ဝန်ဆောင်ခ ကျပ်ခြောက်သောင်းကျော်ဖြင့် ထိုင်းသို့ လုပ်သား ပို့ဆောင်မည်

မြန်မာနိုင်ငံမှ ထိုင်းနိုင်ငံသို့ လုပ်သား စေလွှတ်ရာတွင် ဝန်ဆောင်ခငွေကို ကျပ် တစ်သိန်းခွဲ ကောက်ခံခဲ့ရာမှ ကျပ် ၆၅၅ဝဝ ဖြင့်သာ အလုပ်သမား ပို့ဆောင်မည်ဖြစ်ကြောင်း ရွှေ့ပြောင်း အလုပ်သမား အခွင့်အရေး ကွန်ရက် (M.W.R.N) မှ ဥက္ကဋ္ဌ ဦးစိန်ဌေးက ပြောကြားသည်။

သြဂုတ်လ ၂ဝ ရက်က မြောက်ဒဂုံမြို့နယ် အလုပ်သမား သင်တန်းကျောင်းတွင် ပြုလုပ်သော “ထိုင်းနိုင်ငံသို့ MoU စနစ်ဖြင့် အလုပ်သမား စေလွှတ်ရေး လုပ်ငန်းစဉ်တွင် အခမဲ့ ဝန်ဆောင်မှု ဖြစ်စေရေး ဦးတည် ဆောင်ရွက်နေမှု အခြေအနေနှင့် စပ်လျဉ်း၍ ရှင်းလင်းပွဲ”တွင် အထက်ပါအတိုင်း ပြောကြားခြင်း ဖြစ်သည်။

“ထိုင်းနိုင်ငံကို မြန်မာအလုပ်သမား စေလွှတ်မှုမှာ အလုပ်သမားဘက်က ကျခံရတဲ့ ကုန်ကျစရိတ်ကို လုပ်ငန်းရှင်က မျှခံ ကုန်ကျပေးဖို့ ကျန်ရှိနေသေးတဲ့ လုပ်ငန်း အစုအဖွဲ့တွေနဲ့လည်း ဆွေးနွေးနေတယ်။ အလုပ်သမားတွေက ကုန်ကျစရိတ် နည်းရင် တရားဝင် သွားမယ်။ ဒါဆို ဖြစ်နေတဲ့ ပြဿနာတွေလည်း နည်းသွားမယ်”ဟု ဦးစိန်ဌေးက ဆိုသည်။

ထိုင်းနိုင်ငံသို့ သွားရောက် လုပ်ကိုင်မည့် မြန်မာ အလုပ်သမားများ အနေနှင့် နိုင်ငံကူး လက်မှတ်ကြေး၊ စာရွက်စာတမ်းကြေးနှင့် ခရီးစရိတ်များ ပေးရမည်ဖြစ်ပြီး ထိုင်းလုပ်ငန်းရှင်က ဗီဇာကြေး ဆေးစစ်ခနှင့် အလုပ်အကိုင် ပါမစ်ကြေးတို့ကို ကျခံမည်ဖြစ်သည်။

ကုန်ကျစရိတ် မျှခံ ကုန်ကျမှုကို လက်ရှိတွင် ထိုင်းနိုင်ငံမှ ပင်လယ်စာ ထုတ်လုပ် တင်ပို့နေသည့် Thai Union Group နှင့် ပူးပေါင်း ဆောင်ရွက်ခြင်းဖြစ်ကြောင်း၊ ကျန်ရှိနေသေးသော အလုပ်ရှင်များနှင့်လည်း အဆိုပါစနစ် အကောင်အထည် ဖော်နိုင်ရန် ဆက်လက် ညှိနှိုင်းသွားမည် ဖြစ်ကြောင်း ရွှေ့ပြောင်း အလုပ်သမား အခွင့်အရေး ကွန်ရက်ထံမှ သိရသည်။ 

“ပြည်ပကို အလုပ်သမား စေလွှတ်တဲ့အခါမှာ သက်သက်သာသာနဲ့ သွားဖို့ နောက်ဆုံး အခမဲ့ ဝန်ဆောင်မှု ဖြစ်ဖို့အတွက် အေဂျင်စီတွေနဲ့ရော၊ လုပ်ငန်းရှင်တွေကိုရော ဆွေးနွေးခဲ့တာပါ။ အခုက အစိုးရမှာ သတ်မှတ်ချက်က တစ်သိန်းခွဲ ဖြစ်ပေမယ့် လျှော့ယူမယ်ဆိုတော့ အလုပ်သမားတွေအတွက် ပိုကောင်းသွားတယ်”ဟု အလုပ်သမား၊ လူဝင်မှု ကြီးကြပ်ရေးနှင့် ပြည်သူ့အင်အား ဝန်ကြီးဌာန အမြဲတမ်း အတွင်းဝန် ဦးမျိုးအောင်က ဆိုသည်။

အဆိုပါ Thai Union Group အောက်တွင် စက်ရုံ ကိုးရုံရှိပြီး လက်ရှိတွင် ရွှေပြောင်းလုပ်သား လေးသောင်းကျော်ကို အလုပ် ပေးထားသည်။

လက်ရှိတွင် အဆိုပါ ဝန်ဆောင်ခ နှုန်းဖြင့် လုပ်သား စေလွှတ်ရာတွင် လုပ်သား နှစ်ထောင်ခန့် ရှိပြီဖြစ်ကြောင်း၊ ထိုသို့ အလုပ်ရှင်မှ ကုန်ကျစရိတ် မျှခံမှု စနစ်ကို စောင့်ကြည့်ကာ လိုအပ်သော ပညာပေးမှုများကို ထပ်မံ ပြုလုပ်မည်ဖြစ်ကြောင်း ရွှေ့ပြောင်း အလုပ်သမား အခွင့်အရေး ကွန်ရက်(M.W.R.N)ထံမှ သိရသည်။

Credit To >>> The Voice Weekly