မလေးရှားနိုင်ငံတွင် သွားရောက်အလုပ်လုပ်ကိုင်သည့် မြန်မာလူမျိုးများ အသတ်ခံရမှု များကြောင့် ရန်ကုန်မြို့နှင့် အခြားမြို့ကြီးအချို့ရှိ အင်တာနက် ၀န်ဆောင်မှုဆိုင်များတွင် မလေးရှားသို့ ဖုန်းခေါ်ဆိုမှုများ များပြားလျက်ရှိသည်ဟု သိရသည်။
ရန်ကုန်မြို့ ဒဂုံမြောက်ပိုင်းရှိ အင်တာနက်ဆိုင်များတွင် နေ့စဉ် နံနက် ၇နာရီမှ ၈နာရီခွဲအတွင်း ည ၇နာရီမှ ၁၁နာရီအထိ မလေးရှားနိုင်ငံတွင် သွားရောက်အလုပ်လုပ်ကိုင်နေကြသော မိသားစုဝင်များရှိရာသို့ Skype ၊P-fingo များဖြင့် ဖုန်းခေါ်ဆိုမှုမှာ ယခင်လက တစ်နေ့လျှင် အကြိမ် ၂၀ခန့်သာရှိသော်လည်း ယခုအခါ အကြိမ် ၂၀၀နီးပါးအထိ များပြားလာနေကြောင်း ဆိုင်ပိုင် ရှင်များထံမှ သိရသည်။
“အရင်ကဆို ကျနော်တို့ဆိုင်မှာ မလေးနဲ့ ထိုင်းကို ဖုန်းခေါ်ဆိုကြိမ်နှုန်းက အတူတူလောက် ရှိတယ်။ ပြီးတော့ စင်္ကာပူ၊ ဒူဘိုင်း ပေါ့။ အခုတော့ မိသားစုဝင်တွေက မလေးမှာရှိနေတဲ့သူတွေ ကို စိတ်ပူကြပြီး ဖုန်းနဲ့ဆက်သွယ်စကားပြောကြတာပေါ့။ အထူးသဖြင့် မြန်မာတွေ အသတ်ခံရ တဲ့နေရာမှာ အလုပ်လုပ်နေကြတဲ့သူတွေ ရှိတဲ့ဆီကို ပိုဆက်ကြတယ်။ နေ့ကောညပါ ဆက်နေ ကြ တာပါ။”ဟု တောင်ဥက္ကလာပရှိ အင်တာနက်ဆိုင်ရှင်က ရှင်းပြသည်။
အလားတူ ပဲခူးတိုင်း၊ တောင်ငူမြို့ရှိ အင်တာနက်ဆိုင်များမှာလည်း နေ့လည်ပိုင်းနှင့် ညဦးပိုင်း များတွင် မလေးသို့ ဖုန်းခေါ်ဆိုမှုများနေပြီး မြို့တွင်းသာမက အနီးနားရှိရွာများမှလာရောက်ခေါ် ဆိုနေကြသလို ကရင်ပြည်နယ်၊ ဖားအံမြို့ရှိ အင်တာနက်ဆိုင် များ၌လည်း တစ်မိနစ် ဖုန်းခေါ် ဆိုခ ၇၅ကျပ်ရှိပြီး ယခင်လများက တစ်လလျှင် ၁၀ကြိမ်ခန့်သာ ခေါ်ဆိုပေးရပြီး ယခုအခါ တစ်နေ့လျှင် ၁၀ကြိမ်ကျော် ခေါ်ဆိုပေးနေရသည်။
မလေးရှားနိုင်ငံတွင် မေလ ၃၀ရက်နှင့် ၃၁ရက်နေ့မှစ၍ မြန်မာအလုပ်သမားများ အသတ်ခံရမှု များကြောင့် ပြည်တွင်းရှိမိသားစုဝင်များမှ စိတ်ပူပန်သဖြင့် ယခုကဲ့သို့ ဖုန်းခေါ်ဆိုမှုများမြင့်တက် လာရခြင်း ဖြစ်သည်။
KIC (Karen Information Center)
0 comments:
Post a Comment