အစိုးရ ရုံးပိတ်ရက်တွေနဲ့ တနင်္ဂနွေရုံးပိတ်ရက်တိုင်းမှာ အခါအားလျှော်စွာ
နေ့ချင်းပြန်ခရီးထွက်ခြင်း ၊ဈေးဝယ်ထွက်ခြင်း ၊ ရုပ်ရှင်ကြည့်ခြင်း
၊အပြင်ထွက်ပြီး မိသားစု ထမင်းလက်ဆုံ ထွက်စားခြင်း၊ ဆွေမျိုးတွေဆီ
မိသားစုလိုက် အလည်သွာခြင်းတွေလုပ်ပြီး ၊ တပတ်လုံး အလုပ်ကိုယ်စီနှင့်
မျက်နှာမြင်ဖို့တောင် ခက်ခဲတဲ့ ကျွန်မတို့မိသားစုရဲ့  အားလပ်ရက်ကို ၊
နွေးထွေးစွာနဲ့ အတူဖြတ်သန်းကြပါတယ် ။ အပြင်မထွက်ဖြစ်တဲ့ ရက်တွေမှာတော့
အိမ်မှာမုန့်လုပ်စားပြီး ၊ ရုပ်ရှင်ကြည့်လို့ အချိန်ဖြုန်းခဲ့ကြပါတယ် ။
ဒီနေ့ ၁၆-၆-၁၃ မှာတော့ ၊ ကျွန်မအစ်ကိုနဲ့ ယောင်းမ ခရီးထွက်သွားတာကြောင့်
ခါတိုင်းလို မိသားစုလူမဆုံဖြစ်တဲ့အခါ ၊ အိမ်မှာပဲ တစ်ခုခုလုပ်စားတော့မယ်
တွေးတုန်း ၊ အပြင်ထွက်ရအောင် သမီးရေလို့ အမေကစကားစလာပါတယ် ။
အသိလူနာသတင်းသွားမေးမှာ အင်းစိန်ဆေးရုံမှာ လိုက်ခဲ့ပါ သမီးရယ်လို့
အဖော်ခေါ်တာနဲ့ ဘယ်သူ ဘယ်ဝါမှန်းမသိပဲ ၊ လိုက်သွားခဲ့မိပါတယ် ။
အင်းစိန်ဆေးရုံရဲ့ ဝင်ပေါက်ကိုရောက်တော့ ၊ ကျွန်မကို ဒီနားမှာ
ခဏနေခဲ့ဦးလို့ပြောပြီး မနီးမဝေးမှာ ရပ်နေတဲ့ ဆေးရုံဝန်ထမ်းတစ်ယောက်ကို
တစ်ခုခုသွားမေးတာ မြင်လိုက်ရပါတယ် ။ သူတို့နှစ်ယောက်ဘာတွေပြောနေကြလဲ
မကြားနိုင်ပေမယ့် ဆေးရုံဝန်ထမ်းရဲ့  လက်ဟန်ခြေဟန်ကို ကြည့်ပြီး
လမ်းညွှန်နေတာပဲလို့ ရိပ်စားမိပါတယ် ။ ခဏကြာတော့ အမေပြန်ရောက်လာပြီး
ခွဲစိတ်ဆောင် အပေါ်ထပ်လို့ပြောကာ ကျွန်မလက်ကိုဆွဲလို့ ခပ်သွက်သွက်
တက်သွားခဲ့ကြတယ် ။ ခွဲစိတ်ဆောင် အပေါ်ထပ်ရောက်ပြန်တော့
တာဝန်ကျသူနာပြုတစ်ယောက်ကို ၊ မီးလောင်တဲ့ အဖွား ဘယ်ကုတင်လဲ နာမည်
ဘယ်သူလဲလို့ မေးတဲ့အခါ နာမည်လည်းမသိပဲ မသေချာမရေရာပဲ လူနာလာမေးရလားဆိုတဲ့
စိတ်မျိုးဖြစ်ပြီး ဘ၀င်မကျဖြစ်မိပါတယ် … ။
%%%%%%%%%%%%%%%%%
တခြားလူနာ ကုတင်တွေထက် ၊ အမေသတင်းလာမေးတယ်ဆိုတဲ့ လူနာရဲ့
ကုတင်ဘေးပတ်လည်မှာ ၀ိုင်းကြည့်သူတွေများနေခဲ့တယ် ။ ကုတင်ပတ်လည်
ဝိုင်းကြည့်နေတဲ့ လူတွေကြား အမေက တိုးပြီး၊ လူနာရှင်ဘယ်သူပါလဲလို့ ခပ်ဖွဖွ
မေးတဲ့အခါ ကျွန်မ အံ့သြရပြန်ပါတယ် ။ အသိလူနာကို သတင်းလာမေးတယ်လည်း
ပြောသေးတယ် လူနာဘယ်အဆောင်လည်း မသိ ၊ လူနာနာမည်လည်းမသိ ၊ လူနာရှင်ဘယ်သူလည်း
မသိလောက်အောင် မရေရာတဲ့ အမေ့ကို ကျွန်မ စိတ်ထဲ ဘ၀င်မကျ ဖြစ်မိတာတော့
အမှန်ပါ ။ သို့လော့ သို့လောဖြင့် အတွေးတွေ နယ်ချဲ့ နေတုန်း ၊
