ယခင်က ခိုးမှု၊ လုယက်မှုများသာ ရှိရာမှ ယခုအခါ လေးခွကဲ့သိုသော လက်နက်ဖြင့် ပစ်ခတ်လုယက်သည်အထိ ဖြစ်လာသဖြင့်
မန္တလေးတိုင်းဒေသကြီး အစိုးရအဖွဲ့သို့ ဒီဇင်ဘာလ နောက်ဆုံးပတ်အတွင်း အကြောင်းကြားစာ တင်ပြတိုင်ကြားသွားမည် ဖြစ်ကြောင်း အဆိုပါဌာန အကြီးတန်း အရာရှိတစ်ဦးက ပြောကြားသည်။
“အရင်က လူတွေ့ရင် မခိုးဘူး။ အခုကတော့ လူတွေ့ရင် လေးခွနဲ့ပစ်ပြီး ခိုးကြလုကြတဲ့အဆင့် ရောက်လာလို့ တင်ပြရမယ့် အခြေအနေ ဖြစ်လာတယ်” ဟု အဆိုပါ အကြီးတန်းအရာရှိက ဆိုသည်။
အဆိုပါ ဂေါဝိန်ဆိပ်ကမ်း၌ အကြမ်းဖက်သည့် ပုံစံဖြင့် ခိုးမှု၊ လုယက်မှုများကို ကင်းလှည့်သည့် ဆိပ်ကမ်း ရဲတပ်ဖွဲ့ဝင်များနှင့် ဌာနမှ လုံခြုံရေးများကပင် လုံခြုံရေးတာဝန်များ လုပ်ဆောင်ရန် မတတ်နိုင်တော့သဖြင့် မန္တလေးတိုင်းဒေသကြီး အစိုးရအဖွဲ့နှင့် တိုင်းဒေသကြီး ရဲတပ်ဖွဲ့မှူးထံသို့ တင်ပြတိုင်ကြားခြင်း ဖြစ်ကြောင်း ၎င်းက ထပ်မံပြောကြားသည်။
“ရဲတပ်ဖွဲ့ကို အကြောင်းကြားတဲ့အချိန် သူတို့လာကြီးကြပ်တဲ့ ခဏပဲ ဒီလိုအကြမ်းဖက် လုယက်မှုတွေ ငြိမ်သွားတာ၊ ပြီးရင် ပြန်ဖြစ်တာပဲ၊ အဲဒါကြောင့် အာဏာပိုင်တွေက ဆောင်ရွက်မှုတစ်ခုခု လုပ်ပေးမှ ဖြစ်မယ်” ဟု ၎င်းကထပ်မံဆိုသည်။
အဆိုပါ ဆိပ်ကမ်း၌ ခိုးမှုများသည် ယခင်က လူမသိ၊ သူမသိ ခိုးမှုအဆင့်သာရှိပြီး ယခုနှစ် နိုဝင်ဘာလတွင် ဓားပြတိုက်သည့် ပုံစံဖြင့် ခိုးမှုတစ်ကြိမ်၊ ဒီဇင်ဘာလတွင် ခိုးမှု ၂ ကြိမ် ဖြစ်ပွားပြီး ဒီဇင်ဘာလ ၂၆ ရက်နေ့တွင် ဖြစ်ပွားခဲ့သော ခိုးမှုမှာ သင်္ဘောလုံခြုံရေးများ ထိခိုက်မှုရှိခဲ့ပြီး လုယက်သည့် ပစ္စည်းများ ပြန်မရရှိသဖြင့် အမှတ် ၇ ရဲစခန်းသို့က အမှုဖွင့် တိုင်ကြားခဲ့ကြောင်း အထက်ပါအရာရှိက ပြောကြားသည်။
အဆိုပါ ဂေါဝိန်ဆိပ်ကမ်းတွင် ရဲတပ်ဖွဲ့က လှည့်ကင်းများ ဆောင်ရွက်ပေးလျက်ရှိပြီး ရဲစခန်းသို့အမှုဖွင့် တိုင်ကြားခြင်း၊ အကြောင်းကြားစာ ပေးပို့ခြင်းများ ပြုလုပ်ပါက လိုအပ်သည့် အခြေအနေပေါ်လိုက်၍ လုံခြုံရေး အနေအထားများ တိုးမြှင့် ဆောင်ရွက်ပေးသွားမည် ဖြစ်ကြောင်း မန္တလေးတိုင်းဒေသကြီး ရဲတပ်ဖွဲ့မှူးရုံး ဒုတိယရဲမှူးကြီးက ပြောကြားသည်။
The Voice Weekly
0 comments:
Post a Comment