စာသင်ခန်းတွင်း ဒီမိုကရေစီကို ပြန်လည် အသက်သွင်းချိန်

နှစ်ပေါင်းများစွာ ပျောက်ဆုံးနေခဲ့သည့် ပညာရေးစံနှုန်းများ၊ ကျင့်စဉ်များနှင့် အစဉ်အလာအရ လက်ဆင့်ကမ်းပေးရမည့် ပညာရေးကျင့်ဝတ်များကို ပြန်လည် ဖော်ထုတ်ခြင်းဖြင့် မြန်မာ့ပညာရေးသစ်ကို အကောင်အထည်ဖော်ရမည့် အချိန်ကောင်းဟု ရှုမြင် သုံးသပ်ရပါသည်။ အထူးသဖြင့် တိုင်းပြည် ပြန်လည် တည်ဆောက်ရာတွင် ပညာရေးကဏ္ဍ၏ အရေးပါပုံကို ထင်သာမြင်သာဖြစ်စေသင့်သည် မဟုတ်ပါလော။

လူထုနှင့် တိုက်ရိုက်ဆက်ဆံနေရသည့် ပညာရေး ကဏ္ဍမှာ များစွာ အပြောကျယ်ပြန့်လှသကဲ့သို့ ပညာထုထည်ကို အတွေးသစ်၊ အမြင်သစ်များဖြင့် နက်နက်ရှိုင်းရှိုင်း၊ ခိုင်ခိုင်မာမာ တည်ဆောက်ရန် လည်း လိုအပ်နေပါသည်။ လက်ရှိလွှတ်တော်တွင်း တင်ပြ ဆွေးနွေးနေမှုများ၊ နိုင်ငံရေးပါတီများနှင့် အရပ်ဖက် လူ့အဖွဲ့အစည်းများ၏ ဒီမိုကရေစီ ပညာရေး ဆွေးနွေးမှုများနှင့် စာသင်ခန်းများ အဆက်အစပ်ကိုလည်း သုတေသနပြု လေ့လာသင့်ပါသည်။

ပညာရေးစနစ်နှင့် ကျောင်းသင်ခန်းစာများတွင် နိုင်ငံတကာဒီမိုကရေစီကျင့်စဉ်များနှင့် နိုင်ငံရေးသိပံ္ပတို့ကို သင်ကြားပေးမည်ဟု မတ် ၂၂ ရက်က နေပြည်တော်တွင် ကျင်းပသော ပြည်သူ့လွှတ်တော်၌ ပညာရေး ၀န်ကြီး ဒေါက်တာမြအေးက လွှတ်တော်ကိုယ်စားလှယ် ဦးမြင့်စိုး၏ မေးခွန်းကို ပြန်လည် ဖြေကြားရာတွင် ပြောကြားခဲ့သည်။ ပျော်ဘွယ်မဲဆန္ဒနယ်မှ ကိုယ်စားလှယ်ဦးမြင့်စိုးက အချို့သော ပြည်သူတို့မှာ ဒီမိုကရေစီ သဘောတရား စံနှုန်းကျင့်စဉ်များကို သိရှိနားလည်မှု အားနည်းသည့်အတွက် ဒီမိုကရေစီ အလွဲသုံးစားပြုသူများက ရိုးသားသော အချို့ပြည်သူများကို အသုံးချ နေမှုများလည်း ရှိနေကြောင်း၊ ထိုကဲ့သို့ အသုံးချ မခံရစေရန် ဒီမိုကရေစီစနစ်ကို စနစ်တကျ ကျင့်သုံး၍ ငြိမ်းချမ်းဖွံ့ဖြိုးတိုးတက်သော ကမ္ဘာ့နိုင်ငံများ၏ ဒီမိုကရေစီကျင့်စဉ်များ၊ စံနှုန်းများ၊ ကျင့်သုံးပုံများ၊ မြန်မာနိုင်ငံ၏ ဒီမိုကရေစီဖော်ဆောင်မှုအကြောင်းများကို အလယ်တန်းအဆင့်၊ အထက်တန်းအဆင့်၊ အဆင့်မြင့်ပညာအလိုက် သိရှိ လေ့လာနိုင်ရန် ထည့်သွင်း သင်ကြားပေးသင့်သဖြင့် ကျောင်းသင်ခန်းစာများတွင် ကျွမ်းကျင်သော ပညာရှင်များနှင့် တိုင်ပင်ကာ ထည့်သွင်း သင်ကြားပေးနိုင်ခြင်း ရှိ၊ မရှိ မေးမြန်းခဲ့ပါသည်။

