးနေကြောင်း သိရသည်။

ဧရာဝတီ

တန်ဖိုးနည်းဖုန်း မှောင်ခိုဈေးကွက် ဆက်သွယ်ရေးက အရေးမယူဟုဆို

၃၀.၄.၂၀၁၃၊ အင်္ဂါနေ့

တန်ဖိုးနည်း ၁၅၀၀ ကျပ်တန် ဆင်းကတ်များကို ပုဂ္ဂလိက ဖုန်းဆိုင်များက မှောင်ခိုဈေးဖြင့် ရောင်းချနေသည့် အပေါ် မြန်မာ့ ဆက်သွယ်ရေး လုပ်ငန်းက အရေးယူသွားမည် မဟုတ်ကြောင်း မိုဘိုင်း ဆက်သွယ်ရေးဌာန အင်ဂျင်နီယာချုပ် ဦးဌေးဝင်းက ပြောသည်။

“မဲပေါက်တဲ့သူတွေက ကျေနပ်လို့ ဆိုင်တွေကို ရောင်းတာကို မရောင်းနဲ့လို့ တားလို့မှမရတာ၊ မသမာမှုတွေရှိရင် ပေးထားတဲ့ ဖုန်းတွေအတိုင်း တိုင်လို့ရတယ်၊ ဆက်သွယ်ရေး အစီအစဉ် နဲ့တော့ ဖုန်းဆိုင်တွေကို အရေးယူဖို့မရှိဘူး” ဟု ၎င်းက ဆို သည်။

လက်ရှိ ထုတ်ပေးနေသော ၁၅၀၀ ကျပ်တန် ဆင်းကတ်များမှာ တိုင်းဒေသကြီး အစိုးရအဖွဲ့များ၏ အစီအစဉ်ဖြင့် မဲပေါက်သူ များကို ချထားပေးခြင်းဖြစ်၍ ပုဂ္ဂလိက ဖုန်းဆိုင်များက မှောင်ခိုဈေး အနိမ့်ဆုံး ၆၀၀၀၀ ကျပ်ဖြင့် ပြန်လည် ရောင်းချ နေကြောင်း၊ သို့သော် သက်ဆိုင်ရာအစိုးရအဖွဲ့အား တိုင်ကြားမှသာ ၎င်းတို့အနေဖြင့် အရေးယူနိုင်မည်ဖြစ်ကြောင်း မြန်မာ့ ဆက်သွယ်ရေးမှ တာဝန်ရှိသူများက ပြောသည်။

ဧပြီလ ၂၅ ရက်က ပြည်နယ်နှင့် တိုင်းဒေသကြီး အသီးသီးတွင် မဲစနစ်ဖြင့် ချထားပေးခဲ့သော ဆင်းကတ်များကို ရပ်ကွက်တချို့ ရှိ အုပ်ချုပ်ရေးမှူး ရုံးများက ဖုန်းဆိုင်များ၊ ကြားပွဲစားများထံသို့ ငွေ ၁၁၅၀၀ ကျပ်မှ ၁၇၅၀၀ ကျပ်အထိ ဈေးတောင်းကာ ရောင်းချခဲ့ကြောင်း၊ ပုဂ္ဂလိက ဖုန်းဆိုင်တချို့က ဆင်းကတ်များကို အနိမ့်ဆုံးဈေး ၆၀၀၀၀ ကျပ်မှ အမြင့်ဆုံး ၁၀၀၀၀၀ ကျပ်အထိ တဆင့် ပြန်လည် ရောင်းချလျှက်ရှိကြောင်း ဧရာဝတီမှ စုံစမ်းသိရှိရသည်။

“ကျမတို့ ရပ်ကွက်ရုံးက ယူဖို့ စာရင်းပေးပြီး မယူတဲ့သူတွေရဲ့ ဆင်းကတ်တွေကို ဖုန်းဆိုင်တွေကို ပြန်ရောင်းတာ။ ရပ်ကွက် ထဲက တသောင်းပေးပြီး ဝယ်တာတောင် မရတော့ဘူး။ ဈေးပိုရလို့ ရောင်းလိုက်ပြီတဲ့။ မေ ၈ ရက်နေ့ ထပ်ရမယ့် ဆင်းကတ်တွေ အတွက်တော့ စာရင်းတွေ ကြိုသွင်းနေရပြီ။ ဘယ်လို လာမလဲတော့ မသိသေးဘူး” ဟု မင်္ဂလာဒုံမြို့နယ်နေ မမြင့်စန်းကြည်က ပြောပြသည်။

လှိုင်မြို့နယ်တွင် နေထိုင်သူ ကိုမင်းသူက ၎င်းတို့ ရပ်ကွက်အနီးရှိ ဖုန်းဆိုင်များတွင် ဟန်းဆက်တလုံး အနည်းဆုံး ဝယ်ယူမှ သာ ၁၅၀၀ ကျပ်တန် ဆင်းကတ်များကို ငွေ ၆၅၀၀၀ ကျပ်ဖြင့် ပြန်လည် ရောင်းချပေးကြောင်း၊ ၎င်းတို့ထံမှ ဆင်းကတ်တကတ် လျှင် ၃၁၅၀၀ ကျပ်ဖြင့် ပြန်လည် ဝယ်ယူနေကြောင်း၊ မေ ၈ ရက်နေ့ ထပ်မံ ထုတ်ပေးမည့် ဆင်းကတ်များ အတွက်ကိုလည်း စရံပေးချေကာ ဝယ်ယူလိုသည့် ဖုန်းဆိုင်များ ရှိကြောင်း ဆိုသည်။

ရန်ကုန်မြို့အတွင်းရှိ လူကြီးမင်း ဖုန်းဆိုင်တချို့တွင် ၁၅၀၀ တန် ဆင်းကတ် များကို ပြန်လည် ရောင်းချနေသည်ဟု သတင်းများ ထွက်ပေါ်နေသော်လည်း ဘုရင့်နောင်မြို့နယ် အတွင်းရှိ လူကြီးမင်းဖုန်း အရောင်းဆိုင် တာဝန်ရှိသူ တဦးကဆိ “ဒီဆိုင်တွေမှာတော့ ရောင်းတာမရှိပါဘူး၊ ဝယ်ခဲ့တယ် ဆိုတဲ့သူ မှားတာ နေမှာပါ။ လူကြီးမင်းဖုန်း ဘယ်ဆိုင်မှာမှ မရောင်း ပါဘူး၊ ရပ်ကွက်ရုံးတွေမှာပဲ ရောင်းတယ်” ဟု ပြောသည်။

လာမည့်မေလ ၈ ရက်နေ့တွင် ဒုတိယအကြိမ်အဖြစ် CDMA 800 MHZ ဆင်းကတ် ၃၅၀၀၀၀ ကို မဲစနစ်ဖြင့် ဆက်လက် ချထားပေးမည် ဖြစ်ကြောင်း၊ GSM နှင့် WCDMA ဆင်းကတ်များကို ချထားပေးမည့် အစီအစဉ်ကိုလည်း ရေးဆွဲနေကြောင်း မြန်မာ့ ဆက်သွယ်ရေး လုပ်ငန်းမှ သိရသည်။

ရန်ကုန်တိုင်း ဒေသကြီးအတွင်းရှိ ရပ်ကွက်တချို့တွင် ပထမအကြိမ် မဲမပေါက်ခဲ့သူများ၏ စာရင်းကို ဆက်လက် သိမ်းယူ ထားပြီး ဒုတိယအကြိမ်တွင် ဦးစားပေး အနေဖြင့် ပြန်လည် မဲနှိုက်စေမည် ဖြစ်ကြောင်း ရပ်ကွက် အုပ်ချုပ်ရေးမှူး များက ပြောသည်။

မန္တလေး တိုင်းဒေသကြီး အတွင်းတွင်မူ မဲစနစ်ဖြင့် မဟုတ်ဘဲ ဦးရာလူ စနစ်ဖြင့် တန်ဖိုးနည်းဆင်းကတ်များ ရောင်းချ ခဲ့သောကြောင့် ခိုက်ရန်ဖြစ်ပွားမှု တချို့ ရှိခဲ့သည်။

ဧရာဝတီ 

မြန်မာ့ဈေးကွက် အင်ဒိုနီးရှား မျက်စေ့ကျ

၃၀.၄.၂၀၁၃၊ အင်္ဂါနေ့

ဒေသတွင်း အိမ်နီးချင်း နိုင်ငံကြီးတခုဖြစ်သော အင်ဒိုနီးရှား နိုင်ငံသည် မြန်မာနိုင်ငံတွင် အလာအလာ ကောင်းသည့် ရင်းနှီးမြှုပ်နှံမှုများ ပြုလုပ်ရန်အတွက် စတင် ပြင်ဆင်လာနေသည်။

အင်ဒိုနီးရှားနိုင်ငံသည် အာဆီယံ နိုင်ငံများအတွင်းတွင် အကြီးဆုံး နိုင်ငံဖြစ်ပြီး ကမ္ဘာပေါ်တွင် လူဦးရေ စတုတ္ထ အများဆုံး နေထိုင်သော နိုင်ငံလည်းဖြစ်သည်။ သို့သော် လည်း မြန်မာနိုင်ငံတွင် လာရောက် ရင်းနှီးမြှုပ်နှံကြသည့် နိုင်ငံများစာရင်းတွင်  အမှတ်စဉ် ၁၄ ၌သာ ရှိနေသည်။

