ယူကရိန်းနိုင်ငံတွင် ဖြစ်ပေါ်နေသည့် စစ်မက်ပဋိပက္ခကို အကြောင်းပြပြီး အမေရိကန်ပြည်ထောင်စုနှင့် အနောက်နိုင်ငံများက ရုရှားအပေါ် ဒဏ်ခတ်အရေးယူမှုများ ပြုလုပ်နေခြင်းသည် ရုရှားအစိုးရ အပြောင်းအလဲဖြစ်ရန် ကြိုးပမ်းနေခြင်းသာ ဖြစ်သည်ဟု ရုရှားနိုင်ငံခြားရေးဝန်ကြီး ဆာဂျီလာရော့ဗ်က စွပ်စွဲပြောဆိုလိုက်ကြောင်း Reuters သတင်းဌာနက ရေးသားဖော်ပြသည်။
အမေရိကန်နှင့် အနောက်နိုင်ငံများသည် ယူကရိန်း ပြဿနာကို အကျိုးရှိရှိ ဝင်ရောက်အသုံးချပြီး ရုရှားအပေါ် ပိုမိုပြင်းထန်သည့် ပိတ်ဆို့အရေးယူမှုများ ပြုလုပ်ရန် ကြိုးပမ်းနေကြောင်း၊ အမှန်တွင် ၎င်းတို့သည် ရုရှားနိုင်ငံရေးစနစ်၊ သို့မဟုတ် အစိုးရ အပြောင်းအလဲဖြစ်အောင် ဦးတည်ကြိုးပမ်းနေခြင်းသာ ဖြစ်ကြောင်း နိုင်ငံခြားရေးဝန်ကြီး ဆာဂျီလာရော့ဗ်က ဆိုသည်။
“အသာစီးရယူကာ ဗိုလ်ကျတဲ့ လုပ်ဆောင်ချက်တွေကို အမေရိကန်နဲ့ အနောက်နိုင်ငံတွေက လုပ်ဆောင်နေတာဟာ အမှန်ပြောရရင် ရုရှားအနေနဲ့ မူဝါဒ ပြောင်းလဲကျင့်သုံးလာအောင် ဦးတည်တာ မဟုတ်ပါဘူး။ ရုရှားအစိုးရ အပြောင်းအလဲ ဖြစ်စေချင်လို့ပါပဲ” ဟု နိုင်ငံခြားရေးဝန်ကြီး ဆာဂျီလာရော့ဗ်၏ ပြောဆိုချက်ကို Tass သတင်းဌာနက ကိုးကားဖော်ပြသည်။
အီရန်နှင့် မြောက်ကိုရီးယားကဲ့သို့သော နိုင်ငံများအပေါ် သတ်မှတ်ပြဋ္ဌာန်းထားသည့် နိုင်ငံတကာ ပိတ်ဆို့အရေးယူမှုများသည် ယင်းနိုင်ငံများ၏ အမျိုးသားစီးပွားရေး ထိခိုက်မှုမရှိအောင် ဒီဇိုင်းဆင်ထားလေ့ ရှိကြောင်း၊ ယခုအနောက်နိုင်ငံများက သတ်မှတ်ပြဋ္ဌာန်းရန် ကြိုးပမ်းနေသည့် ပိတ်ဆို့အရေးယူမှုများမှာ စီးပွားရေးတစ်ရပ်လုံး ပျက်စီးပြီး လူထုအုံကြွမှုများ ဖြစ်ပေါ်လာရန် ဦးတည်ထားခြင်း ဖြစ်ကြောင်း ၎င်းကဆိုသည်။
“ယခုဆိုလျှင် အနောက်နိုင်ငံတွေက အထင်ကရ ပုဂ္ဂိုလ်ကြီးတွေက ရုရှားကို ဒဏ်ခတ်အရေးယူဖို့ လိုတယ်လို့ ပြောလာကြတယ်။ သူတို့ပြောတဲ့ ဒဏ်ခတ်အရေးယူမှုတွေက စီးပွားရေးတစ်ရပ်လုံး ပျက်စီးစေဖို့ပါပဲ” ဟု ရုရှားနိုင်ငံခြားရေးဝန်ကြီး ဆာဂျီလာရော့ဗ်က မော်စကိုမြို့တွင် ကျင်းပပြုလုပ်သော နိုင်ငံခြားရေးနှင့် ကာကွယ်ရေးဆိုင်ရာ အကြံပေး ဆွေးနွေးပွဲ၌ ပြောကြားသည်။
ပြီးခဲ့သည့် ရက်ပိုင်းအတွင်း ရုရှားသမ္မတ ဗလာဒီမာပူတင်က ယခင် ဆိုဗီယက်ယူနီယံရှိ ခေါင်းဆောင်များကို ဖြုတ်ချပစ်နိုင်ခဲ့သော ဆန္ဒပြမှုများ၊ တစ်နည်းအားဖြင့် ရောင်စုံတော်လှန်ရေးများ မဖြစ်ပေါ်အောင် မဖြစ်မနေ ကာကွယ်ပေးရမည်ဟု ပြောဆိုပြီးနောက် နိုင်ငံခြားရေးဝန်ကြီး ဆာဂျီလာရော့ဗ်က ထိုသို့ အနောက်နိုင်ငံများကို စွပ်စွဲလိုက်ခြင်း ဖြစ်သည်။
အနောက်နိုင်ငံများ၏ ဒဏ်ခတ် အရေးယူမှုများသည် ရုရှားနိုင်ငံ၏ ဧရာမကုမ္ပဏီကြီး အချို့အား နိုင်ငံခြားအရင်းအနှီး မရရှိနိုင်အောင် ကန့်သတ်ပိတ်ဆို့ထားရာ ကာကွယ်ရေးနှင့် စွမ်းအင်ဆိုင်ရာ လုပ်ငန်းကြီးများကို အထိနာစေခဲ့သည်။
The Voice Weekly
0 comments:
Post a Comment