လူမှုဖူလုံရေး လစဉ်အာမခံကြေးငွေများကို ပုဂ္ဂလိကဘဏ်များမှတစ်ဆင့် ပေးသွင်းနိုင်ရန်နှင့် ငွေလုံးငွေရင်းအကျိုးခံစားခွင့်များကို MPU ကတ်မှတစ်ဆင့် ပေးအပ်နိုင်ရန် စီစဉ်နေကြောင်း လူမှုဖူလုံရေးအဖွဲ့ ညွှန်ကြားရေးမှူးချုပ် ဦးထွန်းသန်းက ပြောကြားသည်။
အလုပ်ဌာနများ၊ ကုမ္ပဏီများသည် လူမှုဖူလုံရေးလစဉ်ကြေး ကျပ်ငါးသိန်းကျော်ပါက သက်ဆိုင်ရာလူမှုဖူလုံရေးရုံးတွင် စာရင်းသွင်းစစ်ဆေးခံရပြီး၊ မြန်မာ့စီးပွားရေးဘဏ်တွင် အာမခံကြေးသွားရောက်ပေးသွင်းကာ ဘဏ်မှ ငွေသွင်းပြေစာကို လူမှုဖူလုံရေးရုံးသို့ ပြန်လည်ပေးအပ်ကာ ငွေရပြေစာပေးသွင်းစေခြင်း ဖြစ်သည်။
ငွေပေးသွင်းရာတွင် အချို့အလုပ်ဌာနများသည် မြန်မာ့စီးပွားရေးဘဏ်နှင့် အလှမ်းဝေးနေခြင်းကြောင့် သတ်မှတ်ရက်အတွင်းမြန်ဆန်စွာ အာမခံကြေးပေးသွင်းနိုင်ရန် ပုဂ္ဂလိကဘဏ်များနှင့် ချိတ်ဆက်ထားသည်ဟု ဦးထွန်းသန်းက ပြောသည်။
‘‘ဘဏ်ကြီးတွေဖြစ်တဲ့ ကမ္ဘောဇဘဏ်တို့၊ ဧရာဝတီတို့၊အမရာတို့၊ စီဘီဘဏ်တို့နဲ့ ဆက်သွယ်ပြီး သွင်းနိုင်အောင်၊ အိုကေဒေါ်လာတို့ ဘာတို့ဆိုရင်လည်း အဲဒီလိုဆက်သွယ်ပြီး လုပ်လိုက်ရင်ငွေသွင်းတာပိုပြီး မြန်ဆန်လာမှာပေါ့လေ’’ဟု ဦးထွန်းသန်းကပြောသည်။
ဘဏ်များနှင့်ချိတ်ဆက်၍ ငွေပေးသွင်းစေမှုကို ပထမအဆင့်လုပ်ဆောင်နိုင်ပြီးပါက ဒုတိယအဆင့်အနေဖြင့် အကြောင်းတစ်စုံတစ်ရာကြောင့် လုပ်ငန်းခွင်အတွင်းထိခိုက်သေဆုံး ဒဏ်ရာရရှိသည့် အလုပ်သမားများ ငွေလုံးငွေရင်း အကျိုးခံစားခွင့်ပေးအပ်ငွေကို အမြန်ဆုံးထုတ်ပေးနိုင်ရန် လုပ်ဆောင်မည်ဟု ဆိုသည်။
‘‘ဒုတိယပိုင်းအနေနဲ့ အကျိုးခံစားခွင့်တွေကို MPU ကတ်တွေရှိရင် အဲဒီမှာ တစ်ခါတည်း ထည့်ပေးလိုက်မယ်။ သူ့ဘာသာကြိုက်တဲ့နေရာမှာထုတ်။ အဲဒီလိုလုပ်မယ်’’ဟု ဦးထွန်းသန်းက ပြော သည်။
လူမူဖူလုံရေးအာမခံသည် အလုပ်သမားက ၎င်းရရှိသည့် လစာ၏ ၂ ရာခိုင်နှုန်းနှင့် အလုပ်ရှင်က ၃ ရာခိုင်နှုန်းလစဉ်ထည့်ဝင်ရခြင်းဖြစ်သည်။
ကျန်းမာရေးအတွက် ဆေးကုသရန် လိုအပ်သော အာမခံအလုပ်သမားများသည် သက်ဆိုင်ရာလူမှုဖူလုံရေးဆေးခန်းများ၊ အလုပ်သမားဆေးရုံများတွင် အခမဲ့ဆေးဝါးကုသမှုခံယူနိုင်ပြီး ပြင်ပအစိုးရဆေးရုံများ၌ ကုသရန် လိုအပ်ပါက ကုသမှုအတွက် ကုန်ကျသည့် ဆေးဖိုးစရိတ်များ ပြန်လည်ထုတ်ပေးနေကြောင်း သတင်းရရှိသည်။
မြန်မာနိုင်ငံတွင် လူမှုဖူလုံကြေးလစဉ်ပေးဆောင်နေသည့် အာမခံအလုပ်သမားဦးရေ တစ်သန်းခန့်ရှိကြောင်း လူမှုဖူလုံရေးအဖွဲ့ထုတ်ပြန်ချက်စာရင်းများအရ သိရသည်။
Credit To >>> 7 Day Daily
0 comments:
Post a Comment