၁၉၈၈ မှ ယနေ့အထိ မြန်မာနိုင်ငံ၌ အင်ဒိုနီးရှား၏ ရင်းနှီးမြှုပ်နှံမှုမှာ အမေရိကန်ဒေါ်လာ ၂၄၁ သန်းရှိကြောင်း မြန်မာနိုင်ငံ ကုန်သည်ကြီးများနှင့် စက်မှုလုပ်ငန်းရှင်များ အသင်းချုပ်မှ ထုတ်ပြန်ချက်အရသိရသည်။

ယခု ရက်သတ္တပတ်အတွင်း နေပြည်တော်သို့ အင်ဒိုနီးရှားနိုင်ငံသမ္မတ ဆူဆီလို ဘန်ဘန် ယူဒိုယူနို အလည်အပတ် ရောက်လာခဲ့ခြင်းသည် မြန်မာနိုင်ငံတွင် အင်ဒိုနီးရှား၏ လာရောက်ရင်းနှီးမြှုပ်နှံမှုကို အမေရိကန်ဒေါ်လာ သန်းတထောင် အထိ မြှင့်တင်ရန် ရည်ရွယ်ချက်ဖြင့် လာရောက်ခဲ့ခြင်းဖြစ်သည်။ သို့သော်လည်း ၂၀၁၆ခုနှစ် နောက်ပိုင်းမှသာ ဖြစ်လာနိုင်မည်ဟု သိရသည်။

ရည်မှန်းချက် ပြည့်မြောက်နိုင်ရန်အတွက် အင်ဒိုနီးရှားအစိုးရ အနေဖြင့် ၎င်း၏ နိုင်ငံပိုင်စီးပွားရေးလုပ်ငန်းကြီးများအား မြန်မာနိုင်ငံတွင် ရင်းနှီးမြှုပ်နှံမှုပြုကြရန် တွန်းအားပေးခြင်းများ ပြုလုပ်နေသည်။ နိုင်ငံပိုင်လုပ်ငန်းကြီး ၁၅ ခု အနက်မှ ကျောက်မီးသွေး ထုတ်လုပ်ရေး၊ ဘဏ်လုပ်ငန်း၊ သတ္ထုတူးဖေါ်ရေးနှင့် ဘိလပ်မြေထုတ်လုပ်ငန်းများမှ အဆိုပြုချက်များ ပေးပို့ထားပြီး မြန်မာနိုင်ငံတွင် လာရောက်လုပ်ကိုင်ရန် လေ့လာနေကြပြီဖြစ်သည်။

အင်ဒိုနီးရှားသမ္မတ၏ နှစ်ရက်ကြာ မြန်မာနိုင်ငံ ခရီးစဉ်ကို အင်ဒိုနီးရှားနိုင်ငံ စီးပွားရေးဝန်ကြီးနှင့် နိုင်ငံပိုင် စီးပွားရေး လုပ်ငန်းများ ဆိုင်ရာဝန်ကြီးတို့က စီစဉ်ခဲ့ခြင်းဖြစ်သည်။

အင်ဒိုနီးရှား နိုင်ငံပိုင်လုပ်ငန်းများ သည် သဘာဝ အရင်းအမြစ် တူးဖေါ်ထုတ်လုပ်ရေး လုပ်ငန်းများကို အဓိကထား လုပ်ကိုင်ကြသည်။ ၎င်းနိုင်ငံတွင် ရွှေ၊ နီကယ်၊ ကြေးနီ၊ ရေနံနှင့် သဘာဝဓာတ်ငွေ့များထွက်ရှိပြီး ကြီးမားသည့် ကျောက်မီးသွေးသိုက်များကို အရန်အဖြစ် ထိန်းသိမ်းထားသည်။ အင်ဒိုနီးရှားနိုင်ငံမှ ရွှေနှင့် နီကယ်တူးဖေါ်ရေးကုမ္ပဏီ Aneka Tambang သည် မြန်မာနိုင်ငံတွင် သတ္တုတူးဖေါ်ခွင့်လိုင်စင်ရရှိရေး ကြိုးပမ်းလျှက်ရှိသည်။

နိုင်ငံပိုင် ဆောက်လုပ်ရေးကုမ္ပဏီ PT Wijaya Karya၊ သံဖြူတူးဖော်ရေးကုမ္ပဏီ PT Timah နှင့်  ဘိလပ်မြေကုမ္ပဏီ Semen Indonesia တို့သည် မြန်မာနိုင်ငံတွင် ရင်းနှီးမြှုပ်နှံရန်အတွက် လုပ်ငန်းလိုင်စင်များ ရရှိခဲ့ပြီးဖြစ်ကြောင်း ဂျာကာတာမြို့ နိုင်ငံပိုင်လုပ်ငန်းများဝန်ကြီးဌာန မှ သိရသည်။

ကျောက်မီးသွေး တူးဖော်ရေးလုပ်ငန်း Bukit Asam က ၎င်းတို့အနေဖြင့် တူးဖော်ရေးနှင့် တဆက်တည်း တွဲထားသော လျှပ်စစ်ဓာတ်အားပေး စက်ရုံတရုံ တည်ဆောက်လိုကြောင်း ပြောသည်။ ထိုစက်ရုံမှ ဓာတ်အား၂၀၀ မီဂါဝပ် ထုတ်လုပ် ပေးနိုင်မည်ဖြစ်ပြီး မြန်မာနိုင်ငံတွင် လက်ရှိကြုံတွေ့နေရသော လျှပ်စစ်ဓာတ်အား မလုံလောက်မှု ပြဿနာများကို ပြေလည်စေနိုင်လိမ့်မည်ဟု ဆိုသည်။ သို့သော်လည်း စက်ရုံအတွက် ကျောက်မီးသွေး အလုံအလောက် ထုတ်ပေးနိုင်မည့် မိုင်းတွင်းတခုကို အရင် တူးနိုင်ရမည်ဖြစ်သည်။

“မြန်မာနိုင်ငံမှာ ရင်းနှီးမြှုပ်နှံဖို့ အင်ဒိုနီးရှားမှာ ပိုက်ဆံ အလုံအလောက် ရှိတယ် ဆိုတာ သံသယဖြစ်စရာ မလိုပါဘူး။ ဒါပေမယ့် အင်ဒိုနီးရှားနိုင်ငံရဲ့ ဗျူရိုကရေစီ စံနစ်က သိသိသာသာ နှေးကွေးပြီး ရှုပ်ထွေးလွန်းတယ်။ သူတို့က ၂၀၁၄ မှာလုပ်မယ် ပြောနေပေမယ့် ခပ်မြန်မြန် စတင်လာမယ်လို့ မြန်မာဘက်က မျှော်လင့် မထားသင့်ဘူး” ဟု စွမ်းအင်လုပ်ငန်းများဆိုင်ရာ အကြံပေးပုဂ္ဂိုလ် Collin Reynolds က ဘန်ကောက်မြို့တွင် ဧရာဝတီသို့ပြောပြသည်။

“မြန်မာနိုင်ငံမှာ စီးပွားရေးလုပ်ဖို့ စိတ်ဝင်စားနေတယ်ဆိုတဲ့ လုပ်ငန်းတွေက ခိုင်မာပါတယ်။ ဒါပေမယ့် သူတို့က တုန့်ပြန်မှု နှေးတယ်။ တနည်းပြောရရင် ဖွံ့ဖြိုးတိုးတက်ရေးလုပ်ငန်းတွေကို အချိန်နဲ့တပြေးညီ မြန်မြန်ဆန်ဆန် လုပ်နိုင်စွမ်းမရှိကြဘူး။ အင်ဒိုနီးရှားတွေရဲ့ စရိုတ်ကိုက လေးကန်ဖင့်နွှဲတဲ့ သဘောရှိတယ်၊ ကျောက်မီးသွေး လောင်စာသုံး ဓာတ်အားပေးစက် အတွက်လဲ လေထုညစ်ညမ်းမှု ပြဿနာတွေက ရှောင်လွှဲနိုင်တဲ့ လောင်စာမီးရှို့နည်း အတတ်ပညာကို မြန်မာဖက်က ရှာဖွေထားသင့်တယ် ” ဟု Collin Reynolds က ဆိုသည်။

နောက်ထပ် အလားအလာရှိသော ပြဿနာမှာ အင်ဒိုနီးရှားနိုင်ငံသည် မြေကြီးကို ထိခိုက်စေသော သတ္တုတွင်း လုပ်ငန်းကို မြန်မာနိုင်ငံတွင်း၌ လုပ်ကိုင်ရန် ရည်ရွယ်နေခြင်းဖြစ်သည်။ သတ္တုတူးဖေါ်ခြင်းကို အကြောင်းပြု၍ မြန်မာနိုင်ငံတွင် လွန်ခဲ့သောနှစ်က ဆန္ဒပြ ကန့်ကွက်မှုတွေ ပေါ်ပေါက်ခဲ့ရသည်။ အင်ဒိုနီးရှားနိုင်ငံတွင်လည်း ထိုကိစ္စမျိုးကို လက်မခံဘဲ ဆန့်ကျင်ကြသည်။

