ဧည့်သည် သရုပ်ဆောင်ဘ၀ကနေ တစ်ခန်းစ နှစ်ခန်းစ ပိုသရုပ်ဆောင်လာရသလို၊ နောက်ပိုင်းမှာတော့ တူ ၊ မောင် ၊ ဒုတိယ မင်းသား ဘ၀ကနေ ခေါင်းဆောင်မင်းသာဖြစ်လာခဲ့တဲ့ ဖြိုးငွေစိုးဟာ သူ့ဘ၀အတွက် သူအစွမ်းကုန်ကြိုးစားရင်း အနုပညာလောကမှာ ရပ်တည်နေခဲ့သူပါ။ ခုချိန်ထိလည်း သူ့ရဲ့အမာခံပရိသတ်တွေ အားပေးမှုနဲ့ ကြိုးစားနေဆဲ ဖြိုးငွေစိုးဟာ မကြာသေးခင် အချိန်မှာ ဇနီးသည် ဇင်ဇင်နဲ့ ရထားတဲ့ သားဦးလေးကို ပိုင်ဆိုင်ရတော့မှာမို့ သူရှိရာသို့သွားရောက်ပြီး မေးမြန်းဖြစ်ခဲ့သမျှကတော့ “မွေးမှာကတော့ လာမယ့် ၁၅ရက်နေ့ မနက်၇နာရီကျရင် ၀ိတိုရိယဆေးရုံမှာ ဒေါ်မေသူမျိုးညွှန်က ခွဲမွေးပေးမှာပါ။ ခုကလေး ရတော့မယ်ဆိုတော့ အားလုံးက သဲသဲလှုပ်ဖြစ်နေကြတယ်။ ခုချိန်ကတော့ ကျွန်တော့အတွက် တခြားဘ၀တစ်ခုထဲကို ၀င်ပြီးနေရသလို ထူးထူးဆန်းဆန်းတွေလဲ ဖြစ်တယ်။ နေသားလဲ မကျသေးဘူး။ ကလေးလေးကိုလဲ အကောင်းဆုံး ဖြစ်စေချင်တယ်။ ကျွန်တော့်အဖေနဲ့အမေတွေရဲ့အရင်တုန်းက ခံစားချက်ကို ခုမှ နားလည်ကာစ ပြုတယ်။ ကလေးလေးကို ပရိသတ်တွက် အကောင်းဆုံးသော အရာတွေ ဖန်တီးပေးနိုင်တဲ့လူ တစ်ယောက်ဖြစ်အောင် ကျွန်တော်အတတ်နိုင်ဆုံး ပြုစုပျိုးထောင်ပေးချင်ပါတယ်။ ကျွန်တော့် ကလေးလေးကို ကျွန်တော် အနုပညာရှင်ပဲဖြစ်စေချင်တယ်။ ကလေးကို ကျွန်တော်က သားပဲလိုချင်တာ။ ခုသားလေးဆိုတော့ ကွက်တိပဲပေါ့။ မိန်းကလေးလဲချစ်ပါတယ်။ အရင်ကဆို အိမ်မှာ အဖေနဲ့ကျွန်တော်နဲ့ရန်ဖြစ်တာတို့၊ အဖေနဲ့ကျွန်တော့ညီနဲ့ရန်ဖြစ်တာတို့ရှိတယ်။ အရင်ကပေါ့။ ခုချိန်မှာတော့ ကျွန်တော်တို့အိမ်မှာ အဲ့လိုတွေ သိပ်မဖြစ်တော့ပဲ ကလေးကိုပဲ အားလုံးက ခေါင်းထဲမှာရှိနေကြတော့ ကောင်းတာပေါ့နော်။ အဲ့ဒီတော့ ကလေးဆိုတာ အိမ်ရဲ့ဆည်းလည်း ဆိုတာမှန်ပါတယ်”လို့ သူက ဖွင့်ဟပါတယ်။
အနုပညာအလုပ်တွေကို စွန့်လွှတ်ပြီး ဇနီးမယားကောင်းတစ်ယောက်ဖြစ်အောင် ကြိုးစားနေတဲ့ ဇင်ဇင်နဲ့ ပတ်သက်ပြီးတော့လည်း သူက “ကျွန်တော့်တွက်သူကအနွံတာလဲခံတယ်။ သည်းခံတယ်။ ကျွန်တော်ဒဏ် ခံနိုင်တဲ့သူ သိပ်မရှိဘူး။ သူကတော့ တော်တော်လေးကို ကျွန်တော့ဒဏ် ခံခဲ့ရတယ်။ သူ့ကို သနားတာလဲပါတယ်။ ကျွန်တော့တွက် ဘ၀တစ်ခုလုံးကို ပေးပြီးနေလိုက်တာ။ သူကိုယ်တိုင် အနုပညာအလုပ်ကို ဆက်လုပ်လို့ရသားနဲ့မလုပ်ပဲ ကျွန်တော့အနားမှာနေပြီး အချိန်ပေးတယ်။ အဲ့ဒီအတွက် ကျွန်တော်ကလဲ အများကြီး ပြောင်းလဲဖြစ်သွားတယ်။ ကျွန်တော့ မိသားစုနဲ့ သူ့အတွက်ပေါ့။ အလုပ်တွေ လုပ်သင့်တယ်ဆိုတာ သိလာရတယ်”တဲ့။
ခုလက်ရှိမှာ ဖြိုးငွေစိုးဟာ လိပ်ပြာညိုလို့ အမည်ပေးထားတဲ့ ဇာတ်ကားမှာ သဉ္ဖာနွယ်ဝင်းနဲ့ အတူ သရုပ်ဆောင်ထားပြီး ဒါရိုက်တာကတော့ ကိုနေသူရိန်လို့ သိရပါတယ်။
Trend Myanmar
0 comments:
Post a Comment