တပ်မတော်၏ သွားလာမှုကို KNU/KNLA (PC) က တုံ့ပြန် ထိန်းချုပ်မှု ပြုလုပ်

တပ်မတော်၏ သွားလာမှုကို KNU/KNLA (PC)  မှ စက်တင်ဘာလ (၁၇) ရက် နေ့စွဲဖြင့် ကြေညာချက် တစ်စောင် ထုတ်ပြန်ကာ အပြင်းအထန် တားမြစ်မှု ပြုလုပ်ခဲ့သည်။  ထိုင်းနိုင်ငံသို့ သွားရောက် လုပ်ကိုင်သည့် မြန်မာလုပ်သားများအား ထိုင်းရဲများ ငွေကြေး တောင်းခံမှုနှင့် ပတ်သက်၍ ယခုလ (၁၃) ရက် နေ့တွင် မြ၀တီမြို့၌ KNU/KNLA (PC)  က ထိုင်းနိုင်ငံမှ ၀င်ရောက် လာသော ကုန်တင် ယာဉ်အစီး (၃၀) အား လက်နက်ကိုင်၍ တားဆီးခဲ့ သည်။ ယင်းအတွက်ကြောင့် မြ၀တီမြို့တွင် တိုင်းရင်းသား လက်နက်ကိုင်များ လက်နက်ကိုင် ခွင့်မပြုကြောင်း အာဏာပိုင်များက ထုတ်ပြန်ခဲ့ ပြီးနောက် ယခုကဲ့သို့ KNU/KNLA က ပြန်လည် တုံ့ပြန် ထုတ်ပြန်ခြင်း ဖြစ်သည်။ အဆိုပါ ကြေညာချက်အား KNU/KNLA ၊ DKBA ၊ DKBA ကလို့ထူးဝါး၊ DKBA  ကလို့ထူးလား၊ တပ်မတော် ကာကွယ်ရေး ဦးစီးချုပ်၊ ပြည်ထောင်စု ၀န်ကြီးနှင့် နိုင်ငံတော်သမ္မတထံသို့ လိပ်မူပို့ထားသည်။

ကရင်ပြည်နယ် အတွင်း မြန်မာအစိုးရ စစ်တပ်မှ တပ်ရင်းတပ်ဖွဲ့၊ လက်အောက်ခံ တပ်ဖွဲ့ ဝင်များ အားလုံးသည် စစ်ယူနီဖောင်း၊ စစ်လက်နက်၊ လူအင်အားသုံး၍ မြို့တွင်းသို့ ၀င်ရောက်လာခြင်းကို တွေ့မြင်ရ ခြင်းကြောင့် ပြည်သူလူထုမှ စိုးရိမ် ထိတ်လန့်မှုများကို ဖြစ်ပေါ်စေကြောင်း ကြေညာချက် တွင် ဖော်ပြထားသည်။

အစိုးရအဖွဲ့ကထုတ်တဲ့ ကြေညာချက်မှာ တပ်ဖွဲ့ဝတ်စုံတွေ မ၀တ်နဲ့။ လက်နက်တွေ ကိုင်မသွားရဘူးလို့ ပါတယ်။အဲဒါဆို အစိုးရတပ်ကလည်း လက်နက်ကိုင်ပြီး မြို့ထဲကို မ၀င်နဲ့ လက်နက်ကိုင်ပြီး မြို့ထဲကို မလာနဲ့။ တန်းတူအခွင့်အရေးပဲ ဖြစ်ရမယ် ဟု KNU/KNLA (PC) မှ ပြန်ကြားရေး တာဝန်ခံ ဦးစောမင်းဝေ က The Messenger Mediaသို့ ပြောသည်။ တပ်မတော် တပ်ရင်းတပ်ဖွဲ့များ အနေဖြင့် ပြည်သူ၏ အကျိုးကို ရှေးရှုလိုပါက ၀ိုင်းဝန်းကူညီ ဆောင်ရွက်သင့်ပြီး ငြိမ်းချမ်းရေး မူဝါဒများ အတိုင်း လိုက်နာ ဆောင်ရွက်သင့်ကြောင်း ၎င်းက ဆက်လက် ပြောသည်။

