နစ်ဆန်းကားစက်ရုံများ ပဲခူးတွင်ဆောက်မည်

ပဲခူးတိုင်းဒေသကြီးအတွင်း နစ်ဆန်းမော်တော်ယာဉ် တပ်ဆင်ထုတ်လုပ်ရေး စက်ရုံနှင့် မော်တော်ယာဉ် အစိတ်အပိုင်း ထုတ်လုပ်ရေးစက်ရုံများ တည်ဆောက်မည် ဖြစ်ကြောင်း မြန်မာနိုင်ငံ ရင်းနှီးမြှုပ်နှံမှု ကော်မရှင်ထံမှ သိရသည်။


Tan Chong Motor (Myanmar) က ပဲခူးတိုင်းဒေသကြီးအတွင်း နစ်ဆန်း (Nissan) မော်တော်ယာဉ် တပ်ဆင် ထုတ်လုပ်ရေးစက်ရုံ ရာခိုင်နှုန်းပြည့် နိုင်ငံခြား ရင်းနှီးမြှုပ်နှံမှုဖြင့် တည်ဆောက်မည် ဖြစ်ကြောင်း အဆိုပါကော်မရှင်မှ အရာရှိတစ်ဦးက ပြောကြားသည်။

အဆိုပါကုမ္ပဏီသည် နစ်ဆန်း မော်တော်ယာဉ် အရောင်းပြခန်း Nissan 3S Center ကို ရန်ကုန်မြို့ ပြည်လမ်းတွင် ဇူလိုင်လက စတင်ဖွင့်လှစ်ခဲ့သည်။

Tan Chong Motor Group သည် မလေးရှား၊ ကမ္ဘောဒီးယား၊ ဗီယက်နမ်၊ လာအိုနှင့် မြန်မာနိုင်ငံတို့တွင် နစ်ဆန်း အမှတ်တံဆိပ် မော်တော်ယာဉ်များကို တရားဝင် ဖြန့်ချိခွင့် ရရှိထားသည်။ မြန်မာနိုင်ငံ ရင်းနှီးမြှုပ်နှံမှုကော်မရှင်က ပဲခူးတိုင်းဒေသကြီး အတွင်းတွင်ပင် APM Auto Componants Myanmar ကုမ္ပဏီ၏ ရာနှုန်းပြည့် နိုင်ငံခြား ရင်းနှီးမြှုပ်နှံမှုဖြင့် တည်ဆောက်မည့် မော်တော်ယာဉ် အစိတ်အပိုင်း ထုတ်လုပ်သည့် စက်ရုံကိုလည်း လုပ်ကိုင်ခွင့် ပြုထားကြောင်း ယင်းကော်မရှင်ထံမှ သိရသည်။

မလေးရှားနိုင်ငံအခြေစိုက် APM Auto Componant သည် အိမ်သုံးနှင့် လုပ်ငန်းသုံး မော်တော်ယာဉ်များအတွက် ကားအစိတ်အပိုင်းများ ထုတ်လုပ်နေသော ကုမ္ပဏီတစ်ခု ဖြစ်သည်။

The Voice Weekly