ကုလသမဂ္ဂက ထုတ်ပြန်သည့် အစားအစာအကူအညီ လိုအပ်သော ကမ္ဘာ့နိုင်ငံများ ၃၄ နိုင်ငံစာရင်းတွင် မြန်မာနိုင်ငံလည်း ပါဝင်နေကြောင်း သိရသည်။
ကုလသမဂ္ဂလက်အောက် စားနပ်ရိက္ခာနှင့် စိုက်ပျိုးရေးအဖွဲ့ကြီး၏ ကောက်ပဲသီးနှံအလားအလာနှင့် အစားအစာအခြေအနေ အစီရင်ခံစာအား မတ် ၉ ရက် ထုတ်ပြန်ခဲ့ခြင်းဖြစ်သည်။
အဆိုပါ အစီရင်ခံစာအရ ပဋိပက္ခများ၊ မိုးခေါင်းမှုနှင့် ရေကြီးမှုများကြောင့် အစားအစာလိုအပ်သည့် နိုင်ငံပေါင်း ၃၄ နိုင်ငံရှိနေကြောင်း ဖော်ပြထားရာ၌ မြန်မာနိုင်ငံပါဝင်နေခြင်းဖြစ်သည်။
အဆိုပါ ၃၄ နိုင်ငံတွင် ၂၇ နိုင်ငံက အာဖရိကမှဖြစ်သည်။ ပဋိပက္ခများကြောင့် အီရတ်၊ ဆီရီးယား၊ ယီမင်၊ ဆိုမာလီနှင့် ဗဟိုအာဖရိကတို့တွင် စိုက်ပျိုးထုတ်လုပ်မှုများအတွက် အကြီးအကျယ်ဆုံးရှုံးမှုများကြုံနေပြီး လူသားချင်းစာနာထောက်ထားရေး အခြေအနေမှာလည်း အဆိုးဝါးဆုံး ကြုံတွေ့နေသည်။
အဆိုပါ ပဋိပက္ခများ၏ သက်ရောက်မှုသည် အဆိုပါ နိုင်ငံများမှ ထွက်ပြေးသည့် ဒုက္ခသည်များကို လက်ခံထားရာ အိမ်နီးချင်းနိုင်ငံများကိုပါ ဒုက္ခပေးလျက်ရှိရာ ယင်းနိုင်ငံများတွင်လည်း အစားအစာအရင်းအမြစ်များ ရှားပါးလာလျက်ရှိနေသည်။
ကျန်အခြားသော စားနပ်ရိက္ခာပြတ်လပ်မှုနှင့် ရင်ဆိုင်နေရသည့် နိုင်ငံများအဖြစ် ဆက်လက်ဖော်ပြထားရာတွင် မာလီ၊ ကမ်မရွန်း၊ အီသီယိုပီးယား၊ ဇမ်ဘာဘွေ စသည့် အာဖရိကနိုင်ငံများနှင့် အာရှတွင် အာဖဂန်နစ္စတန်၊ မြန်မာ၊ နီပေါနှင့် မြောက်ကိုရီးယားတို့ဖြစ်ကြသည်။
Credit To >>> Mizzima
0 comments:
Post a Comment