အမေရိကန်၊ ဥရောပသမဂ္ဂနှင့် သြစတြေးလျနိုင်ငံများသို့ ကြားနေအဖွဲ့အစည်းမှ တစ်ဆင့် တရားဝင် သစ်တင်ပို့ခွင့် ယာယီအားဖြင့် နှစ်နှစ်ခွင့်ပြု

မြန်မာ့သစ်လုပ်ငန်းအား အမေရိကန်၏ အရေးယူပိတ်ဆို့မှုမှ ပယ်ဖျက်ထားခြင်း မရှိသဖြင့် အမေရိကန်၊ ဥရောပသမဂ္ဂနှင့် သြစတြေးလျ နိုင်ငံများသို့ တရားဝင် သစ် တင်ပို့နိုင်ရန်အတွက် ကြားနေအဖွဲ့အစည်း မှတစ်ဆင့် သစ်တင်ပို့ခွင့် ယာယီအားဖြင့် နှစ်နှစ် ခွင့်ပြုထားကြောင်း စက်တင်ဘာ ၁၉ ရက်က ပြုလုပ်သည့် မြန်မာနိုင်ငံ သစ်တောထွက်ပစ္စည်း လုပ်ငန်းရှင်များ အသင်းချုပ်၊ IWPA,ETTFနှင့် ATIF ကိုယ်စားလှယ်များနှင့် စီးပွားရေးဆိုင်ရာ အခွင့်အလမ်းများ အလွတ်သဘော တွေ့ဆုံဆွေးနွေးပွဲတွင် မြန်မာနိုင်ငံ သစ်တောထွက်ပစ္စည်း လုပ်ငန်းရှင်များ အသင်းချုပ် ဥက္ကဋ္ဌ ဒေါက်တာ စိန်ဝင်းက ပြောကြားသည်။