ထိုမေးခွန်းနှင့်စပ်လျဉ်း၍ ပညာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာမြအေးက မျိုးဆက်သစ် လူငယ်များ၏ စိတ်ဓာတ်နှင့် ကိုယ်ကျင့်တရား မြင့်မားရေးအတွက် စာရိတ္တနှင့် ပြည်သူ့နီတိ၊ စာရိတ္တနှင့် လောကနီတိဘာသာရပ် သင်ခန်းစာများကို အခြေခံပညာ အဆင့်အလိုက် သင်ကြားပေးလျက်ရှိပြီး ဒီမိုကရေစီ စိတ်ထားကျင့်စဉ်နှင့် ဆက်နွယ်သော လူ့အခွင့်အလမ်းများ၊ ပညာရေးသင်ခန်းစာများကို ပဉ္စမတန်းမှ န၀မတန်းအထိ သင်ကြား လေ့ကျင့်ပေးလျက် ရှိပါကြောင်း၊ ယခင်က ဆရာကိုင် စာအုပ်သာရှိခဲ့သော်လည်း လာမည့်နှစ်မှစ၍ ကျောင်းသားကိုင် စာအုပ်တွင်ပါ ပြုစုဖြန့်ဝေ သွားမည်ဖြစ်ကြောင်း၊ ကျောင်းသားကျောင်းသူများ၏ ကိုယ်ရည်ကိုယ်သွေးနှင့် ပညာရေးအချိုးညီ ပြည့်ဝ လာစေရေးအတွက် လူမှုစီးပွားရေးနယ်ပယ်တွင် ခိုင်မာစွာ ရှင်သန်နိုင်မည့် တွေးခေါ် ကျင့်ကြံပြုမူ နေထိုင်တတ်သည့် အရည်အသွေးများ ပြည့်ဝလာစေရန် ယခု ပညာသင်နှစ်မှစ၍ တိုင်းဒေသကြီး၊ ပြည်နယ်အလိုက် ကျောင်းသား၊ ကျောင်းသူများအား ဗဟိုအဆင့်နှင့် ကျောင်းအဆင့် ကင်းထောက်သင်တန်းများ ဖွင့်လှစ် ပို့ချပေးခဲ့ပြီး ကင်းထောက် ကတိနှင့် ကျင့်ဝတ်များတွင် ပါရှိသည့် သူတစ်ပါးအား အစဉ်ကူညီသည့် ဂုဏ်သိက္ခာသည် ယုံကြည်စိတ်ချရသည်၊ ကိုယ်နှုတ်နှလုံးသုံးပါးစလုံး ဖြူစင် သန့်ရှင်းသည်ဟူသည့် လူသား တစ်ယောက်ဖြစ်ရေးအတွက် လေ့ကျင့် ပြုစုလျက် ရှိပါကြောင်း၊ အဆင့်မြင့်ပညာကဏ္ဍတွင် တက္ကသိုလ်ပထမနှစ် ကျောင်းသားများအား ဒီမိုကရေစီနှင့် ပတ်သက် ဆက်နွယ်သော သင်ရိုးညွှန်တမ်းများကို သမိုင်းဘာသာတွင် ထည့်သွင်းသင်ကြားလျက်ရှိပြီး ကမ္ဘာ့သမိုင်းဘာသာရပ်ကို သမိုင်းအထူးပြု ကျောင်းသား၊ ကျောင်းသူများအတွက် ပထမနှစ်နှင့် သမိုင်းအထူးပြု မဟုတ်သော ကျောင်းသား၊ ကျောင်းသူများ အားလုံးအတွက် ပထမနှစ်၊ ဒုတိယနှစ်ဝက်တွင်လည်းကောင်း၊ Modern Myanmar ကို တတိယနှစ် သမိုင်းအထူးပြု၊ ပထမနှစ် ဂုဏ်ထူးတန်း သမိုင်း အထူးပြုကျောင်းသား၊ ကျောင်းသူများအတွက်လည်းကောင်း၊ မြန်မာနိုင်ငံဖွဲ့စည်းပုံ အခြေခံဥပဒေသမိုင်း Constitutional History of Myanmar ကို တတိယနှစ် ဂုဏ်ထူးတန်း သမိုင်းအထူးပြုကျောင်းသား၊ ကျောင်းသူများအတွက်လည်းကောင်း သင်ကြားပေးလျက်ရှိပါကြောင်း၊ နိုင်ငံတကာ ဆက်ဆံရေးပညာ အထူးပြု ဂုဏ်ထူးတန်း နောက်ဆုံးနှစ်နှင့် မဟာဝိဇ္ဇာ အရည်အချင်းစစ် သင်တန်းတွင် ဒီမိုကရေစီနှင့် ဆက်နွယ်သော Political Science, Democracy စသည့် ဘာသာရပ်များကို ထည့်သွင်း သင်ကြားလျက်ရှိပါကြောင်း၊ ထို့အပြင် မကြာခင် Political Science ဘာသာရပ်တစ်ခုကို ဌာနအသစ်အနေဖြင့် ထူထောင် သွားမည်ဖြစ်ကြောင်းလည်း ဖြေကြားခဲ့ပါသည်။

