အမေရိကန်နိုင်ငံ၊ ဟာဝိုင်အီကျွန်းရှိ ကျေးရွာတစ်ခုထံ ချော်ရည်များ စီးဆင်းလာမှုသည် မိုးရွာသွန်းမှုကြောင့် နှောင့်နှေးသွားကြောင်း သိရသည်။
ဟာဝိုင်ယီရှိ ကီလူးအာ မီးတောင်မှ စီးထွက်လာသည့် နီရဲပူပြင်းသော ချော်ရည်များသည် ပါဟိုအာ ကျေးရွာရှိ လူနေဒေသများထိ ရောက်ရှိလာသဖြင့် လူအများ ဘေးလွတ်ရာ ရွှေ့ပြောင်းခဲ့ရသည်။ ချော်ရည်များ၏ အပူချိန်သည် ၁၆၀၀ ဒီဂရီ ဖာရင်ဟိုက်ထက်ပင် ကျော်လွန်ပြီး အောက်တိုဘာ (၂၈)ရက် တစ်ညတည်းမှာပင် ကိုက်(၉၀)မျှ တဖြည်းဖြည်း ရွေ့လျား စီးဆင်းလာခဲ့သည်။
ချော်ရည်များကြောင့် လူနေအိမ်ခြေ အဆောက်အအုံများ ပျက်စီးမည့် အခြေအနေ ကြုံနေရသော်လည်း အောက်တိုဘာ (၂၉)ရက်နေ့က မိုးရွာသွန်းမှုများကြောင့် အချို့နေရာများတွင် ချော်ရည်များ အေးခဲကုန်ကြောင်း ဒေသခံများက ဆိုသည်။ “လောလောဆယ်တော့ လူတွေက သိမ်းဆည်းစရာ ရှိတာတွေကို သိမ်းဆည်းထားပါပြီ။ အသက်ဘေး ကြုံလာရင်တော့ ကိုယ်ပိုင်ဆိုင်တဲ့အရာတွေကို စွန့်သင့်ရင် စွန့်ခဲ့ရမှာပါပဲ”ဟု ပါဟိုအာမှ စီးပွားရေးလုပ်ငန်းရှင် တစ်ဦးဖြစ်သည့် မိုက်ခ်မစ်ကက်ဖ်က ပြောကြားခဲ့သည်။
မိုးရွာသွန်းမှုကြောင့် မီးတောင်မှ ချော်ရည်စီးထွက်မှုများ လုံးဝ ရပ်တန့်မသွားသော်လည်း ချော်ရည်များ တိုးပွားစီးဆင်းမှုကို အကန့်အသတ် ဖြစ်သွားစေကြောင်း သိရသည်။ ချော်ရည်များ စီးဆင်းလာသည့် လမ်းကြောင်းသည် ခန့်မှန်းရန် ခက်ခဲနေသဖြင့် မိသားစုလိုက် မိမိ နေအိမ် အခြေအနေကို စောင့်ကြည့်နေရကြောင်း ဒေသခံများက ဆိုသည်။ “အိမ်မှာထိုင်ပြီး ဒီအခြေအနေကြီးကို စောင့်ကြည့်နေရတာ စိတ်မသက်သာဘူး”ဟု ဒင်းနစ် လက်ဂ်ရီမက်စ်က ဖွင့်ဟခဲ့သည်။ သူမက ချော်ရည်များ လူနေဧရိယာအနီးထိ တရွေ့ရွေ့ စီးဆင်းလာမှုမျိုး ယခင်က ယင်းဒေသတွင် မတွေ့ကြုံခဲ့ဖူးဟုလည်း ရှင်းပြခဲ့သည်။
ကီလူးအာ မီးတောင်သည် (၁၉၈၃)ခုနှစ်က ကြီးကြီးမားမား တစ်ကြိမ် ပေါက်ကွဲခဲ့ဖူးပြီး ယခုအခါ အက်ကွဲကြောင်း တစ်နေရာမှ ချော်ရည်များ စိမ့်ထွက်နေခြင်း ဖြစ်သည်။ ချော်ရည်များ တစ်စင်တီမီတာမျှ ဖုံးအုပ်နေသည့်နောက် ပါဟိုအာကို ဆက်သွယ်ထားသည့် ကားလမ်းနှစ်ခုကိုလည်း ပိတ်ထားလိုက်ရကြောင်း သိရှိရသည်။
_Ref: BBC
0 comments:
Post a Comment