အဆိုပါ ဖယောင်းအနည်းငယ် သုတ်ထားသော ပန်းသီးများကို စားသုံးပါက အဆိပ် မဖြစ်နိုင်သော်လည်း စားသုံးမှု များပြားလာပါက အူပိတ်၍ အော့အန်ခြင်းများ ဖြစ်လေ့ရှိသောကြောင့် အဆိုပါ ဖယောင်း သုတ်ထားသော ပန်းသီးများ စားသုံးမည် ဆိုပါက ရေဆေး အခွံနွှာ၍ စားသုံးသင့်ကြောင်း မန္တလေး ဆရာဝန်များအသင်း အတွင်းရေးမှူး ဒေါက်တာနေဝင်းက ရှင်းပြသည်။
တရုတ်နိုင်ငံမှ တင်သွင်းလာသည့် ပန်းသီး အများစုသည် အမြင်တွင် အလုံး ကြီးထွားပြီး ပြောင်လက်စေရန် ဖယောင်း သုတ်လေ့ရှိကြောင်း ချမ်းအေးသာစံမြို့နယ် မင်္ဂလာဈေးမှ သစ်သီး ရောင်းချသူ တစ်ဦးက ဆိုသည်။
ပြီးခဲ့သည့် ဇန်နဝါရီလဆန်းပိုင်းက မဟာအောင်မြေမြို့နယ်တွင် နေထိုင်သည့် သတ္တမတန်း ကျောင်းသား တစ်ဦးသည် ပန်းသီးကို ရေမဆေးဘဲ စားသုံးပြီးနောက်တွင် အော့အန်ခဲ့ကြောင်း အဆိုပါ ကျောင်းသား၏ မိခင်ဖြစ်သူ ဒေါ်လှခင်က ပြောကြားသည်။
“သားက အော့အန်တော့ ဘာလို့လဲ၊ မတည့်တာတွေ စားမိလား၊ အအေး ပတ်တာလား မေးကြည့်တော့ ကလေးက ဘာမှ အစားမမှားဘူး၊ အအေး မပတ်ဘူး၊ ပန်းသီးစားပြီးမှ ဖြစ်တာဆိုတော့ ပန်းသီးကို အဝတ်နဲ့ သုတ်လိုက်တဲ့ အချိန်မှာ ဖယောင်းတွေ ထွက်လာတယ်” ဟု ဒေါ်လှခင်က ဆိုသည်။
ဖယောင်းသည် ရေနံဆီ အုပ်စုထဲတွင် ပါဝင်သည့်အတွက် အဆိပ်ဖြစ်နိုင်ပြီး အဆိုပါ ဖယောင်း သုတ်ထားသည့် သစ်သီးများကို စားသုံးလိုပါက ရေဆေး၊ အခွံနွှာ၍ စားသုံးသင့်ကြောင်း မန္တလေးပြည်သူ့ဆေးရုံကြီး ဆေးနှင့်လူမှုဆက်ဆံရေး အရာရှိ ဦးမင်းလွင်က ပြောဆိုသည်။
“ပန်းသီးအလုံး အောင်ဖို့အတွက် ပိုးသတ်ဆေးတွေ သုံးရတာတွေရှိတယ်။ အဲဒီ ပိုးသတ်ဆေးရယ်၊ ဖယောင်းရယ် တွေ့ပြီး အော့အန် တာတွေလည်း ဖြစ်နိုင်တယ်” ဟု ဒေါက်တာနေဝင်းက ရှင်းပြသည်။
ဆီးချိုရောဂါရှိသူများ ပန်းသီး စားသုံးပါက ပန်းသီးသည် အချိုဓာတ် ပါဝင်ပြီး ပန်းသီး၏ အခွံများကို စားသုံးပါက ဆီးချို ကျနိုင်ကာ ဆီး၊ ဝမ်း မှန်ကန်မှု ရှိသော်လည်း ဖယောင်းသုတ်ထားမှု ရှိမရှိ သတိထား စားသုံးသင့်ကြောင်း မန္တလေးမြို့တော်ရှိ အထွေထွေရောဂါကု ဆရာဝန်ကြီးများက ပြောကြားသည်။
The Voice Weekly
0 comments:
Post a Comment