မြန်မာနိုင်ငံ၏ ပို့ကုန်ကဏ္ဍကို မြှင့်တင်ရန် အတွက် အင်ဒိုနီးရှားက မြန်မာ့ဆန်များဝယ်ယူရန် အစိုးရချင်း ဆွေးနွေးခဲ့ကြ သည်။ သို့သော်လည်း လွန်ခဲ့သော သုံးနှစ်မှ၍ အင်ဒိုနီးရှားနိုင်ငံသည် ဆန်စပါး စိုက်ပျိုးထုတ်လုပ်မှုကို အကြီးအကျယ် တိုးမြှင့်လာခဲ့ပြီး ဆန်အသားတင် တင်ပို့သော နိုင်ငံတနိုင်ငံ ဖြစ်လာသည်။

အင်ဒိုနီးရှားဖက်မှ အကြီးမားဆုံးဟုဆိုနိုင်သော စီမံကိန်းမှာ အစိုးရပိုင် ဘိလပ်မြေလုပ်ငန်းတခုဖြစ်သည့် Semen Indonesia မှ အမေရိကန်ဒေါ်လာ သန်း၂၀၀ ကုန်ကျမည့် ဘိလပ်မြေစက်ရုံ တည်ဆောက်ရန်ဖြစ်သည်။ ထိုစက်ရုံမှ တနှစ်လျှင် ဘိလပ်မြေ တန်ပေါင်း ၁ သန်းထွက်ရှိရန် မျှော်လင့်သည်ဟု Semen ကုမ္ပဏီက ဆိုသည်။

ထိုစီမံကိန်း၏ အားနည်းချက်မှာ ကုမ္ပဏီဘက်က ထွက်ရှိသော ဘိလပ်မြေထဲမှ အချို့တ၀က်ကို အိမ်နီးချင်းနိုင်ငံများသို့ တင်ပို့ ရောင်းချရန် ဆန္ဒရှိပြီး မြန်မာဘက်ကမူ ၎င်း၏ တိုးတက်လာသောစီးပွားရေးအတွက် လိုအပ်မည်ဟု ယူဆသော ကြောင့် ဘိလပ်မြေများကို ပြည်တွင်းမှာ ထုတ်ရန်သာ မျှော်လင့်နေသည်။

Semen ကုမ္ပဏီသည် ရင်းနှီးမြှုပ်နှံမှုများအတွက် ယခုနှစ် စကတည်းက စီစဉ်နေခြင်းဖြစ်သ်ာလည်း မည်သူနှင့် ပူးပေါင်းဆောင်ရွက်မည်၊ မည်သည့်နေရာတွင် စက်ရုံတည်ဆောက်မည် စသော အသေးစိတ်အချက်များကို ထုတ်ပြန်ခြင်း မရှိသေးပေ။

“ဒီနှစ်ထဲမှာ ပူးပေါင်းဆောင်ရွက်ရေး လုပ်ငန်းစဉ်တွေ ပြုလုပ်ပါမယ်၊ နောက်နှစ်ထဲမှာ စက်ရုံ စတင်တည်ဆောက်ပြီးတော့ သုံးနှစ်ကြာတဲ့အခါ ၂၀၁၇ မှာဖြစ်ပါလိမ့်မယ်၊ ထုတ်လုပ်ရေးလုပ်ငန်းတွေ စတင်ပြီဖြစ်ပါတယ်” ဟု Semen ၏ ဥက္ကဌ Dwi Soetjipto က ဂျာကာတာမြို့တွင် မတ်လ ၂၅ ရက်နေ့ကပြုလုပ်ခဲ့သော စီးပွားရေး ဆွေးနွေးပွဲတခုတွင်ပြောသည်။

မြန်မာနိုင်ငံ၏ လက်ရှိ အနေအထားမျိုးအတိုင်း အင်ဒိုနီးရှားနိုင်ငံသည်လည်း ၎င်း၏ ပြုပြင်ပြောင်းလဲရေးကို ၁၉၉၈ တွင် စတင်ခဲ့ရသည်။ ၁၉၉၇ တွင်ကြုံတွေ့ရသည့် အာရှစီးပွားရေး ပြဿနာ၏ ရိုက်ခတ်မှုကြောင့် တိုင်းပြည်တွင် စီးပွားရေး အခက်အခဲများ ဖြစ်ပေါ်လာပြီးနောက်တွင် ဗိုလ်ချုပ်ကြီးဆူဟာတို၏ စစ်တပ်လွှမ်းမိုးသော အစိုးရ အဆုံးသတ်ခဲ့ရသည်။

အင်ဒိုနီးရှားနိုင်ငံသည် အာဆီယံ ဆယ်နိုင်ငံအတွင်းတွင် အကြီးဆုံး စီးပွားရေးကို ပိုင်ဆိုင်ထားသော်လည်း နိုင်ငံရပ်ခြား သို့ စီးပွားရေးလုပ်ငန်းများ တိုးချဲ့ရာတွင်နှေးကွေးသည်။  အိမ်နီးချင်း နိုင်ငံများဖြစ်သော ထိုင်းနှင့် မလေးရှားမှ နိုင်ငံပိုင် ကုမ္ပဏီများဖြစ်ကြသည့် Petronas နှင့် PTT တို့သည် ပြင်ပနိုင်ငံများတွင် ရင်းနှီး မြှုပ်နှံမှု အမြောက်အများပြုနေကြချိန်တွင် အင်ဒိုနီးရှား အစိုးရပိုင်ရေနံကုမ္ပဏီ Pertamina သည် သဘာဝဓာတ်ငွေ့ အဓိက တင်ပို့သည့် ရေနံ ထုတ်လုပ် ရောင်းချသည့် လုပ်ငန်းကြီးတခုဖြစ်သော်လည်း နိုင်ငံပြင်ပသို့ တိုးချဲ့ခြင်းမပြုခဲ့ပေ။

“အင်ဒိုနီးရှား ရဲ့စီးပွားရေးက သတိကြီးကြီးနဲ့ တိုးတက်လာနေတယ်လို့ ပြောနိုင်ပါတယ်။ ဗဟိုကလည်း ခပ်တင်းတင်း ချုပ်ကိုင်ထားတယ်။ ဒါကြောင့် မြန်မာနိုင်ငံ ဈေးကွက်အသစ်ကို ၀င်ရောက်လာဖို့ နှေးကွေးနေတာ အံ့သြစရာ မရှိပါဘူး။ သူတို့ ပြောင်းလဲချင်လည်း ခပ်မြန်မြန် ပြောင်းလဲလာပါလိမ့်မယ်။ ဒါပေမယ့် အရမ်းကြီး မမြန်ဘူးဆိုတာတော့ သေချာပါတယ်” ဟု ဘန်ကောက်မြို့ရှိ အနောက်နိုင်ငံသံရုံးတခုမှ စီးပွားရေးပညာရှင် တဦးက ဧရာဝတီ သို့ ပြောခဲ့သည်။

ဧရာဝတီ 

ခေါက်ဆွဲခြောက်ထုတ်များအား ရောနှောစားသုံးသင့်ဟု ပညာရှင်တို့အကြံပြု

၃၀.၄.၂၀၁၃၊ အင်္ဂါနေ့

အသင့်စားခေါက်ဆွဲခြောက်ထုတ်များတွင် လူ့ကျန်းမာရေးအတွက်အကျိုးရှိသည့် အမျှင်ဓါတ်၊ ဗီတာမင်ဓါတ်နှင့် သတ္တုဓါတ်များ မပါဝင်သလောက် နည်းပါးပြီး အန္တရာယ်ပေးနိုင်သော သကြားဓါတ်၊ အချိုမှုန့်ဓါတ်နှင့် ဆိုဒီယမ်ဓါတ်များ  ပါဝင်မှုနှုန်းမြင့်မားသည့်အတွက် ရေရှည်စားသုံးပါက အ၀လွန်ရောဂါရရှိနိုင်သည့် အပြင် ကျန်းမာရေးအား အလွန်ထိခိုက်နိုင်သည်ဟု အထွေထွေရောဂါကု ဆရာဝန်ဒေါက်တာမြင့်ဦးက ဆိုသည်။ 

"လူတစ်ယောက်အတွက် နေ့စဉ်ပုံမှန်စားသုံးတဲ့ အစားစာထဲမှာ ပရိုတိန်း(၂၃)၊အဆီ(၂၈) ၊ ကာဗိုဟိုက် ဒြိတ်(၅၅)ရာခိုင်နှုန်းပါဝင်နေဖို့လိုအပ်ပါတယ်။ဒါပေမယ့် ခေါက်ဆွဲခြောက်မှာ ၉။ ၃၆။ ၅၅ ဖြစ်နေတဲ့အတွက် ပရိုတိန်းဓါတ်က နည်းပြီး ကာဗိုဟိုက်ဒြိတ်နဲ့ အဆီတွေများ လွန်းနေပါတယ်။ ခေါက်ဆွဲခြောက်ဟာ Junk Food လို့ ခေါ်တဲ့ အစားအစာအမျိုးအစားထဲမှာ ပါဝင်နေတဲ့အတွက် ကျန်းမာရေးနဲ့ မညီညွတ်ပါဘူး အချိန်မရလို့ ခေါက်ဆွဲခြောက်ကို  ရေနွေးထဲမှာ ၃ မိနစ်စိမ်ပြိး စားသုံးရတော့မယ့်ဆိုရင် ဟင်းသီးဟင်းရွက်၊ အသား၊ ငါး တစ်ခုခုနဲ့ ရောနှော စားသုံးဖို့ အကြံပြုလိုပါတယ် "ဟု အထွေထွေရောဂါကု ဆရာဝန်  ဒေါက်တာမြင့်ဦးက ပြောသည်။ 

