ယူကရိန်းတွင် စစ်ရေးအရ ၀င်ရောက်စွက်ဖက်မှုကြောင့် အမေရိကန်က ရုရှားနှင့် စစ်ရေးအရ ပူးပေါင်းဆောင်ရွက်မှုကို ရပ်ဆိုင်းလိုက်ကြောင်း ပင်တဂွန်စစ်ဌာနချုပ်က မတ် ၃ ရက်တွင် ထုတ်ပြန်လိုက်ပြီး ပြဿနာကို အရှိန်လျော့ကျအောင် လုပ်ဆောင်ရန် ရုရှားအစိုးရကို တိုက်တွန်းခဲ့သည်။
“ယူကရိန်းမှာ အခုဖြစ်သွားတဲ့ ဖြစ်ရပ်တွေနဲ့ ပတ်သက်ပြီး အမေရိကန်နဲ့ ရုရှားတို့အကြားက စစ်ရေးအရ ထိတွေ့ဆက်ဆံမှုကို ရပ်ဆိုင်းထားလိုက်ပါပြီ” ဟု ရေတပ်ဗိုလ်ချုပ် ဂျွန်ကာဘီက ပင်တဂွန်၏ ကြေညာချက်တွင် ဖော်ပြထားသည်။ ရပ်ဆိုင်းမှုများတွင် စစ်ရေးလေ့ကျင့်မှုများ၊ အပြန်အလှန် တွေ့ဆုံပွဲ များ၊ စစ်သင်္ဘောများ သွားရောက်လည်ပတ်မှုနှင့် ဆွေးနွေးမှုများ စီစဉ်ပြုလုပ်ခြင်းတို့ ပါဝင်ကြောင်း သိရသည်။
အမေရိကန်အစိုးရသည် ယူကရိန်းပြဿနာကို အနီးကပ်စောင့်ကြည့်နေပြီး ခရိုင်းမီးယားဒေသရှိ ရုရှားတပ်ဖွဲ့များသည် ပင်လယ်နက် စစ်သင်္ဘောအုပ်စု ထားရှိရေးဆိုင်ရာ သဘောတူညီချက်များအရ မိမိတို့၏ စစ်စခန်းများသို့ ပြန်သွားကြရန် တိုက်တွန်းခဲ့သည်။ ယူကရိန်းပြဿနာကြောင့် ပင်လယ်နက်နှင့် အခြားနေရာများရှိ မိမိတို့၏တပ်ဖွဲ့များ တပ်စွဲထားသည့် အနေအထားကို ပြောင်းလဲသွားမည် မဟုတ်ကြောင်း ကာဘီက ပြောကြားခဲ့သည်။
“ဥရောပ သို့မဟုတ် မြေထဲပင်လယ်မှာရှိတဲ့ အမေရိကန်တပ်ဖွဲ့တွေကို နေရာပြောင်းရွှေ့ချထားခြင်း မရှိပါဘူး” ဟု ကာဘီက ပြောကြားသည်။ အမေရိကန်ရေတပ် တပ်ဖွဲ့များသည် ဒေသတွင်း မဟာမိတ်များ၊ မိတ်ဖက်နိုင်ငံများနှင့် ပူးပေါင်းကာ ယခင်စီစဉ်ထားသည့် စစ်ဆင်ရေးများနှင့် စစ်ရေးလေ့ကျင့်မှုများကို ပုံမှန်အတိုင်း ဆက်လက်လုပ်ဆောင်နေကြောင်း ၎င်းကပြောကြားသည်။
ယခုအခါ ပင်လယ်နက်တွင် အမေရိကန် ရေတပ်စစ်သင်္ဘော USS Taylor ကိုသာ တပ်စွဲထားပြီး သောင်တင်မှုဖြစ်ပွားပြီးနောက် တူရကီနိုင်ငံ ဆိပ်ကမ်းတစ်ခုတွင် ပြင်ဆင်မှုများ ပြုလုပ်နေကြောင်း သိရသည်။ ယင်းကဲ့သို့ သောင်တင်မှုကြောင့် အဆိုပါသင်္ဘောမှ တပ်မှူးသည် ရာထူးမှ ထုတ်ပယ်ခံခဲ့ရသည်။
ဆက်ဆံရေး တိုးတက်စေရန်နှင့် နားလည်မှု လွဲမှားခြင်းများ မဖြစ်စေရန် အမေရိကန်နှင့် ရုရှားတပ်ဖွဲ့များသည် နှစ်စဉ်ဒါဇင်နှင့်ချီသော ပူးပေါင်းစစ်ရေးလေ့ကျင့်မှုများ၊ အပြန်အလှန် စေလွှတ်မှုများနှင့် တွေ့ဆုံပွဲများ ပြုလုပ်လေ့ရှိသည်။ အမေရိကန်နှင့် ကနေဒါတပ်မှူးများက ၂၀၁၂ ခုနှစ်တွင် ပူးပေါင်းပြုလုပ်ခဲ့သည့် လေကြောင်းလိုင်းမှ ဓားစာခံများအား ကယ်တင်ရေးလေ့ကျင့်မှုများတွင် ရုရှားအရာရှိများ ပါဝင်ခဲ့သည်။
လွန်ခဲ့သောနှစ်များအတွင်းက အာဖဂန်နစ္စတန်သို့ စစ်လက်နက်ပစ္စည်းများအား ရုရှားနယ်မြေပိုင်နက်ကိုဖြတ်လျက် သယ်ယူပို့ဆောင်ရာတွင် အမေရိကန်စစ်တပ်သည် ရုရှားစစ်တပ်၏ အကူအညီများကို ရယူခဲ့ရကြောင်း သိရသည်။
Eleven Media Group
မတ် ၃ ရက်တွင် လီနင်ဂရက်ဒေသရှိ ကီရီလိုစကီ သေနတ်ပစ်ကွင်း၌ စစ်ရေးလေ့ကျင်မှုကို ကြည့်ရှုရန် ရောက်လာသော ရုရှားသမ္မတပူတင် (Photo:AFP)
No comments:
Post a Comment