“တချို့ကလည်း မြန်မာ့ သစ်လုပ်ငန်းကို ပိတ်ဆို့ အရေးယူမှု စာရင်းကနေ ထုတ်ပစ်လိုက်တယ်လို့ ထင် ကြတယ်။ အမှန်ကတော့ မဟုတ်ပါဘူး။ အဲဒါ ကျွန်တော်ပြောတဲ့စကား မဟုတ်ပါဘူး။ ၀န်ကြီးဌာနက ပြော တဲ့စကားပါ။ အခုလာတဲ့ အဖွဲ့က ပုဂ္ဂလိက အဖွဲ့အစည်းပါ။ အမေရိကန်နိုင်ငံက သစ် ၀ယ်ချင်တယ်ဆိုရင် နိုင်ငံတကာ IWPA မှာပဲ လိုင်စင် ပေးတယ်ဆိုတဲ့ သဘောပေါ့။ အမေရိကန် အစိုးရက မြန်မာ့သစ်လုပ်ငန်းကို အရေးယူ ပိတ်ဆို့မှု စာရင်းကနေ ပယ်ဖျက်တယ်ဆိုတဲ့ အဓိပ္ပာယ် မသက်ရောက်ပါဘူး။ IWPA အဖွဲ့ ၀င်သာလျှင် လိုင်စင်ရမယ်။ သူတို့သာလျှင် မြန်မာနိုင်ငံက သစ်ဝယ်လို့ ရမှာဖြစ်ပါတယ်။ အမေရိကန် နိုင်ငံမှာရှိတဲ့ ကုမ္ပဏီတိုင်းက တိုက်ရိုက်ဝယ်လို့ မရပါဘူး။အရေးယူ ပိတ်ဆို့မှု စာရင်းထဲမှာ ရှိနေတာဟာ နိုင်ငံရေး ပြဿနာပါ။ စီးပွားရေးအရ Section ရှိနေတဲ့အခါမှာ ၀ယ်ယူလို့ မရဘူးလား ဆိုတဲ့အခါမှာ ယာယီ အားဖြင့် ဒီလို နှစ်နှစ်ပေးတာ ဖြစ်ပါတယ်” ဟု ဒေါက်တာစိန်ဝင်းက ပြောကြားသည်။
ယခုကဲ့သို့ တင်ပို့ရာတွင် သစ် အချောထည် သာမကဘဲ တရားဝင် သစ်အားလုံးကို တင်ပို့ သွားမည်ဖြစ်ပြီး တရားမ၀င် သစ်များကို ၀ယ်ယူ သွားမည်မဟုတ်ကြောင်း ဒေါက်တာစိန်ဝင်းက ပြောကြားသည်။
“ သူတို့က သစ်ချောထည်ကြီးပဲ မဟုတ်ဘူး။ Sustainablet Forest က တရားဝင်သစ်တွေကို ၀ယ်ချင်ပါတယ် ပြောတယ်။ အဲဒီအတွက် လာဆွေးနွေးတာ ဖြစ်ပါတယ်။ အစိုးရနဲ့ ဆွေးနွေးတဲ့အခါမှာ နားလည်မှု ရတယ်။ ကျွန်တော်တို့ဆီကသူတွေ ဒီနိုင်ငံတွေကို ပို့လို့ရတော့မှာ ဖြစ်ပါတယ်။ ပို့တဲ့အခါ အသေးစိတ် အချက် အလက်တွေ ဖြစ်ဖုိ့လိုတယ်။ တရားမ၀င် သစ်တွေကိုတော့ ၀ယ်မှာမဟုတ်ပါဘူး”ဟု မြန်မာနိုင်ငံ သစ်တောထွက်ပစ္စည်း လုပ်ငန်းရှင်များ အသင်းချုပ် ဥက္ကဋ္ဌ ဒေါက်တာစိန်ဝင်းက ပြောကြားသည်။
အမေရိကန်နိုင်ငံ International Wood Products Association က မြန်မာနိုင်ငံမှ ကျွန်းသစ် ထုတ်ကုန်များကို စိတ်ဝင်စားကြောင်း၊ မြန်မာနိုင်ငံနှင့် သစ်တောထွက် ပစ္စည်းများ တင်ပို့မှု လုပ်ဆောင်နိုင်ရန်အတွက် တာဝန်ယူမှုရှိသည့် ကုန်သွယ်မှု ဖြစ်ပေါ်လာနိုင်ရန် ဆောင်ရွက်ထားကြောင်းနှင့် မြန်မာ့ သစ်လုပ်ငန်းနှင့် တိုက်ရိုက် ကုန်သွယ်ခွင့် ရရှိရန်အတွက် အမေရိကန်အစိုးရ၏ ခွင့်ပြုချက်လည်း လိုအပ်ကြောင်း  International Wood Products Association မှ  Executive Director Ms. Cindy Squiresက ဆိုသည်။
“မြန်မာနိုင်ငံနဲ့ ပုံမှန်အတိုင်း ကုန်သွယ်နိုင်ဖို့ အထူးသဖြင့် သစ်တောထွက် ပစ္စည်းတွေ၊ သစ်တင်ပို့မှုတွေ လုပ်ဆောင်နိုင်ဖို့ ကျွန်မတို့အနေနဲ့ တာဝန်ယူမှုရှိတဲ့ ကုန်သွယ်မှု ဖြစ်ပေါ်လာနိုင်အောင် အစီအစဉ်တစ်ခု ပူးပေါင်း လုပ်ဆောင်နိုင်အောင် အကြံပြုထားပါတယ်။ ဒါမှ ကျွန်မတို့နဲ့ တိုက်ရိုက် ကုန်သွယ်နိုင်မှာ ဖြစ်ပါတယ်။ မြန်မာအနေနဲ့ ပိတ်ဆို့အရေးယူခံရမှုဟာ အရေအတွက် တစ်ခုအထိ ရှိနေပါသေးတယ်။ မြန်မာ့သစ်လုပ်ငန်းနဲ့ တိုက်ရိုက် အလုပ်လုပ်ကိုင်ဖို့ ကျွန်မတို့အစိုးရရဲ့ ခွင့်ပြုမှုရရှိဖို့ လိုပါသေးတယ်”ဟု Ms. Cindy Squires က ဆိုသည်။
အမေရိကန် အစိုးရအနေဖြင့် မြန်မာ့သစ်လုပ်ငန်းအား အရေးယူ ပိတ်ဆို့ထားသော်လည်း သစ်တင်ပို့မှုအား အကန့်အသတ်ဖြင့် ခွင့်ပြုပေးထားကြောင်း၊ လက်ရှိတွင် မြန်မာ့ သစ်လုပ်ငန်းနှင့် အမေရိကန် အစိုးရတို့ ဆွေးနွေးမှုများ ပြုလုပ်လျက်ရှိကြောင်း Ms. Cindy Squires က ဆက်လက်ပြောကြားသည်။
“အမေရိကန် အစိုးရက ပိတ်ဆို့ အရေးယူထားတဲ့အထဲမှာ မြန်မာ့သစ်လုပ်ငန်းက ပါဝင်နေပါတယ်။အခုအချိန်ဟာ တဖြည်းဖြည်း ပုံမှန်အတိုင်း ပြန်ဖြစ်အောင် လုပ်ဆောင်နေတဲ့ အချိန်လဲဖြစ်ပါတယ်။အဲဒီလို လုပ်ဆောင်နေတာရဲ့ အစိတ်အပိုင်း အဖြစ် အမေရိကန်အစိုးရက အကန့် အသတ်နဲ့ ခွင့်ပြုပေးနေပါတယ်။ ဒါကလည်း ပြုပြင်ပြောင်းလဲမှုကို အထောက်အကူ ပြုအောင် လုပ်ပေးနေတဲ့ သဘောပါ။ မြန်မာ့ သစ်လုပ်ငန်းနဲ့ အမေရိကန် အစိုးရတို့ ဆွေးနွေးနေပါတယ်။ ဒါကလည်း မြန်မာ့ သစ်လုပ်ငန်းကို Section List ထဲ ကနေ ထုတ်ပေးနိုင်မလား၊ မထုတ် ပေးနိုင်ဘူးလားဆိုတဲ့ ကိစ္စတွေပါ “ ဟု Ms. Cindy Squires က ပြောကြားသည်။
 

 

Credit To >>> Eleven Media Group