လူတစ်ယောက်အတွက် ဆိုဒီယမ်ဓါတ် တစ်နေ့တာ လိုအပ်ချက်မှာ ၁၅၀၀ မီလီဂရမ်သာရှိကြောင်းနှင့် ခေါက်ဆွဲခြောက် တစ်ထုတ်တွင် ဆိုဒီယမ်ဓါတ် ၂၇၀၀ အထိ ပါဝင်နေသောကြောင့် ရေရှည်စားသုံးပါက အ၀လွန် ရောဂါ စွဲကပ်နိုင်သည့်အပြင် သွေးတိုးရောဂါ၊ နှလုံးရောဂါနှင့် ကျောက်ကပ်ဝေဒနာရှင်များ စားသုံးရန် မသင့်လျော်ဟု ၎င်းက ဆက်ပြောသည်။ 

"အသင့်စား အစားအစာတွေက ကြာရှည်ခံအောင် ဓာတုပစ္စည်းတွေနဲ့ လုပ်ထားတဲ့အတွက် ကျန်းမာရေး အတွက် မကောင်းဘူးဆိုတာတော့ သိတယ် ဒါပေမယ့် ခေါက်ဆွဲပြုတ်စားရတာက အချိန်ကုန်လည်း သက်သာတယ် ငွေကုန်လည်းသက်သာတယ် ညဘက် အိမ်ပြန်ရောက်ရင် လွယ်လွယ်ကူကူ ခေါက်ဆွဲပဲ ပြုတ်စားလိုက်တာ များတယ် ခေါက်ဆွဲပြုတ်စားတာများရင် ဆံပင်ကျွတ်တယ်လို့တော့ ကြားဘူးတယ် "ဟု စမ်းချောင်းမြို့နယ်နေ လူငယ်တစ်ဦးက ပြောသည်။ 

အသင့်စား ခေါက်ဆွဲခြောက်များကို ဂျပန်နိုင်ငံတွင် အဓိကခေါက်ဆွဲခြောက် ထုတ်လုပ်သည့် Nissin Foods ကုမ္ပဏီတည်ထောင်သူ မိုမိုဖူကူအန်တိုက ၁၉၅၈ ခုနှစ်တွင် တီထွင်ခဲ့ခြင်းဖြစ်သည်။ 

၂၀၁၂ ခုနှစ်တွင် ကမ္ဘာတစ်ဝန်းခေါက်ဆွဲခြောက်ထုတ်ရောင်းအားမှာ ၁၀၁ ဒသမ ၄ ဘီလျံရှိကြောင်း ဂျပန် အခြေစိုက် ကမ္ဘာ့ခေါက်ဆွဲခြောက်အသင်း World Instant Noodles က ထုတ်ပြန်ထားသည်။

မြစ်မခ

စိန်စု လမ်းစဉ်နှင့် အနာဂတ် ဒီမိုကရေစီ

၃၀.၄.၂၀၁၃၊ အင်္ဂါနေ့

နောက်ဆုံးအကြိမ် အကျယ်ချုပ်ဘ၀မှ လွတ်မြောက်လာပြီးသည့် နောက်တွင် ဒေါ်အောင်ဆန်းစုကြည်၏ နိုင်ငံရေး သဘောထားနှင့် လမ်းစဉ်သည် ယခင်အခါများနှင့် သိသိသာသာ ကွာခြားသွားသည်ကို အလွယ်တကူ တွေ့မြင်နိုင်သည်။ သူသည် တိုင်းပြည်နှင့် လူမျိုး အတွက် လက်ငင်းလက်တွေ့ အကျိုးရှိနိုင်မည့် လမ်းစဉ် (Pragmatism – ဒိဋ္ဌဟိတ ၀ါဒ) ကို ရဲရဲတင်းတင်း ရွေးချယ်လာ နိုင်ခဲ့သည်။

Pragmatic Method ကို ယနေ့ နိုင်ငံတကာမှ နိုင်ငံရေးသမား အများပင် အသုံးပြု လာကြသည်။ ကောင်းကောင်း နားမလည်သော သတင်းစာဆရာကြီး တဦးဟာ နားစွန်နားဖျား အသိဖြင့် “ဖောက်ပြန်တဲ့ ရုပ်ကြမ်းဝါဒီတွေရဲ့ အကျိုးမျှော်ဝါဒ” ဟု ပုတ်ခတ် လိုက်သေးသည်။ Real Politic ဆိုတာ Romantic Politic ထက် သာလွန်ပေသည်။ အကျိုးရှိရာရှိကြောင်း မလုပ်ဘဲ အကျိုးမဲ့ရာမဲ့ကြောင်း လုပ်ရမလို ဖြစ်နေသည်။ လက်တွေ့ လုပ်ဆောင်မှုသည် Reality တို့၏ အခြေခံ ဖြစ်ကာ အဆုံးအဖြတ်ကို ပြဌာန်းပေးသော အရာဖြစ်သည်။ လုပ်ငန်းအောင်မြင်ဖို့ အတွက် လက်တွေ့သည် သဘောတရား ထက် အရေးကြီးသည် ဆိုသော တရားသေ နိုင်ငံရေးသည် ခေတ်မရှိတော့။ ဖြစ်ပေါ်နေသည့် အခြေအနေအပေါ် အကောင်းကို ရှေ့ရှုပြီး ကိုင်းညွှတ်ဆောင်ရွက်နိုင်သည့် နိုင်ငံရေး သဘောထားသာ ခေတ်စားနေသည်။ ဒေါ်အောင်ဆန်းစုကြည်သည် အနှစ် ၂၀ လုံးလုံး ကိုင်တွယ် ကျင့်သုံးခဲ့သည့် ထိပ်တိုက် ရင်ဆိုင်ရေး လမ်းစဉ်၏ အကျိုးမရှိပုံကို ကောင်းကောင်း သဘောပေါက် ကာ၊ ပျော့ပြောင်း၍ လစ်ဘရယ်ဆန်သည့် အလယ်အလတ် သဘောထားသို့ ပြောင်းလဲခဲ့သည်။ ယင်းမှာ သွေဖီဖောက်ပြန်ခြင်း မဟုတ်ချေ။ စွန်မျှား စွန်ဖြတ်ကြရာ၌ လျှော့ကြိုး တင်းကြိုး ကိုသိသည်။ လေကြောင်း အနေအထား၊ စွန်ရောက်ရှိနေသော နေရာကို ကြည့်၍ ကြိုးကို လျှော့ပေးရသည့် အခါလည်း ရှိသည်။ အဓိကမှာ စွန်ဖြတ် နိုင်ဖို့သာ ဖြစ်သည်။

စစ်အစိုးရ၏ စပွန်ဆာဖြင့် ပြုလုပ်သော ရွေးကောက်ပွဲတွင် ပြည်ခိုင်ဖြိုးပါတီက အနိုင်ရကာ ဦးသိန်းစိန် ဦးဆောင်သော အစိုးရကို ဖွဲ့စည်းနိုင်ခဲ့သည်။ အစိုးရသည် သိသာထင်ရှားသော ဆောင်ရွက်ချက်များဖြင့် ထိန်းချုပ်မှုများကို လျှော့ဖြေ (Liberalization) လာခဲ့သဖြင့်  နိုင်ငံတကာ အသိုင်းအ၀ိုင်းကပင် ၀မ်းမြောက် ၀မ်းသာ ကြိုဆိုလက်ခံလာ ခဲ့ကြသည်။
ထို့ကြောင့် ယနေ့ခေတ် မြန်မာနိုင်ငံ၏ အခြေအနေကို (အတိုက်အခံရော၊ အစိုးရဘက်ကပါ ဖြေလျှော့မှုတွေ ဆောင်ရွက် လာကြသဖြင့်) အမျိုးသား ရင်ကြားစေ့ရေးကို ဆောင်ရွက်ရန် အတွက် အကောင်းဆုံး အချိန်ကာလ၊ ထီးလိုမင်းလို ကာလဟုပင် ဆိုရပေမည်။ အပေါ်စီးမှ အာဏာကို ဆုပ်ကိုင်ထားသော အီလိ (Elic) များက အပြောင်းအလဲကို ဦးဆောင်ကာ ဖန်တီး ခင်းကျင်း ထားသော၊ သတ်မှတ်ချက် တစုံတရာအတွင်း (Guided democracy)၊ အတိုက်အခံ ပလေယာတို့ အနေဖြင့် ကစားကွက်များကို မည်မျှ လိမ္မာကျွမ်းကျင်စွာ ဖော်ဆောင်နိုင်မည်နည်း။ အင်မတန် ခက်ခဲ ကြီးလေးသော တာဝန်ဝန်တရပ်ပင် ဖြစ်သည်။ ထိုအချိန်တွင် စိတ်လှုပ်ရှားမှု၊ စိတ်ခံစားမှုကို အခြေခံ လှုပ်ရှား၍ မရ။ နိုင်ငံရေး အမြာ်အမြင် ကြီးမားမှုဖြင့် ဆင်ခြင်တုံ တရားကိုသာ အခြေခံရမည်။ အမျိုးသား ပြန်လည်သင့်မြတ်ရေး (National Reconciliation) ကွက်၍ တည်ဆောက်မရ။ အဓိက အင်အားစု ၄ ရပ် (အစိုးရ၊ အာဏာရပါတီ၊ အတိုက်အခံနှင့် ယနေ့ မြန်မာနိုင်ငံရေး ကဏ္ဍတွင် အခိုင်အမာ ပါဝင်နေသည့် တပ်မတော်) စလုံး သင့်မြတ် ညီညွတ်မှ ဖြစ်ပေမည်။ အဲဒါဆို အားလုံး၏ Minister တွေကို ပြင်ရပေမည်။