ပြည်သူလူထုအတွင်း ဒီမိုကရေစီ အသိအမြင်တို့ အားနည်းနေမှုကို လွှတ်တော်တွင်း တင်ပြဆွေးနွေးခြင်းနှင့် ဒီမိုကရေစီကို အလွဲသုံးစားပြုမှုများ ရှိနေသည်ဟု သုံးသပ်မှုများအပေါ် အလေးထားစဉ်းစားသင့်ပါသည်။ အသိအမြင်တို့ မည်မျှ အားနည်းနေပါသနည်း။ အဘယ်ကြောင့်ပါနည်း။ မူလယ်ထက်နှင့် တက္ကသိုလ်ပညာရေး သင်ရိုးတစ်စုံလုံးတွင် ပါရှိနေသော ဒီမိုကရေစီ ရာခိုင်နှုန်းနှင့် သင်ရိုးညွှန်းတမ်း အရည်အသွေးကိုလည်း စိစစ်ရပါမည်။ သင်ကြားသူတို့၏ ပညာရေး သဘောတရား ပြည့်ဝမှု၊ ဒီမိုကျင့်စဉ်အပေါ် လေးနက်မှုနှင့် ဒီမိုဘာသာရပ် ကျေညက်မှု  subject knowledge အရည်အသွေး တို့ကိုလည်း စိစစ်ရတော့မည်။ ခေါင်သဖွယ်ဖြစ်သည့် သင်ရိုးကို မည်သို့ ပြုစုကြပါမည်နည်း။

ဒီမိုကရေစီ အတွေးအမြင်တို့ အားနည်းခြင်းမှာ ဆယ်စုနှစ် ၄ စုခန့် ဒီမိုကရေစီသင်ရိုး ဆိတ်သုဉ်းကွယ်ပျောက်ခြင်း၏ အကျိုးဆက်ဟု ရှုမြင်ရပါမည်။ ဒီမိုကရေစီ လူ့အဖွဲ့အစည်း၏ စံနှုန်းများအပေါ် အခြေခံပြီး သင်ရိုးကို ရေးဆွဲခြင်း၊ ငယ်ရွယ်သည့် မူလတန်းအဆင့်မှ စတင်ကာ ပညာရေးအဆင့်တိုင်းတွင် ဒီမိုကရေစီ သဘောတရားတို့ကို အသေအချာ သင်ကြားလေ့ကျင့်ပေးခြင်း၊ ကျောင်းတွင်းနှင့် ပညာရေးကျင့်စဉ်တို့တွင် ဒီမိုကရေစီကို အခြေပြုထားခြင်းတို့ ရှိသင့်ပါသည်။

အသက် ၄၀ ကျော် လူအများစုကြီးသည် ဒီမိုကရေစီယဉ်ကျေးမှုကို စာသင်ကျောင်းနှင့် ရပ်ရွာတွင်းတွင် တရားဝင် လေ့ကျင့် သင်ကြားခွင့် မရရှိခဲ့ပါ။ ကလေးဗဟိုပြု ပညာရေးကိုလည်း ကျောင်းသားဘ၀တွင် ဖြတ်သန်းခဲ့ဖူးသူများ မဟုတ်ကြပါ။ ထို့အတွက် ပညာရေးဝန်ထမ်း ကျောင်းဆရာ ဆရာမများ အနေဖြင့် ဒီမိုကရေစီသဘောတရားနှင့် အကျင့်အကြံတို့ကို မည်သို့ လက်ဆင့်ကမ်း သင်ကြားပေးနိုင်ပါမည်နည်း။ သင်ရိုးညွှန်းတမ်း ပြည့်စုံစေသင့်ပါသည်။ သင်တန်းတန်ဖိုးတွင် ထင်ရှားစေသင့်သည်။ စာသင်ခန်းလက်စွဲများ၊ သင်ကြားရေး အစီအစဉ်များကို ဖြည့်ဆည်းပေးရမည်။ B.Ed ဘွဲ့သင်တန်းများနှင့် ပညာရေးကောလိပ်တို့တွင် ဒီမိုကရေစီနှင့် ငြိမ်းချမ်းရေးကို မဏ္ဍိုင်ပြုထားသည့် ဆရာအတတ်ပညာ သင်ရိုးသစ်တို့ကိုလည်း ဖန်တီး ရေးဆွဲရပါဦးမည်။

