တာလီဘန် အကြမ်းဖက်သမား ခုနစ်ဦးတို့သည် ပီရှာဝါမြို့ရှိ စာသင်ကျောင်းကို လွန်ခဲ့သည့် ဒီဇင်ဘာလ ၁၆ ရက်နေ့၌ အကြမ်းဖက် ဝင်ရောက်စီးနင်း တိုက်ခိုက်ခဲ့ကြခြင်း ဖြစ်ကာ အဆိုပါဖြစ်စဉ်တွင် အပြစ်မဲ့စာသင်သား ကလေးငယ်ပေါင်း ၁၃၂ ဦးနှင့်အတူ စုစုပေါင်း လူအရေအတွက် ၁၄၅ ဦးခန့် အသက်ဆုံးရှုံးခဲ့ကြရသည်။
အေမာခန်းသည် ပါကစ္စတန်နိုင်ငံသို့ သွားရောက်မည့် ခရီးစဉ်ကို ၎င်း၏ တွစ်တာ လူမှုကွန်ရက် စာမျက်နှာမှ တစ်ဆင့် ထုတ်ပြန်ကြေညာခဲ့ခြင်း ဖြစ်ကာ ဒီဇင်ဘာလ ၂၄ ရက်နေ့တွင် အစပြုခဲ့သည့် ယင်းခရီးစဉ်မှာ ဒီဇင်ဘာလ ၂၉ ရက်နေ့ထိတိုင် ကြာမြင့်လိမ့်မည် ဖြစ်ကြောင်း အေမာခန်းက အသိပေးထားသည်။
အသက် ၂၈ နှစ်အရွယ် ရှိနေပြီဖြစ်သော အေမာခန်းသည် အမေရိကန် လက်ဝှေ့ကစားသမား ဒေဗွန်အလက်ဇန္ဒားကို အနိုင်ရရှိခဲ့သည့် ပွဲစဉ်တွင် ဝတ်ဆင်ခဲ့သော ရွှေ ၂၄ ကာရက် ပါရှိသည့် ကမ္ဘာ့တန်ကြေး အမြင့်ဆုံး အားကစား ဘောင်းဘီတိုကိုလည်း ယခု တိုက်ခိုက်ခံလိုက်ရသည့် စာသင်ကျောင်း ပြန်လည်ထူထောင်ရေး လုပ်ငန်းစဉ်အတွက် လှူဒါန်းထားပြီး ဖြစ်ကာ ပါကစ္စတန်သို့ ရောက်ရှိအပြီးတွင် မြို့တော် အစ္စလာမ်မာဘတ်သို့ ခေတ္တဝင်ရောက်၍ သတင်းစာရှင်းလင်းပွဲ ပြုလုပ်သွားမည် ဖြစ်ကြောင်း ၎င်း၏ ခရီးစဉ်ကို အေမာခန်းက ရှင်းပြထားသည်။
ပါကစ္စတန်နိုင်ငံသို့ ရောက်ရှိလာသည့် အေမာခန်းကို အထူးလုံခြုံရေး အစီအစဉ်တစ်ရပ်နှင့် ကြိုဆိုခဲ့ကာ တာလီဘန် များ၏ အဖျက်အမှောင့် လုပ်ငန်းများကို ပြန်လည်ထူထောင်ရေး လုပ်ငန်းစဉ်များနှင့် ဝိုင်းဝန်း ပံ့ပိုးပေးကြသူများမှာ ၎င်းတို့၏ ပစ်မှတ်သစ်များ ဖြစ်သွားတတ်ကြလေ့ ရှိသည့်အတွက် စိုးရိမ်ထိတ်လန့်မိပါကြောင်းများ မကြာမီကပင် အေမာခန်းက ထုတ်ဖော် ပြောဆိုထားခြင်းကြောင့် အစစအရာရာ စိတ်ချစွာ ဆောင်ရွက်နိုင်စေရန်အတွက် ယခုကဲ့သို့ လုံခြုံရေးပေးလိုက်ခြင်း ဖြစ်သည်ဟု ပါကစ္စတန် အစိုးရအာဏာပိုင်များက ဆိုသည်။
အေမာခန်း မတိုင်မီတွင် ပီရှာဝါရှိ အကြမ်းဖက်ခံရသော စာသင်ကျောင်းထံသို့ လာရောက်၍ ကျောင်းသားမိဘများနှင့် ကျောင်းဝန်ထမ်းများကို နှစ်သိမ့်မှု ပေးသွားခဲ့သည့် အခြားအားကစား အကျော်အမော်တစ်ဦးမှာ ပါကစ္စတန် ခရစ်ကက် လက်ရွေးစင်ဟောင်း အင်မရမ်ခန်းဖြစ်သည်။
The Voice Weekly
No comments:
Post a Comment