နိုင်ငံတကာ မီဒီယာညီလာခံ မြန်မာနိုင်ငံတွင် ပထမဆုံး ကျင်းပမည်

ပုဂ္ဂလိကသတင်းစာ လွတ်လပ်ခွင့် တိုးတက်လာသည့် မြန်မာနိုင်ငံ ရန်ကုန်မြို့တော်တွင် အပြည်ပြည်ဆိုင်ရာ မီဒီယာညီလာခံ တစ်ခုကို ပထမဆုံးအကြိမ်အဖြစ် ကျင်းပမည်ဖြစ်ကြောင်း ဦးဆောင်ကျင်းပမည့် အမေရိကန် ပြည်ထောင်စုနှင့် အာရှ၊ ပစိဖိတ်ဒေသလုံးဆိုင်ရာ East West Center ၏ သတင်းထုတ်ပြန်ချက်တွင် ဖော်ပြထားသည်။ EWC ၏ ၂၀၁၄ ခုနှစ် အပြည်ပြည်ဆိုင်ရာ မီဒီယာညီလာခံကို ပြည်ထောင်စုသမ္မတ မြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များ အသင်းချုပ်ရုံး၌ မတ်လ ၁၀ ရက်နေ့မှ ၁၂ ရက်နေ့အထိ ကျင်းပမည်ဖြစ်ပြီး နိုင်ငံပေါင်း ၂၅ နိုင်ငံမှ မီဒီယာကျွမ်းကျင်သူများနှင့် လုပ်ငန်းရှင်များ ရာကျော် တက်ရောက်မည် ဖြစ်သည်ဟု ဆက်လက် ဖော်ပြထားသည်။ ယင်းညီလာခံသည် ဒေသတွင်း သတင်းနှင့် မီဒီယာရေးရာ လက်တွေ့သတင်းတင်ဆက်ခြင်း၊ လက်တွေ့စွမ်းရည် တည်ဆောက်ခြင်းဆိုင်ရာ အလုပ်ရုံ ဆွေးနွေးခြင်းများနှင့် ရာချီသော နိုင်ငံတကာ မီဒီယာကျွမ်းကျင်သူများနှင့် မိတ်ဖွဲ့ချိတ်ဆက်ခြင်းတုိ့ ပြုလုပ်နိုင်မည် ဖြစ်ကြောင်း၊ နိုင်ငံတကာ ဂျာနယ်လစ်များကို ဖိတ်ခေါ်နိုင်ခြင်းသည် မြန်မာနိုင်ငံတွင် ဖြစ်ထွန်းနေသော အပြောင်းအလဲ၏ အားကောင်းသော ညွှန်ပြမှုပင် ဖြစ်သည်ဟု East West Center ဥက္ကဋ္ဌ ချားလ်အီးမော်ရစ်ဆင်က မှတ်ချက်ပြုသည်။ ယခုကျင်းပသည့် အဖွဲ့သည် နိုင်ငံပေါင်း ၂၅ နိုင်ငံပါဝင်ပြီး ကမ္ဘာကျော် အဖွဲ့အစည်းတစ်ခု ဖြစ်ကြောင်း၊ သတင်းညီလာခံကို နိုင်ငံတကာမှ သတင်းမီဒီယာ လုပ်ငန်းရှင် ၃၀၀ ခန့် တက်ရောက်မည်ဖြစ်၍ မြန်မာသတင်းမီဒီယာသမားများ တက်ရောက်သင့်သည့် ညီလာခံ ဖြစ်သော်လည်း မှတ်ပုံတင်ကြေး အမေရိကန်ဒေါ်လာ ၂၇၅ သည် မြန်မာသတင်းမီဒီယာသမားများ လက်လှမ်းမမီသည့် ပမာဏဖြစ်ကြောင်း မြန်မာသတင်းဆရာများ အသင်း၏ အတွင်းရေးမှူး ဦးဖိုးနိုင်လင်းက ပြောကြားသည်။ ယင်းညီလာခံသို့ တက်ရောက်မည့် သူများသည် အွန်လိုင်းမှ မှတ်ပုံတင်ခြင်းကို ဇူလိုင်လ အစောပိုင်းတွင် ကြိုတင်မှတ်ပုံတင်ကြေး အမေရိကန်ဒေါ်လာ ၂၇၅ ဖြင့် EastWestCenter.org/imc2014 တွင် စာရင်းပေးသွင်းနိုင်သည်။ အကြောင်းအရာ ပိုမိုသိရှိလိုပါက EastWestCenter.org/imc2014 အင်တာနက် စာမျက်နှာမှ Burmese language brochure တွင် ဝင်ရောက် ကြည့်ရှုနိုင်သည်ဟု ၂၀၁၃ ခုနှစ် ဇူလိုင်လ ၂ ရက်နေ့ထုတ် The Voice Daily သတင်းစာတွင် ဖော်ပြထားပါသည်။

Ref: khitlunge