ဟောင်ကောင်တွင် လတ်တလော ဖြစ်ပေါ်နေသည့် နိုင်ငံရေး အကျပ်အတည်းများ ပြေလည်နိုင်ရေးအတွက် အစိုးရ၏ အဆိုပြုချက်များကို မဲခွဲဆုံးဖြတ်ပြီး ရွေးချယ်ရန် ဒီမိုကရေစီ အင်အားစုများနှင့် ကျောင်းသားခေါင်းဆောင်များက စီစဉ်ထားသော်လည်း နောက်ဆုံးတွင် ယင်းအစီအစဉ်ကို ဖျက်သိမ်းလိုက်ကြောင်း CNN သတင်းဌာနက ရေးသားဖော်ပြသည်။
ထိုသို့ အစိုးရ၏ အဆိုပြုချက်များကို မဲပေးရွေးချယ်ရန် စီစဉ်ခဲ့သော်လည်း ယင်းကိစ္စအပေါ် သဘောမတူညီမှုများ ထွက်ပေါ်ခဲ့သောကြောင့် မဲမပေးဘဲနေရန် ဆုံးဖြတ်ခဲ့ရခြင်း ဖြစ်ကြောင်း ဆန္ဒပြ ခေါင်းဆောင်များက ပြောကြားသည်။
အစိုးရ၏ ကမ်းလှမ်းချက်များကို အီလက်ထရွန်နစ် စနစ်ဖြင့် မဲပေးရွေးချယ်ကြရန် စီစဉ်ခဲ့ကြခြင်း ဖြစ်သော်လည်း မဲပေးမည့် အစီအစဉ် မစတင်မီ နာရီပိုင်းအလိုတွင် ဖျက်သိမ်းခဲ့ကြခြင်း ဖြစ်သည်။
ဟောင်ကောင် ဆန္ဒပြ ကျောင်းသားခေါင်းဆောင်များနှင့် အစိုးရ အရာရှိကြီးများသည် ပြီးခဲ့သည့် အင်္ဂါနေ့တွင် တွေ့ဆုံဆွေးနွေးမှု ပြုလုပ်ခဲ့ကြကြောင်း၊ ရုပ်သံမှ တိုက်ရိုက်ထုတ်လွှင့်ခဲ့သည့် ယင်းဆွေးနွေးပွဲမှာ နိုင်ငံရေး ပဋိပက္ခများအတွက် တိုးတက်ဖြစ်ထွန်းမှု အနည်းငယ်မျှသာ ဆောင်ကြဉ်းပေးနိုင်ခဲ့သည်။
ဟောင်ကောင် အစိုးရကိုယ်စားလှယ် ကယ်ရီလမ်က ဆန္ဒပြသူများ၏ တောင်းဆိုမှုများကို တရုတ်ဗဟိုအစိုးရထံသို့ အစီရင်ခံ တင်ပြပေးမည် ဖြစ်ကြောင်း၊ ရှေ့လျှောက် အခြေခံဥပဒေ ပြင်ဆင်ရေးဆွဲရေး အတွက် ဆွေးနွေးပွဲ ပြုလုပ်နိုင်မည့် အနေအထားတစ်ခု ဖန်တီးပေးမည် ဖြစ်ကြောင်း ဆန္ဒပြ အင်အားစုများကို ကမ်းလှမ်းခဲ့သည်။
အဆိုပါ ကမ်းလှမ်းချက်များကို ကျောင်းသားခေါင်းဆောင်များနှင့် ဒီမိုကရေစီ အင်အားစုများက ဦးစွာငြင်းပယ်ခဲ့ပြီးမှ အီလက်ထရွန်နစ်စနစ် အသုံးပြုကာ မဲခွဲဆုံးဖြတ်ရန် စဉ်းစားခဲ့ကြခြင်း ဖြစ်သည်။
“မဲပေးမယ့် အစီအစဉ်ကို အရေးပေါ် လုပ်ဆောင်နေရတယ်လို့ ကျွန်တော်တို့ ထင်မှတ်ခဲ့ကြတယ်။ အဲဒါကြောင့် အဲဒီအစီစဉ်ကို စွန့်လွှတ်ဖို့ ဆုံးဖြတ်လိုက်ကြတာပါ။ ဒါပေမဲ့ အဲဒီလို ဆုံးဖြတ်တာဟာ ဆန္ဒပြမှု အဆုံးသတ်လိုက်တယ်ဆိုတဲ့ သဘောမျိုး မဟုတ်ပါဘူး” ဟု ဟောင်ကောင် ဆန္ဒပြခေါင်းဆောင်တစ်ဦး ဖြစ်သူ ဘန်နီတန်က ပြောကြားသည်။
လက်ရှိ အနေအထားတွင် ဆန္ဒပြသူဦးရေ လျော့ကျလာပြီ ဖြစ်သော်လည်း ပင်မခေါင်းဆောင်များနှင့် နိုင်ငံရေး အင်အားစုများက ဟောင်ကောင်၏ အဓိကျသော နေရာများအား သိမ်းပိုက်ရယူထားမှုကို စွန့်လွှတ်မည် မဟုတ်ဟု ဆိုကြသည်။
ဟောင်ကောင်ကျောင်းသားများနှင့် ဒီမိုကရေစီ အင်အားစုများက လာမည့် ၂၀၁၇ ခုနှစ် ဒီမိုကရေစီ ရွေးကောက်ပွဲအတွက် တရုတ်ပြည်မကြီး အစိုးရ၏ သတ်မှတ်ပြဋ္ဌာန်းချက်များကို ပြန်လည်ပြင်ဆင်ပေးရန်နှင့် ဟောင်ကောင် အကြီးအကဲ လီချန်ယင်းအား နုတ်ထွက်ပေးရန် တောင်းဆိုခဲ့ကြသည်။
The Voice Weekly
0 comments:
Post a Comment