ဘာသာရေး အခြေပြုထားသော ပြည်သူ့နီတိသင်ရိုးမျှဖြင့် ဒီမိုကရေစီ လူ့အဖွဲ့အစည်း၊ ဒီမိုကရေစီနိုင်ငံရေးစနစ်တို့အတွက် မလုံလောက်နိုင်ကြောင်းကိုလည်း ထောက်ပြလိုပါသည်။ ဤအချက်မှာ ဆယ်စုနှစ် ၄ ခုကျော် ဖြတ်သန်းပြီးသည့် လက်ရှိ အခြေအနေကပင် သက်သေပြနေပါ၍ အကျယ် မရှင်းတော့ပြီ။ ကောင်းမွန်သော ရိုးရာစံတန်ဖိုးတို့ကို ထိန်းသိမ်းရန် လိုအပ်ကြောင်းကိုလည်း မငြင်းလိုပါ။ သို့သော် ဒီမိုကရေစီ နိုင်ငံရေးစနစ်အတွက် ဒီမိုကရေစီပညာရေး အကျင့်အကြံတို့ကို ပိုမို ထင်ရှားစေသင့်သည်ဟု သုံးသပ်ပါသည်။

“အရေးကြီးသော ဘာသာရပ်များ” ကို ကျူရှင်ယူသည့် ယဉ်ကျေးမှု လွှမ်းမိုးနေသည့် ပညာရေးစနစ်ဆိုးဖြစ်ပါ၏။ ဒီမိုကရေစီပညာ၊ ပြည်သူ့နီတိနှင့် နိုင်ငံရေးသိပ္ပံတို့ကို ကျူရှင် မယူကြခြင်းမှာ အရေးမကြီးသည့်အတွက်၊ စာမေးပွဲအောင်ရန် မလိုအပ်သည့်အတွက်၊ အထင်ကရ မဖြစ်သည့်အတွက်၊ အနာဂတ်တန်ဖိုးနှင့် အသုံး မရှိသည့်အတွက်ဟု ယူဆထားကြပါသလား။ အသက်သွေးကြောသဖွယ် အရေးကြီးသည်၊ မရှိမဖြစ် လေ့လာရမည်ဟူသော အသိအမြင်တို့ ရရှိသွားစေရန် ပညာရေးစနစ်တွင် တာဝန်ရှိနေပါကြောင်း မီးမောင်းထိုး တင်ပြလိုသည်။ ပညာရေးဝန်ကြီးဌာနနှင့် နိုင်ငံရေးပါတီများအပြင် အရပ်ဖက် လူမှုအဖွဲ့အစည်းများ civil societies ၏ ပါဝင် ဆောင်ရွက်နိုင်ခွင့်မှာ အခရာ ကျသည်ဟူ၍လည်း တင်ပြလိုပါသည်။

ကလေးသူငယ်များ၊ ကျောင်းသူကျောင်းသားများ၊ ဆရာဆရာမများ၏ လူမှုဘ၀များနှင့် ဒီမိုကရေစီ တထပ်တည်း၊ တသားတည်း ကျနေခြင်းသည်သာလျှင် ဒီမိုကရေစီ တိုင်းပြည်အတွက် အသေချာဆုံးသော လမ်းကြောင်းဖြစ်ပါကြောင်း ယုံကြည်ပါသည်။ မြန်မာနိုင်ငံ တနံတလျားရှိ စာသင်ကျောင်းများ၊ ကောလိပ်များနှင့် တက္ကသိုလ်ပညာရေး အဆင့်ဆင့်တို့တွင် သင်ကြားရန် လိုအပ်နေသေးသည့် ဒီမိုကရေစီ ပညာရေး သင်ရိုးကို အရှိန်အဟုန်ဖြင့် အကောင်အထည်ဖော်ရန် အချိန်ဖြစ်ပါကြောင်း တိုက်တွန်းလိုက်ရပါသည်။

မောက္ခပညာရေးမဂ္ဂဇင်း
၇ ဧပြီလ ၂၀၁၃