7 July ကျောင်းသားအရေးတော်ပုံ ၅၁ နှစ်ပြည့် အခမ်းအနားကို
ဗမာနိုင်ငံ လုံးဆိုင်ရာ ကျောင်းသား သမဂ္ဂများ အဖွဲ့ချုပ်မှ
ရန်ကုန်တိုင်းဒေသကြီး အတိုင်းအတာဖြင့် ဇူလိုင် ၇ ရက်၊ နံနက်ပိုင်းတွင်
သန်လျင်မြို့၊ မြို့မလမ်းရှိ အိုးဝေစာကြည့်တိုက်၌ ကျင်းပပြုလုပ်ခဲ့သည်။အထိမ်းအမှတ် အခမ်းအနားကို ဗမာနိုင်ငံလုံးဆိုင်ရာ ကျောင်းသားသမဂ္ဂများ
အဖွဲ့ချုပ် (ဗဟိုလုပ်ငန်းကော်မတီ)၊ ဗကသ၊ တကသ
ကျောင်းသားခေါင်းဆောင်ဟောင်းများ၊ ၈၈ မျိုးဆက် ငြိမ်းချမ်းရေးနှင့်
ပွင့်လင်းလူ့အဖွဲ့အစည်း၊ ရန်ကုန်တိုင်းဒေသကြီး အတွင်းရှိ
တက္ကသိုလ်ကျောင်းသား သမဂ္ဂအသီးသီးမှ ကျောင်းသားအရေး တက်ကြွလှုပ်ရှားသူများ
တက်ရောက်ခဲ့သည်။
အဆိုပါ အခမ်းအနားတွင် 7 July ကျောင်းသားအရေးတော်ပုံတွင် အသက်ပေး ခဲ့ရသည့်
ကျောင်းသား များအား အလေးပြုခြင်း၊ မျိုးဆက်အလိုက် ဖြတ်သန်းခဲ့သော ဗကသ
ခေါင်းဆောင်များမှ မိန့်ခွန်းပြောကြားခြင်း၊ ၀မ်းနည်းခြင်း
အထိမ်းအမှတ်အဖြစ် နှင်းဆီပန်းများဖြင့် ပုံဖော်ခြင်း၊ နိုင်ငံရေး၊ လူမှုရေး၊
ကျောင်းသားအဖွဲ့အစည်း အသီးသီးမှ 7 July ကျောင်းသားအရေးတော်ပုံ ၅၁
နှစ်ပြည့် အခမ်းအနားသို့ ပေးပို့သော သ၀ဏ်လွှာများကို ဖတ်ကြားခြင်း၊ အမှတ်တရ
ကဗျာများ ရွတ်ဆိုခြင်း ပြုလုပ်ခဲ့သည်။
7 July ကျောင်းသားအရေးတော်ပုံနှင့် ပတ်သက်၍ စုံစမ်းစစ်ဆေးရေး
အဖွဲ့ဖွဲ့ပြီး စစ်ဆေးပေးရန်၊ 7 July ကျောင်းသားအရေးတော်ပုံနှင့် ပတ်သက်သည့်
မှန်ကန်သည့် သဘောထားအမြင် လူထုကြားတွင် မရှိသဖြင့် တရားဝင် သတ်မှတ်ပေးရန်၊
ဖောက်ခွဲဖျက်ဆီး ခံခဲ့ရသည့် ကျောင်းသားသမဂ္ဂ အဆောက်အဦးကို မူလပုံစံအတိုင်း
ပြန်လည်တည်ဆောက်ပေးရန်၊ ကျောင်းသားသမဂ္ဂ အမှတ်တံဆိပ်ဖြစ်သော
ခွပ်ဒေါင်းအလံကို အာဏာ၏ သင်္ကေတအဖြစ် အသုံးမပြုရန် စသည်တို့ကို
တောင်းဆိုကြောင်း အထိမ်းအမှတ် အခမ်းအနားသို့ တက်ရောက်လာသည့် ၁၉၆၂ တကသ
အမှုဆောင်ဟောင်း ဦးလှရွှေက ဆိုသည်။
"ကျောင်းသားသမဂ္ဂ အဆောက်အဦးဆိုတာ အုတ်တိုင်တစ်တိုင် မဟုတ်ဘူး။ သမဂ္ဂ
အဆောက်အအုံဟာ ကျွန်တော်တို့ဘ၀တွေ ဖြစ်ခဲ့တယ်။ ကျောင်းသားသမဂ္ဂ အဆောက်အအုံ
ဖျက်ဆီးခံရတာ ဟာ မြန်မာနိုင်ငံရဲ့ ကျောင်းသားလှုပ်ရှားမှု သမိုင်းကို
ဖျက်ဆီးလိုက်တာ ဖြစ်တဲ့အတွက် ကျောင်းသားသမဂ္ဂ အဆောက်အအုံကို မူလပုံစံအတိုင်း
ပြန်ဆောက်ပေးပါ။ ပြီးတော့ ဒီအဆောက်အအုံ ကို မြန်မာနိုင်ငံရဲ့
ကျောင်းသားလှုပ်ရှားမှု သမိုင်းပြတိုက်အဖြစ် ထားရှိပေးပါလို့
ကျွန်တော်တောင်း ဆိုပါတယ်" ဟု ဦးလှရွှေက ပြောကြားသည်။
"ဒီပွဲလုပ်ဖို့ ခန်းမငှားတဲ့ နေရာမှာ အာဏာပိုင်အချို့ရဲ့
ဖိအားပေးမှုတွေကြောင့် အခက်အခဲတွေ အများကြီး ရှိတယ်" ဟု
ဗမာနိုင်ငံလုံးဆိုင်ရာ ကျောင်းသားသမဂ္ဂများ အဖွဲ့ချုပ်မှ ရန်ကုန်တိုင်း
တာဝန်ခံ ဦးမင်းသွေးသစ်က ပြောကြားသည်။ထို့ပြင် ရန်ကုန်အရှေ့ပိုင်း တက္ကသိုလ် (တာဝ)၊ နည်းပညာတက္ကသိုလ်
(သန်လျင်)၊ သန်လျင်သမ၀ါယမ တက္ကသိုလ် စသည့်တက္ကသိုလ် အသီးသီးမှ
ရန်ကုန်တောင်ပိုင်းခရိုင် ကျောင်းသားများသမဂ္ဂ အဖွဲ့ဝင်များက
လက်ရှိအခြေအနေတွင် ရန်ကုန်ပင်မ တက္ကသိုလ်အတွင်း၌ ကျောင်းသားသမဂ္ဂ
ပြန်လည်တည်ဆောက်ခြင်းကို ဦးစားပေး လုပ်ဆောင်သင့် မသင့်ဆိုသည့်
ခေါင်းစဉ်အောက်တွင် စကားရည်လုပွဲ ပြုလုပ်ခဲ့ကြောင်း သိရသည်။
Ref: first-11
0 comments:
Post a Comment