မြောက်ကိုရီးယားခေါင်းဆောင် ကင်ဂျုံအန်းဟာ ရက်ပေါင်း ၄၀ ကျော် လူမြင်ကွင်းကနေ ပျောက်ကွယ်နေရာကနေ ဒီနေ့ထုတ် မြောက်ကိုရီးယားနိုင်ငံပိုင် သတင်းစာမှာ သူ့ဓာတ်ပုံတွေကို ပြန်လည် ဖော်ပြထားပါတယ်။
တောင်ဝှေးအကူအညီနဲ့ လမ်းလျှောက်နေရတဲ့ ပုံမျိုး ဖြစ်ဆိုပေမယ့် ပြုံးရယ်နေတဲ့ ပုံတွေကို ဖော်ပြလိုက်လို့ သူ့ကျန်းမာရေး၊ သူ့နိုင်ငံရေးသြဇာနဲ့ ပတ်သက်လို့ ထွက်ပေါ်နေ တဲ့ ကောလာဟလတွေ အားလုံး တစခန်း ရပ်သွားမယ့်သဘော ရှိပါတယ်။
သတင်းအရ အသစ်တည်ဆောက်ပြီးတဲ့ လူနေအိမ်ရာတခုနဲ့ သိပ္ပံအကယ်ဒမီကို သွားရောက် စစ်ဆေးတယ်လို့ ဆိုပါတယ်။
ကင်ဂျုံအန်းဟာ စက်တင်ဘာ ၃ ရက်နေ့မှာ သူဇနီးနဲ့အတူ အခမ်းအနားတခုကို တက်ရောက်ခဲ့ပြီးကတည်းက လူမြင်ကွင်းကနေ ပျောက်နေခဲ့တာပါ။
ပြီးခဲ့တဲ့ အောက်တိုဘာ ၁၀ ရက်နေ့ ပါတီထူထောင်ခြင်း နှစ်ပတ်လည် အခမ်းအနားကိုလည်း မတက်ရောက်ခဲ့တာနဲ့၊ လွှတ်တော်အစည်းအဝေးကို မတက်ရောက်တာတွေကို ထောက်ပြီး ကောလာဟလတွေ ထွက်ပေါ်နေတာ ဖြစ်ပါတယ်။
အခု ဓာတ်ပုံနဲ့ တကွဖော်ပြထားတဲ့ KCNA သတင်းမှာ ကင်မ်ရဲ့ ခရီးစဉ်တွေကို ဖော်ပြထားပေမယ့် ဘယ်နေ့ရက်မှာ သွားထားတာလဲဆိုတာကိုတော့ ဖော်ပြမထားပါဘူး။
ဒီလိုပဲ လူမြင်ကွင်းကနေ အကြာကြီး ပျောက်နေတဲ့အကြောင်းကိုလည်း ရှင်းပြ မထားပါဘူး။
ကင်မ် လူမြင်ကွင်းကနေ ပျောက်နေတာဟာ ကျန်းမာရေး ချို့ယွင်းနေတာကြောင့်ဆိုတဲ့ ခန့်မှန်းပြောဆိုချက်တွေကို မြောက်ကိုရီးယားအရာရှိတွေက ငြင်းဆိုထားပါတယ်။
နိုင်ငံရေးအရ ဒုက္ခတွေ့နေတယ်ဆိုတဲ့ ကောလာဟလကိုလည်း အမေရိကန်နဲ့ တောင်ကိုရီးယားအရာရှိတွေက ဖြစ်နိုင်ချေ မရှိဘူးလို့ ပြောကြပါတယ်။
ကင်မ်နဲ့ နီးစပ်တဲ့ အရင်းအမြစ်ကလည်း ကင်မ်ဟာ နိုင်ငံကို ဆက်လက် အုပ်ချုပ်နေဆဲ ဖြစ်ပြီး စစ်ရေးလေ့ကျင့်မှုတခုအတွင်း ခြေထောက်မှာ ဒဏ်ရာရခဲ့တယ်လို့ ရိုက်တာ သတင်းဌာနကို ပြီးခဲ့တဲ့ အောက်တိုဘာ ၉ ရက်နေ့က ပြောထားပါတယ်။
DVB
0 comments:
Post a Comment