ဒေါ်အောင်ဆန်းစုကြည်နှင့် သမ္မတဦးသိန်းစိန် တွေ့ဆုံဆွေးနွေးကြကာ အဖြေတခု ထွက်ပေါ်လာသည်။ ဒေါ်အောင်ဆန်းစုကြည်၏ ပါတီကို မှတ်ပုံတင်မည်၊ ရွေးကောက်ပွဲ ၀င်မည်၊ ကန့်ကွက်သူတို့က ကန့်ကွက်သော်လည်း ဒေါ်အောင်ဆန်းစုကြည်က ရဲရဲဝံ့ဝံ့ ဆက်လျှောက်ခဲ့သည်။ နှစ်ကာလတွေ ကွာခြားသွားသော်လည်း သူ့ “စန်း” က မကျသေး။ ကြားဖြတ် ရွေးကောက်ပွဲတွင် ရာနှုန်းပြည့် နီးပါး အောင်နိုင်ခဲ့သည်။ ပြည်သူတွေက သူနှင့် ပါတီကို ချစ်ခင် အားပေးဆဲ ဆိုတာ ထင်ရှားသည်။ ရွေးကောက်ပွဲ မဲဆွယ်ခရီးထွက်ရာ၌လည်း ရောက်ရှိရာ ဒေသတိုင်းမှာ အုတ်အုတ်ကျက်ကျက် ကြိုဆိုကြသည်။ ယခု ကြားဖြတ်ရွေးကောက်ပွဲမှာ ၂၀၁၅ ရွေးကောက်ပွဲအတွက် အကြို အားစမ်းပွဲ လည်း ဖြစ်နိုင်သည်။ လွှတ်တော်ထဲ ၀င်ရန် ကျမ်းကျိန်ဖို့ ကိစ္စ၌လည်း ဒေါ်စုဘက်က အလျှော့ပေးခဲ့သည်။ ပြည်သူတွေက သူ့ကို လွှတ်တော်ထဲမှာ မြင်ချင်ကြသည်၊ ဒါကြောင့် ပြည်သူ့ဆန္ဒကို လေးစားတဲ့ အနေနဲ့ သူ့ဘက်က အလျှော့ပေးခဲ့တာဟု သူက ဆိုသည်။ ဘာပဲဖြစ်ဖြစ် လွှတ်တော်ထဲ ရောက်သွားတော့ အားလုံးက ကြိုဆိုကြသည်။ လွှတ်တော် ဥက္ကဋ္ဌ ဦးရွှေမန်းနှင့် တွေ့ဆုံသည်။ လွှတ်တော်က သူ့ကို တရားဥပဒေ စိုးမိုးရေးနှင့် တည်ငြိမ်အေးချမ်းရေး ကော်မတီ ဥက္ကဋ္ဌ ခန့်သည်။ တချို့က ဒါဟာ ဒေါ်အောင်ဆန်းစုကြည်ကို ပါးနပ်စွာ အသုံးချတာဟု ဆိုသည်။ ယနေ့ မှိုလိုပေါက်နေသော ပြဿနာများ၊ ဥပဒေပြင်ပမှ ဆန္ဒပြပွဲ၊ သပိတ်မှောက်ပွဲများကို ဒေါ်အောင်ဆန်းစုကြည် ရင်ဆိုင် ဖြေရှင်းရတော့မည်။ တဘက်က လူထု ကျေနပ်အောင် မဖြေရှင်းနိုင်ခဲ့သော် … (ဤ ပြဿနာကို လက်ပံတောင်းတောင် ကိစ္စတွင် အထင်အရှား တွေ့ရသည်)။

ဒေါ်အောင်ဆန်းစုကြည်က ရှင်းရှင်းပြောသည်။ သူ့ကို အသုံးချသည် ဆိုလျှင်လည်း တိုင်းပြည်အကျိုးရှိမည် ဆိုပါက အသုံးချ ခံမည်ဟု …။

ဒေါ်အောင်ဆန်းစုကြည်၏ သဘောထားကို တဘက်ကလည်း သိသည်။ ဒေါ်အောင်ဆန်းစုကြည်က ပရမ်းပတာ ၀ါဒကို မကြိုက်။ ဥပဒေဘောင် အပြင်ဘက်က လှုပ်ရှားမှုမျိုးကို မနှစ်သက်။ ဒီမိုကရေစီ ကိုယ်နှိုက်က စည်းကမ်းရှိပြီးသားဟု ပြောလေ့ရှိသည်။ တရားဥပဒေ စိုးမိုးရေးကို အလေးထားသူ ဖြစ်သည်။ ဤ သဘောထားကို စမ်းသပ်ဖို့အတွက် လက်ပံတောင်းတောင် ကိစ္စ စုံစမ်းစစ်ဆေးရေး ကော်မရှင် ဥက္ကဋ္ဌ အဖြစ် သူ့ကို ခန့်အပ်လိုက်သည်။ တကယ်တမ်း ဖြစ်ရိုးဖြစ်စဉ်အတိုင်း ဆောင်ရွက်မည် ဆိုပါက စုံစမ်းစစ်ဆေးရေး ကောက်မရှင်က စုံစမ်းစစ်ဆေး ရရှိသမျှ တွေ့ရှိချက်တွေကို အစိုးရ ထံတင်ပြ၊ အစိုးရက အစီရင်ခံစာပါ အချက်အလက်များကို ကြည့်ရှုသုံးသပ်၍ ဆက်လုပ်သင့် မလုပ်သင့် ဆုံးဖြတ်၊ ဒါပဲဖြစ်သည်။ ယခုတော့ အစိုးရအဖွဲ့က လွှဲရှောင်လိုသော သဘောလား၊ စုံစမ်းစစ်ဆေးရေး ကော်မရှင်အပေါ် ယုံကြည်မှု လွန်ကဲသော သဘောလား မသိ။ လက်ပံတောင်းတောင် ကိစ္စကို စုံစမ်းစစ်ဆေးရေး ကော်မရှင်၏ ဆုံးဖြတ်ချက်အတိုင်း လိုက်နာပါမည်ဟု ကြိုတင်ကြေညာ ထားလေသည်။ အင်မတန် ကြီးမားလှသော အလောင်းအစား တခု ဖြစ်သည်။

ဒေါ်အောင်ဆန်းစုကြည် ခေါင်းဆောင်သော စုံစမ်းရေး ကော်မရှင်က ဆက်မလုပ်သင့်ပါဟု ဆုံးဖြတ်လိုက်လျှင် တကယ်ပဲ အစိုးရက ဆက်မလုပ်ဘဲ နေမည်လား။ (သူတို့ ကြိုတင်ပြောစကားအရ ဆိုလျှင် ဒီအတိုင်းပဲ မှတ်ယူရပေမည်) ဤနေရာ၌ ဒေါ်အောင်ဆန်းစုကြည်အတွက် ပွင့်လန်းနေသော အခွင့်ထူးကိုတွေ့ရသည်။ သူသာ ဆက်မလုပ်သင့် ဟုဆုံးဖြတ်လိုက် လျှင် ပြည်သူ၏ ထောက်ခံမှုကို တခဲနက် ရမည်။ ၉၀ ရာခိုင်နှုန်းသောလူတွေက ဆက်မလုပ်သင့်ဟု ယူဆကြ၏။ အစိုးရလည်း အကြပ်တွေ့နိုင်သည်။ တပ်မတော်ပိုင် ဦးပိုင် ကုမ္ပဏီလည်း ဒုက္ခရောက်မည်။ ဒေါ်အောင်ဆန်းစုကြည်မှာ လူထုကြားတွင် နိုင်ငံရေး ဂုဏ်သိက္ခာ မြင့်တက်နိုင်မည်။ သို့သော် သူက ရေရှည်ကိုမျှော်တွေးကာ “ဆက်လုပ်သင့်သည်” ဟု ဆုံးဖြတ်ပေး လိုက်သည်။

