မန္တလေးတိုင်းအတွင်း လူဦးရေ လေးသောင်းကျော်သာ ဝင်ငွေခွန်ဆောင်ဟုဆို

17-2-2014

မြန်မာနိုင်ငံ အထက်ပိုင်းတွင် စီးပွားရေး ဖွံ့ဖြိုးမှု အရှိန်မြင့်တက်လာသော တိုင်းတစ်တိုင်းဖြစ်သည့် မန္တလေးတိုင်းဒေသကြီးတွင် လူဦးရေသိန်း ၆၀ အနက် ဝင်ငွေ ခွန်ဆောင်သည့် လူဦးရေမှာ ၄၄,၈၉၂ ဦးသာ ရှိကြောင်း မန္တလေးတိုင်းဒေသကြီး ဝန်ကြီးချုပ် ဦးရဲမြင့်က ဖေဖော်ဝါရီလ ၁၄ ရက်နေ့တွင် မြို့တော်ခန်းမ၌ ကျင်းပသော မြို့ခံအခွန်ထမ်း ပြည်သူများနှင့် အခွန်ကိစ္စ ရှင်းလင်းပွဲတွင် ပြောကြားသည်။
မန္တလေးတိုင်းဒေသကြီးအတွင်း တိုင်းဒေသကြီး၏ ဖွံ့ဖြိုးမှု GDP အချိုးနှင့် ဝင်ငွေခွန်ဆောင်သည့် လုပ်ငန်းများမှ ဝင်ငွေခွန် အခွန်ကောက်ခံရရှိမှု အနေအထား နှိုင်းယှဉ်ကြည့်လျှင် ၂၀၁၂ -၂၀၁၃ ခုနှစ်တွင် ၀ ဒသမ ၂၅ ရာခိုင်နှုန်းသာ ရှိကြောင်း၊ တိုင်းအစိုးရ အနေနှင့် လူထုအတွက် လိုအပ်နေသည့် ရေ၊ မီး၊ လမ်းပန်း ဆက်သွယ်ရေးနှင့် အခြားလူထုနှင့် သက်ဆိုင်သော ဝန်ဆောင်မှု လုပ်ငန်းများ ဆောင်ရွက်နိုင်ရန် စီးပွားရေး မောင်းနှင်အားဖြစ်သည့် အခွန်စနစ် ပီပြင်ရန် လိုအပ်နေကြောင်း ၎င်းကဆက်လက် ပြောကြားသည်။

အခွန်စနစ် ပီပြင်မှသာလျှင် အလုပ်အကိုင် ဖန်တီးမှုနှင့် လူနေမှု အဆင့်အတန်း မြင့်မားလာမည် ဖြစ်သောကြောင့် နိုင်ငံတော် အစိုးရက သတ်မှတ်သည့် အခွန်နှုန်းထားများ ပေးဆောင်ရန် တာဝန်ရှိသည့်အပြင် အခွန်ဆောင်သည့်အတွက် အခွင့်အရေးနှင့် မက်လုံးများပါ ဒွန်တွဲလာမည်ဟု ဆိုသည်။
“အခွန်စနစ်ပီပြင်မှ နိုင်ငံရဲ့ စီးပွားရေး အသွင်ကူးပြောင်းမှု ကောင်းမွန်စွာ ဆောင်ရွက်နိုင်မယ်” ဟု ၎င်းကဆိုသည်။

ပြည်တွင်း အခွန်ဦးစီးဌာန အနေနှင့် နေ့စဉ်နေ့တ်ိုင်း အခွန်ထမ်းအသစ်များ ပေါ်ပေါက်လာအောင် ဆောင်ရွက်နေသည့် လုပ်ငန်းစဉ်များ ရှိကြောင်းနှင့် အခွန်နှင့် ပတ်သက်သည့် အသိပညာပေး ရှင်းလင်းမှုများလည်း ဆောင်ရွက်ပြုလုပ်နေကြောင်း မန္တလေးတိုင်းဒေသကြီး ပြည်တွင်းအခွန်များ ဦးစီးဌာန တိုင်းဦးစီးမှူး ဦးသန်းဇော်ဝင်းက ပြောကြားသည်။

တိုင်းဒေသကြီးအစိုးရက မန္တလေးတိုင်းဒေသကြီးအတွင်း ဘဏ္ဍာနှစ်အလိုက် ကောက်ခံရရှိသည့် အခွန်ငွေများနှင့် ပတ်သက်ပြီး သုံးစွဲပုံ သုံးစွဲနည်းများကို မန္တလေးတိုင်းအတွင်းရှိ လွှတ်တော် ကိုယ်စားလှယ်များက လည်းကောင်း၊ အစိုးရအဖွဲ့ တာဝန်ရှိသူများက လိုက်လံရှင်းပြသည့် နည်းဖြင့် လည်းကောင်း မီဒီယာများမှတစ်ဆင့် ပွင့်လင်းမြင်သာစွာ ချပြခြင်းဖြင့် ပြည်သူများ တာဝန်သိသိနှင့် အခွန်ထမ်းဆောင်ခြင်းများ ဖြစ်ပေါ် လာစေရန် စည်းရုံးသင့်သည်ဟု တိုင်းဒေသကြီး အစိုးရအဖွဲ့မှ အခွန်ကိစ္စ ရှင်းလင်းပွဲကို တက်ရောက်လာသည့် မန္တလေးမြို့ခံ ကုန်သည်အချို့က ပြောကြားသည်။

“တိုင်းအတွင်း အခွန်ထမ်းဆောင်သူ ဦးရေနည်းတာက အခွန်စနစ် မပီပြင်လို့ပေါ့။ ပီပီပြင်ပြင် ဖြစ်အောင် အခွန်ဥပဒေပြင်ဆင်မှု လုပ်နေတယ်ဆိုတာ သိထားတယ်” ဟု အခွန်စနစ်နှင့် ပတ်သက်ပြီး သုတေသန ပြုလုပ်နေသော မန္တလေးမြို့ခံ စာရေးဆရာ ဦးဝင်းဖေမောင်က ဆိုသည်။

မန္တလေးတိုင်းဒေသကြီး အစိုးရအဖွဲ့မှ တိုင်းအတွင်းရှိ ပြည်သူများထံမှ ကောက်ခံရရှိသည့် အခွန်ငွေများဖြင့် ၂၀၁၂ခု-၂၀၁၃ ခုနှစ် ဘဏ္ဍာငွေတွင် ဖွံ့ဖြိုးရေးလုပ်ငန်းအတွက် ကျပ်သန်းပေါင်း ၈၂ ဘီလီယံ အသုံးပြုခဲ့ပြီး လာမည့် ဘဏ္ဍာရေးနှစ် ဖြစ်သည့် ၂၀၁၄-၁၅ ဘဏ္ဍာရေးတွင် ကျပ်သန်းပေါင်း ၁၄၂ ဘီလီယံ အသုံးပြုရန် အစီအစဉ်ရှိကာ မန္တလေးတိုင်းဒေသကြီးအတွင်း မြို့နယ်ပေါင်း ၃၁ မြို့နယ် ရှိကြောင်း တိုင်းဒေသကြီး အစိုးရအဖွဲ့ထံမှ စုံစမ်းသိရှိရသည်။

The Voice Weekly
http://www.themeltingpot4u.com/2014/02/blog-post_3956.html