တပ်မတော်သားများ အရေးကြီး ကိစ္စဖြင့် သွားလာလိုပါက သက်ဆိုင်ရာ ရှေ့တန်း ရုံး၊ စရဖရုံးများမှ တစ်ဆင့်  နယ်စပ် လုံခြုံရေး (အထူး) ဗျူဟာမှူးကြီး တိုက်ဂါး ထံသို့ ဦးစီး ခေါင်းဆောင်၊ အင်အား၊ လက်နက် အမျိုးအစား၊ အရေအတွက်၊ ယာဉ် အမျိုးအစား အရေအတွက်နှင့် သွားလာမည့် နေရာ အချိန်တို့ကို ကြိုတင် အကြောင်းကြား ခွင့်ပြုချက် ရယူပြီးမှ သာသွားလာရ မည်ဟု ထုတ်ပြန်ထားသည်။ ထိုပြင် မြို့ဝင်မြို့ထွက်ရှိ တိုင်းရင်းသား လက်နက်ကိုင် လုံခြုံရေး ကင်းစခန်းများမှ လုံခြုံရေးအရ ရပ်တန့် စစ်ဆေး မေးမြန်းခြင်း ရှိပါက ကြည်ဖြူ ကျေနပ်စွာ လက်ခံစေလို ကြောင်းလည်း အသိပေးထားသည်။

ဒီလို စာထုတ်တာတွေက ရိုးနေပါပြီ၊ တစ်နေ့ လာလည်း ဒီစကားပဲ ကြားနေရတာပဲ၊ ဒါတွေက ပြဿနာပေါ်မှာ အခြေခံပြီး ဖြစ်လာတာပါ၊ အပေါ်ဘက်ကတော့ စည်းကမ်းတကျ နဲ့သွားလာပေမယ့် တစ်ခါတလေ အောက်ခြေ ရဲဘော်တွေ ကတော့ မှားတာလည်း ရှိပါတယ်၊ လောလောဆယ် အကြောင်းကြားထားတဲ့ စာတော့ အခုထိ မရောက်လာသေးပါဘူး ဟု မြ၀တီ အခြေစိုက် (DKBA) မှ ပြန်ကြားရေး တာဝန်ခံဗိုလ်ကြီး စောစိုးမြင့်က ပြောသည်။

စက်တင်ဘာ (၁၄) ရက်နေ့တွင် တပ်မတော်ခြေလျင် တပ်ရင်း(၂၇၅) မှ မြ၀တီမြို့ အတွင်း သွားလာနေသည့် တိုင်းရင်းသား လက်နက်ကိုင် တပ်ဖွဲ့များ အားလုံးကို ယူနီဖောင်းနှင့် လက်နက်ကိုင်ဆောင်မှု မပြုလုပ်ရန် ကရင် အမျိုးသား အစည်းအရုံး (KNU)၊ ဒီမိုကရေစီ  အကျိုးပြု  ကရင့် တပ်မတော် (DKBA)၊ ကရင်အမျိုးသား အစည်းအရုံး/ ကရင် အမျိုးသား တပ်မတော် (ငြိမ်းချမ်းရေး ကောင်စီတို့သို့ပေးပို့ အသိပေး အကြောင်းကြား ထားကြောင်း ပြည်တွင်း မီဒီယာများတွင် ဖော်ပြထားသည်။

သူတို့ ဧရိယာထဲကို သွားရင်တော့ အစိုးရ ထုတ်ပြန်ထားတဲ့ စည်းကမ်းကို လိုက်နာရမှာပဲ။ မြ၀တီမြို့မှာ ဖြစ်သွားတဲ့ ကိစ္စနဲ့ ပတ်သက်ပြီး ပြည်သူ တွေအနေနဲ့ သို့လော သို့လော ဖြစ်နေတော့ ဗိုလ်မှူးတိုက်ဂါး တို့က အခုလို ထုတ်ပြန်လိုက်တာလည်း ဖြစ်မှာပါ။ နိုင်ငံတော်ကလည်း အများကြီး စောင့်ရှောက်ပေးပါတယ်။ လိုအပ်တာ ထက်ပိုသွားရင်တော့ မကောင်းဘူးပေါ့ ဟု BGF မှ ဗဟိုအကြံပေးနှင့် ကွပ်ကဲရေးတာဝန်ခံ ဗိုလ်မှူးထက်ဝင်းက ပြောသည်။

ထို့ပြင် လက်နက်ကိုင် တပ်ဖွဲ့ဝင်များသည် အစိုးရဌာနများ၏  ဥပဒေနှင့် အညီ ဆောင်ရွက်သော ကိစ္စများကို ၀င်ရောက် စွက်ဖက်မှုရှိ နေခြင်း၊ စည်းကမ်း လိုက်နာမှု မရှိခြင်း၊ လက်နက်ကိုင်ဆောင် သွားလာခြင်းကြောင့် မြ၀တီမြို့နေ ပြည်သူများအား စိုးရိမ်မှုကို ဖြစ်ပေါ်စေပြီး မြို့လုံခြုံရေးကိုပါ ထိခိုက်နေသည်ဟု အစိုးရတပ်မှ သတိပေးထားကြောင်း  သိရသည်။

Messenger News Journal