တဘက်ကလဲ (လောင်းကစား စကားနှင့် ဆိုရလျှင်) ဒေါ်အောင်ဆန်းစုကြည်ကို ယုံ၍ ပုံလိုက်ခြင်းဖြစ်သည်။ ဒေါ်အောင်ဆန်းစုကြည်သည် သူ့စိတ်ထဲတွင် မှန်သည်ဟု ထင်သည့်အတိုင်း ပြောဆိုလုပ်ကိုင်လိမ့်မည်။ သူ၏ ပင်ကိုယ် စိတ်ရင်းအတိုင်း တွက်ဆလျှင် ဤစီမံကိန်းမှာ ဆက်လုပ်သင့်သည်ဟု အဖြေထွက်ပေမည်။ ပြီးတော့ ဤဆုံးဖြတ်ချက်မှာ သူ တယောက်တည်း အပေါ်၌ မတည်။ အဖွဲ့ဝင် ပညာရှင်များ၏ သဘောထားက အရေးပါ၍ နေ၏။ အစိုးရသည် တကယ်တော့ နိုင်မည့် မြင်းကို လောင်းခဲ့သည်ဟု ဆိုရမည်။ မှန်တယ် ထင်လျှင် မငဲ့ကွက်ဘဲ ပြောရဲလုပ်ရဲသည့် ဒေါ်အောင်ဆန်းစုကြည်မှာ ပေါက်ကွဲနေသော လက်ပံတောင်းတောင် ဒေသခံများနှင့် ပဋိပက္ခဖြစ်ရသည်မှာ အားလုံး အသိပင် ဖြစ်၏။ ဒေါ်အောင်ဆန်းစုကြည်က အစီရင်ခံစာ မထွက်ပေါ်မီ ကော်မရှင် စတင်ဖွဲ့စည်းစဉ်ကပင် “ကျမ အကောင်းဆုံး ဖြစ်အောင်လုပ်မယ်၊ အများကြိုက်တော့ ဖြစ်ချင်မှဖြစ်မယ်” ဟု ပြောခဲ့သည်။ အကောင်းဆုံး ဆိုသော စကားဖြင့်ပင် ကျနော်တို့ ကျေနပ် သင့်သည်။ ဒါက သဘာဝလည်း ကျသည်။ သို့သော် ပြင်းထန်သော ခုခံဆန့်ကျင်မှုနှင့် သူရင်ဆိုင်လိုက်ရသည်။ တခုတော့ ကောင်းသည် ဒေါ်အောင်ဆန်းစုကြည် အတွက် နိုင်ငံရေး သံဝေဂ ရစရာ ဖြစ်သည်။ လူတွေက သူတို့အကြိုက် မလိုက်နာလျှင် ကန့်ကွက်ကြတတ်သည့် သဘောဖြစ်သည်။

ဒေါ်အောင်ဆန်းစုကြည်က မှတ်သားလောက်စရာ “နိုင်ငံရေး လုပ်တယ်ဆိုတာ လူမုန်းချင်မုန်းမှာပေါ့၊ ကျမကိုချစ်စေချင်ရင် ဇာတ်ကမှာပေါ့” ဟု ပြောခဲ့သည်။

အရင်က “အမေစု ဆုံးဖြတ်တဲ့အတိုင်း နာခံပါမယ်” ဆိုသော သပိတ်စခန်း ခေါင်းဆောင်တွေကလည်း ကက်ကက်လန် အောင် ရန်တွေ့ကြသည်။ လက်ပံတောင်းတောင် ကိစ္စမှာ လှပသော နိုင်ငံရေး ကစားကွက်ဖြစ်ကာ ဒေါ်အောင်ဆန်း စုကြည်၏ ခိုင်မာ ပြတ်သားမှုနှင့် အမြော်အမြင် ရှိမှုကို ထုတ်ဖော်ပြသနိုင်သည့် ပွဲလည်းဖြစ်သည်။ ဒေါ်အောင်ဆန်းစုကြည် သည် ဤပွဲတွင် မရှုံးအောင် ကစားနိုင်ခဲ့သည်မှာ သေချာသည်။ သူသည် ပေါ်ပြူလာ နိုင်ငံရေးသမား (Popular Politic) မဟုတ် ဆိုတာ၊ အရည်အချင်းရှိသော နိုင်ငံရေးသမား တယောက်ဆိုတာ ထုတ်ဖော်ပြသ နိုင်ခဲ့သည်။ သူသည် အများစု အကြိုက်ကို လိုက်၍ မပြောနိုင်။ မီးခိုးဗုံးကို မီးလောင်ဗုံးဟု မပြောနိုင်ဟု ငြင်းခဲ့သည့် သတ္တိကို ချီးကျူးရပေမည်။

မကြာမီ ကာလများက ဒေါ်အောာင်ဆန်းစုကြည်သည် သမ္မတ လုပ်လိုသည်ဟု ပြောင်ပင်ဖွင့်ဟ ပြောလာခဲ့သည်။ နိုင်ငံရေး သမားတယောက် အတွက် အာဏာဆိုသည်မှာ လုပ်ပိုင်ခွင့်ပင် ဖြစ်သည်။ ဒါကြောင့် သမ္မတ ဖြစ်ချင်တယ် ဆိုတာ သဘာဝ ကျသည်။ သမ္မတ ဖြစ်ဖို့ အခြေခံဥပဒေကို ပြင်ဆင်ရမည်။ ဖွဲ့စည်းအုပ်ချုပ်ပုံ အခြေခံဥပဒေ အခန်း ၃ နိုင်ငံတော် သမ္မတနှင့် ဒုတိယ သမ္မတ အရည်အချင်းများ ပုဒ်မခွဲ (စ) ညွှန်းဆိုချက်ကို ပြင်ဆင်မှ ဖြစ်မည်။ မိမိ၏ ရင်သွေးနှစ်ဦးက အင်္ဂလန် နိုင်ငံသား ဖြစ်နေခြင်းမှာ ဤအချက်နှင့် ငြိစွန်းနေသည်။ ဗိုလ်ချုပ်အောင်ဆန်းတို့ ရေးဆွဲခဲ့သော ၁၉၄၇ အခြေခံဥပဒေ၌ ဤအချက် မပါဝင်။ သူ့ကို သမ္မတ မဖြစ်စေရန် ရည်ရွယ်ဟန့်တားလိုသော သဘောထားဖြင့် ထည့်သွင်းထား သကဲ့သို့ ဖြစ်နေသည်။ ဖွဲ့စည်း အုပ်ချုပ်ပုံ အခြေခံဥပဒေကို ပြင်ဆင်နိုင်ရန် လွှတ်တော် ကိုယ်စားလှယ် ၇၅ ရာခိုင်နှုန်း ကျော်ကျော်က ထောက်ခံ ရမည် ဖြစ်ရာ ယခုလက်ရှိ လွှတ်တော် အတွင်း၌ ရှိနေသော အရပ်သား ကိုယ်စားလှယ် အားလုံးက ထောက်ခံသည့် တိုင်အောင် မဖြစ်နိုင်။ ၂၅ ရာခိုင်နှုန်း ပါဝင်နေသော တပ်မတော် ကိုယ်စားလှယ် များကပါ ထောက်ခံမှ ဖြစ်ပေမည်။

ဒေါ်အောင်ဆန်းစုကြည်သည် ထိုအချိန်၌ ဦးသိန်းစိန် အစိုးရအဖွဲ့နှင့်လည်း ပြေလည်နေပြီ။ ဦးရွှေမန်း၏ လွှတ်တော်နှင့်လည်း ပြေလည်နေပြီး ဦးရွှေမန်းနှင့် အတူ ဒုံးယိမ်းပင် ကလိုက်သေးသည်။ ပြည်ခိုင်ဖြိုးမှ ဦးဌေးဦး တို့နှင့်လည်း ပြေလည်မှု ရရှိနေပြီ။ NLD ဗဟို ပါတီညီလာခံသို့ ဦးဌေးဦး ပြုံးရွှင်သော မျက်နှာဖြင့် တက်ရောက်ခဲ့တာ တွေ့ရသည်။ ဒေါ်အောင်ဆန်းစုကြည်က သူတို့ ပါတီသည် အတိုက်အခံပါတီ မဟုတ်ဟုပင် ထုတ်ဖော်ပြောခဲ့သည်။ ပြီးခဲ့သော ၀ါဆိုလပြည့်နေ့က သုံးခွတွင် ပြည်ခိုင်ဖြိုးနှင့် NLD နှစ်ပါတီ ပူးတွဲကာ ၀ါဆိုသင်္ကန်း ကပ်ကြသည်ဆိုသော သတင်းကိုကြည့်ကာ ကျနော် စဉ်းစားမရ ဖြစ်ခဲ့ သေးသည်။

ဒီတော့ ဒေါ်အောင်ဆန်းစုကြည် ပြေလည်မှု ရရှိစေရန် ကျန်ရှိနေသေးသည်မှာ တပ်မတော် အင်အားစုသာ ရှိတော့သည်။ ဒေါ်အောင်ဆန်းစုကြည်သည် တပ်မတော် အပေါ် ချစ်ခင်လေးစားသည်၊ သံယောဇဉ်ရှိသည်ဟု တဖွဖွ ပြောနေခဲ့သည်မှာ ကြာလေပြီ။ ဤအချက်ကို လက်တွေ့ သက်သေပြဖို့ အတွက် လက်ပံတောင်းတောင် ပြဿနာ ပေါ်လာသည်။

