သစ်ခိုးထုတ်မှုများကို သွားရောက် ရှင်းလင်းရာမှ အစိုးရနှင့် ကေအိုင်အေ တပ်တို့ တိုက်ပွဲဖြစ်ပွား

ကချင်ပြည်နယ် ဗန်းမော်ခရိုင်အတွင်း သစ်ခိုးထုတ်မှုများကို သွားရောက်ရှင်းလင်းရာမှ အောက်တိုဘာ ၂၂ ရက်
နံနက်ပိုင်းတွင် အစိုးရနှင့် ကေအိုင်အေတပ်များ ထိပ်တိုက်တွေ့ပြီး တိုက်ပွဲ ဖြစ်ပွားခဲ့ကြောင်း သိရသည်။

တိုက်ပွဲဖြစ်ပွားမှုနှင့် ပတ်သက်ပြီး အစိုးရနှင့် ကေအိုင်အေတို့အကြား ကွဲပြားမှုများ ရှိနေပြီး သစ်ခိုးထုတ်မှုများကို သတင်းရရှိသဖြင့် သွားရောက်ရှင်းလင်းရာမှ တိုက်ပွဲဖြစ်ပွားရခြင်း ဖြစ်သည်ဟု မြောက်ပိုင်းတိုင်း စစ်ဌာနချုပ်မှ တာဝန်ရှိသူ တစ်ဦးက ပြောကြားခဲ့ကာ အစိုးရက ကေအိုင်အေ ထိန်းချုပ်နယ်မြေအတွင်း ၀င်ရောက်လာသဖြင့် တိုက်ပွဲဖြစ် ရခြင်းဖြစ်သည်ဟု မြစ်ကြီးနားအခြေစိုက် ကေအိုင်အို အလုပ်အဖွဲ့ရုံးမှ တာဝန်ရှိသူက ပြောကြားသည်။ တိုင်းရင်းသား သတင်းဌာန အချို့၏ ဖော်ပြချက်တွင်မူ ဗန်းမော်ခရိုင်၊ မန်စီမြို့နယ် အတွင်းရှိ မုန်းဒိန်ပါ ကျေးရွာအနီးရှိ စစ်ပြေးဒုက္ခသည် စခန်းကို အစိုးရတပ်များက တိုက်ခိုက်သိမ်းပိုက် ခဲ့ကြောင်း ဖော်ပြခဲ့သည်။

"ဖြစ်တာကတော့ သစ်ကိစ္စနဲ့ ပတ်သက်ပြီးတော့ ရှင်းတာပေါ့။ သစ်တွေတရားမ၀င် ထွက်နေတယ်ဆိုပြီး သတင်းတွေရတော့ ၀င်ရှင်းတယ်။ တကယ်လည်း ဖမ်းမိပါတယ်။ တန် ၄၀၀ လောက် ဖမ်းမိတယ်။ ကားတွေလည်း မိတယ်" ဟု မြောက်ပိုင်းတိုင်း စစ်ဌာနချုပ်၊ စစ်ဘက်ရေးရာ လုံခြုံရေးဌာနမှ အမည်မဖော်လိုသူ အရာရှိတစ်ဦးက The Daily Eleven သို့ ပြောကြားသည်။

အဆိုပါ နယ်မြေတွင် ယခင်က ကေအိုင်အေတပ်ရင်း အမှတ်(၁၂)အခြေစိုက်ပြီး ၂၀၁၂ ခုနှစ် အတွင်းမှစ၍ အခြေစိုက်စခန်း ဖျက်သိမ်းခဲ့ကာ နေရာဖြန့် လှုပ်ရှားသည့် ဒေသဖြစ်ခဲ့ကြောင်း သိရသည်။ "ကျွန်တော်တို့ သိရသလောက် မနက် ၁၀ နာရီဝန်ကျင်းမှာ ဘရန်ကျုံရွာဟောင်းနားမှာ ဖြစ်တာလို့ သိရတယ်။ ဗန်မော်ခရိုင်၊ မန်စီမြို့နယ်ထဲမှာပါ။ ကေအိုင်အေ တပ်ရင်း(၃) လက်အောက်က တပ်ရင်း ၁၂ နဲ့ဖြစ်တာပါ။ မုန်ဒိန်ပါရွာမှာတော့ မထွက်ပြေးနိုင်တဲ့ ရွာသူရွာသားတွေကို ဘုရားကျောင်း တစ်ခုမှာစုပြီး ဖုန်းတွေသိမ်းတယ်။ ကျွန်တော်တို့ကတော့ မြောက်ပိုင်းတိုင်း စစ်ဌာနချုပ်၊ ဦးအောင်မင်းတို့ဆီကို အမြန်ဆုံး ဖြေရှင်းဖို့ သတင်းပို့ထားပါတယ်။ အောက်တိုဘာ ဆွေးနွေးပွဲ နောက်ပိုင်း နှစ်ကြိမ်မြောက်ဖြစ်တာပါ။ အကျိုးသက်ရောက် မှုကတော့ စစ်တပ်က သိပါတယ်။ အောက်တိုဘာ ဆွေးနွေးပွဲရဲ့ သဘောတူညီချက်တွေကို နှစ်ဖက်စလုံး လေးစားလိုက်နာဖို့ လိုပါတယ်။ ကေအိုင်အေ စစ်မဟာဗျူဟာရုံးကနေ မြောက်ပိုင်းတိုင်း စစ်ဌာနချုပ်ရုံးကို တိုက်ရိုက်ဆက်သွယ်တယ်။ အလုပ်အဖွဲ့ အချင်းချင်းလည်း အကြောင်းကြားပြီး ပြဿနာကို အမြန်ဆုံး ပြေငြိမ်းအောင် ဆောင်ရွက်နေပါတယ်" ဟု မြစ်ကြီးနား အခြေစိုက် ကေအိုင်အို အလုပ်အဖွဲ့ရုံးမှ ဦးဒေါင်ခါးက ပြောကြားခဲ့သည်။

EMG