မြန်မာအစိုးရ
တပ်မတော်ပါဝင်မှ စစ်မှန်သော ငြိမ်းချမ်းရေး ဖော်ဆောင်နိုင်မည် ဖြစ်ကြောင်း
ရှမ်းပြည်ပြန်လည် ထူထောင်ရေး ကောင်စီဥက္ကဋ္ဌ ဒုတိယဗိုလ်ချုပ်ကြီး ယွက်ဆစ်က
ပြော သည်။
“ငြိမ်းချမ်းရေး ဖော်ဆောင်နိုင်ဖို့က အဘက်ဘက်က ပါဝင်ဖို့
လိုပါတယ်။ ဒါပေမယ့် တပ်(တပ်မတော်)ကတော့ အဓိကကျတဲ့ အခန်းကဏ္ဍမှာ ရှိပါတယ်” ဟု
၎င်းက ပြောသည်။ ၄င်း၏ သုံးရက်ကြာ နေပြည်တော် ခရီးစဉ်တွင်
ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့်
တွေ့ဆုံခဲ့ခြင်း မရှိခဲ့သော်လည်း ၄င်းအနေဖြင့်လည်း တွေ့ဆုံရန်
ဆန္ဒရှိ ခဲ့ကြောင်း ဆိုသည်။ တပ်ပိုင်းကိစ္စရပ်များ အပြန်အလှန် ယုံကြည်မှု
တည်ဆောက်နိုင်မှသာ အပစ်အခတ်ရပ်စဲရေး သဘောတူလက်မှတ် ရေးထိုးပြီးနောက်ပိုင်း
ပြန်လည်ဖြစ်ပွားလျက် ရှိသော နှစ်ဖက်တိုက်ပွဲများ လျော့ကျသွားမည်ဖြစ်ကြောင်း ၄င်းက ဆိုသည်။ တပ်ပိုင်းဆိုင်ရာ ကိစ္စရပ်များ ဆွေးနွေးနိုင်ရန်
နိုင်ငံတော်အစိုးရဘက်မှ တပ်မတော်ပိုင်းဆိုင်ရာ
ပြောရေးဆိုခွင့် ရှိသူတစ်ဦးအား ကေအိုင်အိုနှင့် ၃ ရက်ကြာ
တွေ့ဆုံဆွေးနွေးမှုအပြီး မေလ ၃၀ ရက်တွင် ထုတ်ပြန်ပြောဆိုခဲ့သည်။
သို့သော်
အခြေခံဥပဒေ၌ ပေးထားချက်များနှင့် တပ်မတော်ပိုင်း ဆိုင်ရာ ကဏ္ဍတွင်
အဓိကဖြစ်သော ကာကွယ်ရေးဦးစီးချုပ်သာ အဆိုပါ လက်နက်ကိုင်
အဖွဲ့အစည်းများနှင့် တိုက်ရိုက်တွေ့ဆုံ ဆွေးနွေးမည်ဆိုပါက ငြိမ်းချမ်းရေး
ဖော်ဆောင်မှု လုပ်ငန်း ပိုမိုမြန်ဆန်လာမည်ဖြစ်ကြောင်း နိုင်ငံရေးရာ
ကျွမ်းကျင်သူအချို့က ဆိုသည်။ “အပြန် အလှန် ယုံကြည်မှု တည်ဆောက်နိုင်ဖို့နဲ့
နယ်မြေ ဆက်စပ်နေတဲ့ တပ်တွေ တစ်ဖက်နဲ့တစ်ဖက် ညှိနှိုင်းဆောင်ရွက်နိုင်ဖို့
ဆက်ဆံရေးရုံးခွဲတွေကို ကျွန်တော်တို့ ထပ်မံဖွင့်လှစ် ပေးသွားမှာပါ” ဟု
နိုင်ငံတော်သမ္မတရုံးဝန်ကြီး ဦးအောင်မင်းက ပြောသည်။
အစိုးရနှင့် အပစ်အခတ်
ရပ်စဲရေး သဘောတူလက်မှတ် ရေးထိုးထားသော တိုင်းရင်းသား လက်နက်ကိုင်
အဖွဲ့အစည်းများသည် လက်မှတ်ရေးထိုးပြီးနောက်ပိုင်း ဒေသတွင်း ဖွံ့ဖြိုးရေးဆောင်ရွက်ရန် ကိစ္စများဆောင် ရွက်နိုင်သော်လည်း
တပ်ပိုင်းဆိုင်ရာ နေရာချ ထားရေးနှင့် တပ်ပိုင်းဆိုင်ရာ အသွင် ကူးပြောင်းရေး
လုပ်ငန်းစဉ်များတွင် အခက်အခဲများ ကြုံတွေ့နေရဆဲဖြစ်ကြောင်း သိရသည်ဟု ၂၀၁၃
ခုနှစ် ဇွန်လ ၁၃ ရက်နေ့ထုတ် Popular News ဂျာနယ်တွင် ဖော်ပြထားပါသည်။
0 comments:
Post a Comment