ဒေါ်အောင်ဆန်းစုကြည် ဦးဆောင်သော စုံစမ်းရေး ကော်မရှင်က လက်ပံတောင်းတောင် စီမံကိန်း ဆက်လက် ဆောင်ရွက် သင့်ပါသည် ဟူသော ကောက်ချက်ကြောင့် လက်ငင်း အကျိုးရှိသွားသည်မှာ တပ်မတော်ပိုင် ကုမ္ပဏီ ဦးပိုင်ပင် ဖြစ်လေသည်။ ဒီအတွက် တပ်မတော်က ဒေါ်အောင်ဆန်းစုကြည်ကို အခြေခံ ဥပဒေ ပြင်ဆင်ရေး၌ ထောက်ခံခြင်းဖြင့် ပြန်လှန်ကျေးဇူး ဆပ်လေမလား။ ဒါကလဲ စွန့်စားမှု တခုဖြစ်သည်။

“အပေးအယူရဲ့ သဘောတရားဟာ ပျော့ပြောင်းရမယ်၊ နားလည်မှုရှိရမယ်၊ ဒါ ဒီမိုကရေစီရဲ့ အခြေခံပဲ” ဟု ဒေါ်အောင်ဆန်း စုကြည် ပြောခဲ့သည်။ ပေးမှ ယူလို့ ရမည်ဟု သိသည်။

ပထမ ဆိုခဲ့သလို လက်ငင်း အကျိုးရှိသည်မှာ တပ်မတော် (ဦးပိုင်) သာဖြစ်သော်လည်း ရေရှည်တွင်မူ အမျိုးသား ပြန်လည် သင့်မြတ်ရေး အတွက် အရေးပါသော ခြေလှမ်းဖြစ်သဖြင့် နိုင်ငံတော် အကျိုးစီးပွားဟု ပြောသည်ကို မှားသည်ဟု မဆိုနိုင် ပါချေ။ တဆက်တည်းပင် ဒေါ်အောင်ဆန်းစုကြည်သည် တပ်မတော်နေ့ အခန်းအနားသို့ တက်ရောက်ကာ စစ်ရေးပြပွဲကို ကြည့်၍ လက်ခုပ်လက်ဝါး တီးကာ အားပေးခဲ့သည်။ ဆန်ဖရန်စစ္စကို မြန်မာမိသားစုနှင့် တွေ့ဆုံရာ၌ “တပ်မတော်သာ ဒီမိုကရေစီ လမ်းကြောင်းပေါ်မှာ ပြည်သူနဲ့အတူ လျှောက်နေပြီဆိုရင် နောက်ကြောင်းပြန်လှည့်စရာ မရှိပါဘူး” ဟု ပြောခဲ့သည်။

ဦးသိန်းစိန် (သမ္မတကြီး ကလည်း) ဘီဘီစီ သတင်းဌာန Hard Talk အစီအစဉ်တွင် “မြန်မာပြည်သူလူထုက ဒေါ်အောင်ဆန်းစုကြည်ကို အနာဂါတ် မြန်မာနိုင်ငံရဲ့ သမ္မတ အဖြစ် မြင်ချင်တယ်ဆိုရင် ကျနော့်အနေနဲ့ လက်မခံနိုင်စရာ မရှိပါဘူး။ ကျနော်တို့ အကြားမှာ ပြဿနာ တစုံတရာ မရှိပါဘူး” ဟု ပြောဆိုခဲ့သည်။

ဖွဲ့စည်းအုပ်ချုပ်ပုံ အခြေခံဥပဒေ ပြင်ဆင်ရေးကိစ္စကို ပြည်ခိုင်ဖြိုးကပင် စတင် အဆိုတင်သွင်းကာ ဘာတွေပြင်မည် ဆိုတာ ဆွေးနွေးဖို့ ပြင်ဆင်နေသည်။ ပြင်ဆင်ရာ၌ အခန်း ၃၊ အပိုဒ်ခွဲ (စ) ပါဝင်လာမည်လော။ ဦးအောင်မင်းက ၂၀၁၅ ရွေးကောက်ပွဲ မတိုင်မီ အခြေခံဥပဒေ ပြင်ဆင်မည်ဟု ဆိုပြန်လေသည်။ ပြည်ခိုင်ဖြိုး ဒုဥက္ကဋ္ဌ ဦးဌေးဦးက “ဒီမိုကရေစီ ဖော်ဆောင်ရေးကို ကျနော်တို့ ဆောင်ရွက်ခဲ့တာ။ ကိုယ်လုပ်ခဲ့တာကို ပြန်မဖျက်ဆီးဘူး။ နောက်ကြောင်း ပြန်လှည့်မယ် ဆိုတဲ့ စကားကို တခါမှ မပြောခဲ့ဘူး” ဟု ဆိုသည်။ ဦးသိန်းစိန်၊ ဦးရွှေမန်းနှင့် ဒေါ်အောင်ဆန်းစုကြည် တို့၏ ပဋိပက္ခ ဖြေရှင်းရေး (ပူးတွဲထုတ်ပြန်သည့်) မူ ၆ ချက် ထွက်လာသည် ကိုလည်း တွေ့ရသည်။ အဲဒီတော့ ဒီနေ့ မြန်မာနိုင်ငံရေး အခြေအနေမှာ အတော်ပင် ရှင်းလင်း နေသည်ဟု ဆိုရမည်။

စိန်စု လမ်းကြောင်း (Sein – Su Trend) ဒါမှမဟုတ် အဆင့်ဆင့် ဒီမိုကရေစီ ပုံဖော်ရေးကို အချိုးအစား ညီညွတ်ရေး လမ်းကြောင်းအတိုင်း လျှောက်လှမ်းဖို့ ပြင်ဆင်နေတာ သေချာသည်။ ယနေ့ မြန်မာ့နိုင်ငံရေး ဇာတ်ခုံပေါ်မှ အဓိက ပလေယာ လေးဦး (အစိုးရ၊ လွှတ်တော်၊ အတိုက်အခံနှင့် တပ်မတော်) လမ်းကြောင်းကို ပြောင်းလဲနိုင်လောက်အောင် အားကောင်းသည့် တခြား ပလေယာများကို မမြင်။

ဤကစားပွဲသည် စစ်မှန်သောကစားပွဲဟု တထစ်ချ ယူဆနိုင်ပါသလား။ ကျနော် မဖြေတတ်ပါ။ ကြက်ဥအရောင်၊ တိမ်တောင် သဖွယ် ကိစ္စဖြစ်ပါသည်။ နိုင်ငံရေးဆိုသည်မှာ ပုံသေကားချ ပြော၍ ရနိုင်သောအရာ မဟုတ်။ မထင်မှတ်သော အလှည့်အပြောင်း တွေလည်း ရှိနိုင်သည်ပင်။ ဥပမာ ၂၀၁၅ မတိုင်မီ အခြေခံဥပဒေကို တကယ် ပြင်နိုင်မှာလား။ မပြင်နိုင်ခဲ့သည် ရှိသော် …။

ဦးသိန်းစိန်ပင် ဒုတိယ သက်တမ်း တာဝန်ယူဖွယ် ရှိပါသည်။ သူကလည်း (ယခင်က တကြိမ်သာ တာဝန်ထမ်းဆောင်မည် ဟု ပြောထားခဲ့ပြီးမှ) ယခုအခါ လိုအပ်ပါက သမ္မတ တာဝန်ကို ဒုတိယ သက်တမ်းအဖြစ် တာဝန်ထမ်းဆောင်မည်ဟု ဆိုထားပြန် သည်။ ပြီးတော့ ရွေးကောက်ပွဲ ကော်မရှင်ကလည်း PR စံနစ် အသုံးပြုသင့် မသင့် စဉ်းစားလိမ့်မည်။ ဒါဆို ဘယ်ပါတီမှ လွတ်လွတ်ကျွတ်ကျွတ် အောင်မြင်မှု မရနိုင်။ ညွန့်ပေါင်း အစိုးရအဖွဲ့ ပေါ်ထွန်းလာလေမည်လား။ တခုတော့ ရှိသည်။ ပြည့်ဝ စစ်မှန်သော ဒီမိုကရေစီ နိုင်ငံဖြစ်ဖို့ ကျနော်တို့ စောင့်စားကြရဦးမည်။ စစ်တပ်အာဏာမှ တဆင့် ပြည်သူ့ အာဏာအဆင့်သို့ တဖြည်းဖြည်း ကူးပြောင်းခဲ့ကြသည့် တောင်ကိုရီးယား၊ အင်ဒိုနီးရှားတို့ လမ်းကြောင်းအတိုင်း သွားမည့်ပုံသာ ပေါ်ပါသည်။     ။

ဧရာဝတီ

၂၀၁၅ ရွေးကောက်ပွဲ အောင်နိုင်ရေး ကြံ့ခိုင်ရေးပါတီ လူငယ်အဖွဲ့ ဖွဲ့မည်

၃၀.၄.၂၀၁၃၊ အင်္ဂါနေ့

အာဏာရ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက လာမည့် ၂၀၁၅ ခုနှစ်တွင် ကျင်းပမည့် ရွေးကောက်ပွဲ အောင်နိုင်ရေး အတွက် လူငယ်အဖွဲ့များကို ပြန်လည်ဖွဲ့စည်းသွားမည်ဖြစ်ပြီး ကြံ့ခိုင်ရေးပါတီ၏ လူငယ်ညီလာခံတရပ်ကိုိ မေလ ၁ ရက်နေ့မှ ၃ ရက်နေ့ထိ နေပြည်တော်တွင် ကျင်းပမည်ဖြစ်ကြောင်း သတင်း ရရှိသည်။

ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီက နိုင်ငံတ၀န်းမှ လူငယ်များ ပါဝင်သော လူငယ်တွေ့ဆုံပွဲနှင့် လူငယ် စွမ်းရည် မြှင့်တင်ရေး အဖွဲ့များ ဖွဲ့စည်းရေး အစည်းအဝေးတရပ်ကို နေပြည်တော်တွင် မေလ ၁ ရက်နေ့မှ ၃ ရက်နေ့အထိ ကျင်းပမည် ဖြစ်ပြီး ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီ၏ ဒုတိယဥက္ကဋ္ဌသူရဦးရွှေမန်း တက်ရောက်မည်ဖြစ်ကြောင်း၊ ပါတီဥက္ကဋ္ဌ ဖြစ်သော သမ္မတဦးသိန်းစိန် တက်ရောက်မည် မတက်ရောက်မည်မှာ မသေချာသေးကြောင်း နေပြည်တော်ရှိ ပါတီဌာနချုပ် လူငယ်ရေးရာဌာန ဌာနခွဲမှူးဦးသောင်းထိုက် က ဧရာဝတီသို့ ပြောသည်။

“လူငယ်တွေ့ဆုံပွဲဆိုပေမယ့် တနိုင်ငံလုံးက လူငယ်တွေ တက်ကြမယ်။ လူငယ်ညီလာခံ လို့လည်း ပြောလို့ရပါတယ်။ အခုထက်ထိတော့  ပါတီရဲ့အကြီးအကဲတွေထဲက သူရဦးရွှေမန်းတက်မယ်။ သမ္မတဦးသိန်းစိန် ကတော့ မဖိတ်ရသေးဘူး၊ နီးမှ ကပ်ဖိတ်မှာလားတော့မသိဘူး။ လူငယ်အဖွဲ့တွေ ပြန်ပြီးဖွဲ့စည်းမှာပေါ့။ ၂၀၁၅ ရွေးကောက်ပွဲအောင်နိုင်ရေးကတော့ အဓိက ရည်ရွယ် ချက်ပါပဲ” ဟု ဦးသောင်းထိုက်က ဆိုသည်။

ကြံ့ခိုင်ရေး ပါတီ၏ လူငယ်တွေ့ဆုံပွဲသို့ ပြည်နယ်နှင့် တိုင်းဒေသကြီးမှ လူငယ်များအပြင် ပြည်နယ်နှင့် တိုင်းဒေသကြီး ပါတီဥက္ကဋ္ဌများ၊ ပါတီဗဟိုအလုပ်အမှုဆောင်များ စုံညီစွာ တက်ရောက်ကြမည်ဟု သိရှိရသည်။

“ပြည်နယ် နှင့် တိုင်းဒေသကြီးတခုစီက လူငယ်ဦးဆောင်သူ ၂၀  တက်ဖို့ ဖိတ်ထားတယ်။ ပြည်ခိုင်ဖြိုးပါတီရဲ့ ပြည်နယ် တိုင်း ဥက္ကဋ္ဌ တွေလည်း တက်မယ်။ စုစုပေါင်း ၆၀၀ ကျော် တက်မယ်” ဟု ဦးသောင်းထိုက် ရှင်းပြသည်။

ကြံ့ခိုင်ရေးပါတီက လူငယ်တွေ့ဆုံပွဲကို မေလ လဆန်းပိုင်းတွင်  ကျင်းပရန် ပြင်ဆင်နေချိန် အမျိုးသားဒီမိုကရေစီ အဖွဲ့ချုပ်က လူငယ်ညီလာခံတရပ်ကို ယခုမေလအတွင်းတွင် ကျင်းပရန် စီစဉ်နေကြောင်း အမျိုးသားဒီမိုကရေစီ အဖွဲ့ချုပ်၏ အတွင်းရေးမှူး ဦးဥာဏ်ဝင်းက ပြောသည်။

ကြံ့ခိုင်ရေးပါတီက ၂၀၁၅ ရွေးကောက်ပွဲအောင်နိုင်ရေးအတွက် လူငယ်အဖွဲ့များ ဖွဲ့စည်းရန် ပြင်ဆင်မှုအပေါ် ၀ါရင့် နိုင်ငံရေးသမားကြီး သခင်ချန်ထွန်းက နိုင်ငံရေးပါတီတရပ်အနေဖြင့် ရွေးကောက်ပွဲအတွက် ကြိုတင်ပြင်ဆင်မှုသော နိုင်ငံရေး ဆောင်ရွက်ချက် အဖြစ် ရှုမြင်သော်လည်း ဒေါ်အောင်ဆန်းစုကြည် ဦးဆောင်သော အမျိုးသား ဒီမိုကရေစီ အဖွဲ့ချုပ် က ၂၀၁၅ ရွေးကောက်ပွဲတွင် အပြတ်အသတ် အနိုင်ရနိုင်ခြေ မြင့်မားနေကြောင်း သုံးသပ် ပြောဆိုသည်။

“၂၀၁၅ က သိပ်မလိုတော့ဘူး။ အခုကတည်းက စည်းရုံးထားမှ ကောင်းတာပေါ့။ စောစောစည်းရုံးနိုင်လေ ကောင်းလေပဲ။ စောစောလုပ်တာ မှန်တာပေါ့။ လက်ရှိ အခြေအနေမှာတော့ ဒေါ်အောင်ဆန်းစုကြည်ဦးဆောင်တဲ့ NLD အပြတ်နိုင်မယ် ထင်တယ်။ ဒေါ်အောင်ဆန်းစုကြည်ကို လူထုထောက်ခံမှုက လျော့မသွားသေးဘူး။ ဒါပေမယ့် ၂၀၁၅ မတိုင်ခင် အမှားအယွင်း တခုခုလုပ်မိလို့ ရင်တော့ လူထုထောက်ခံမှုလျော့သွားနိုင်တာပေါ့” ဟု သခင်ချန်ထွန်းက ဆိုသည်။

ကြံ့ခိုင်ရေးပါတီသည် အမျိုးသားဒီမိုကရေစီအဖွဲ့ချုပ် ပါဝင်ယှဉ်ပြိုင်ခြင်းမရှိသည့် ၂၀၁၀ ရွေးကောက်ပွဲတွင် မဲဆန္ဒနယ် အများစု အနိုင်ရရှိခဲ့ပြီး ယခင် စစ်အစိုးရ ၀န်ကြီးချုပ် ဗိုလ်ချုပ်ကြီးသိန်းစိန် အပါအ၀င် စစ်ဗိုလ်ချုပ်ဟောင်းများဖြင့် အဓိက ဖွဲ့စည်းထားသော နိုင်ငံရေးပါတီဖြစ်သည်။

 ဧရာဝတီ

Ricin အဆိပ်ပါ စာပို့သူ တရားရုံးထုတ်မည်

၃၀.၄.၂၀၁၃၊ အင်္ဂါနေ့

အမေရိကန် သမ္မတ ဘရက်ခ် အိုဘားမား (Barack Obama) နဲ့ အထက်လွှတ်တော် အမတ် တဦးတို့ဆီကို အဆိပ်ပါတဲ့ စာတွေ ပေးပို့မှုနဲ့ စွပ်စွဲခံခဲ့ရတဲ့ အမျိုးသားကို တနင်္လာနေ့က ပြည်နယ်တရားရုံးတခုမှာ ပထမဆုံးအကြိမ် ရုံးထုတ်ခဲ့ပါတယ်။ 

အယ်ဗာရက် ဒက်ရ်ှကာ (Everett Dutschke) ဟာ စာတွေထဲမှာ ricin အဆိပ်ပါတဲ့ ဇီဝဗေဒ လက်နက် အသုံးပြုမှုနဲ့ စွပ်စွဲခံထားရတာပါ။

အကျဉ်းရုံး ကြားနာစစ်ဆေးမှု တခုအတွင်း သူ့အပေါ် စွပ်စွဲချက်တွေကို နားလည်တဲ့အကြောင်း ဒက်ရ်ှကာ က တရားသူကြီးကို ပြောခဲ့ပြီးတော့ ကြာသပတေးနေ့ နောက်တကြိမ် စစ်ဆေးမှု မတိုင်ခင်အထိ အာမခံ မပေးဖို့ အမိန့် ချမှတ်ခဲ့ပါတယ်။

တကယ်လို့ အပြစ်ရှိတယ်ဆိုရင် သူဟာ ထောင်ဒဏ် တသက် ချမှတ်ခံရမှာ ဖြစ်ပါ တယ်။ ricin အဆိပ်ကို ရှူရှိုက်မိမယ်၊ မျိုချမိမယ်၊ ဆေးထိုးမိမယ်ဆိုရင် အဲ့ဒီလူဟာ သေတဲ့အထိ ဖြစ်နိုင်ပါတယ်။      

Mississippi ဒေသခံဖြစ်တဲ့ ဒက်ရ်ှကာ ကတော့ ပြီးခဲ့တဲ့သီတင်းပတ် သူ့ကို ဖမ်းမိခဲ့တဲ့အချိန်တုန်းက ricin အဆိပ် အကြောင်း သူ ဘာမှ နားမလည်ပါဘူး လို့ ငြင်းဆန်ခဲ့ပါတယ်။

VOA