လူနာလက်လေးကိုင်ရင်း ဘေးက ထိုင်နေတဲ့ သတ်လတ်ပိုင်းအရွယ် အမျိုးသမီးတဦးက
ကျွန်မက လူနာရှင်ပါလို့ပြောတာကြောင့် တောင်စဉ်ရေမရ တွေးနေတဲ့ အတွေးတွေ
လွင့်ပြယ်ခဲ့ရပါတယ် ။
အမေက လူနာရှင်အမျိုးသမီးကို တရင်းတနှီးပြုံးပြရင်း သူမလာရတဲ့အကြောင်းကို
ပြောပြတဲ့အခါမှာတော့ ဒုတိယအကြိမ် ကျွန်မ အံ့သြရပြန်ပါတယ် ။ တကယ်တာ့
ဒီလူနာနဲ့ ၊ အမေနဲ့ အသိကျွမ်းလည်း မဟုတ်ခဲ့ပါဘူး ၊ အသိလို့ပြောပြီး
ကျွန်မကိုခေါ်ခဲ့တာက သူမရဲ့ လူနာသွားကြည့်ချင်တဲ့ စိတ်ကူးကို
အဟန့်တားလုပ်မှာ စိုးတာကြောင့်ပါပဲ … ။ ဒီနေ့မနက် သတင်းစာမှာ အသက်
၉၆နှစ်အရွယ် အဖွားတစ်ယောက် အိမ်မှာ တယောက်တည်းရှိနေချိန် ၀ါယာရှော့
ဖြစ်ပြီး ကိုယ်ခန္ဓာပေါ်က အရေပြား တစ်ချို့ မီးလောင်ကျွမ်းရတဲ့ သတင်း
ပါလာလို့ ၊ စိတ်မကောင်းဖြစ်ပြီး အဖွားကိုလည်း အားပေးရင်း ၊ တတ်နိုင်သလောက်
ကုသစရိတ်လေး လှူဒါန်းလိုလို့ ရောက်ခဲ့ပါသတဲ့ ။ လူနာရှင်ကို သတင်းမေးပြီး
အလှူငွေ တသိန်းထုတ်ပေးလို့ အဖွားကျန်းမာပါစေ ဆုတောင်းပြီး ပြန်ခဲ့ကြပါတယ် …
။ အမေ့ရဲ့ အဖွားဖြစ်သူကလည်း အသက် ၁၀၀ပြည့်ခါနီးထိ
ကျန်းကျန်းမာမာနေသွားခဲ့ပြီးမှ မိသားစုကို စွန့်ခွာသွားခဲ့တာမို့ ၊
အသက်ကြီးသူ အဖိုးဖွားတွေတွေ့ တိုင်း ဆုံးပါးသွားတဲ့ အဖွားကို
အလွမ်းဖြေတဲ့အနေနဲ့ ၊ အမေတတ်နိုင်သလောက် ကူညီခဲ့တယ် ၊ ဒါနလုပ်ခဲ့တယ် ။
အဲ့ဒီအမူကျင့်တွေရှိခဲ့တဲ့ အမေ့စိတ်ကူးကို သိပါလျှက် နားမလည် ပေးပဲ …
ထင်ရာဆွဲ တွေးခဲ့မိတယ် ။ တကယ်တမ်း အမေ့ရဲ့ စိတ်ကူးကို သိရတဲ့အခါ ၊
အပြစ်တင်စောပြီး ဘ၀င်မကျဖြစ်ခဲ့တဲ့ ကျွန်မရဲ့ စိတ်ဓါတ်မပြည့်ဝမှုကို
ပြုပြင်လိုစိတ်လည်း ဖြစ်မိတယ် ရှက်လည်းရှက်မိပါတယ် ။ နေအိမ်လည်း
မီးလောင်ကျွမ်းခဲ့လို့ ဘာပစ္စည်းမှ ပြန်မရခဲ့တဲ့အပြင် ၊ အိမ်ရဲ့
အသက်အကြီးဆုံးအဖွားဖြစ်သူ ဘေးအိမ်တွေကောာင်းမှုကြောင့် ကံကောင်းစွာ
အသက်ရှင်ကျန်ခဲ့ပေမယ့် ၊ အရေပြား တော်တော်များများ လောင်ကျွမ်းခဲ့တာကြောင့်
အခုဆို အင်းစိန်ဆေးရုံမှာ ဆေးကုသမှုခံယူနေတဲ့ အသက် ၉၆ နှစ်အရွယ်
အဖွားအတွက် ဆေးကုသစရိတ် လိုအပ်နေပါတယ် ။ လူနာရှင်ကို အားနာနာနဲ့ပဲ
ဖွင့်မေးရင်း၊ ဓါတ်ပုံရိုက်ခွင့်လည်းတောင်းကာ မီးလောင်မှုဖြစ်ပွားရတဲ့
အကြောင်းရင်းတစ်ချို့ကိုလည်း မေးမြန်းခဲ့မိပါတယ် ။ သူငယ်ချင်းတွေနဲ့
တိုင်ပင်ပြီး ဆေးကုသမှု စရိတ်အတွက် အကူညီပေးလိုစိတ် ဖြစ်မိတာကြောင်ပါ ။
%%%%%%%%%%%%%%%%%
အဖွားရဲ့ သမီးဖြစ်သူနဲ့ စကားပြောရင်း ဖြစ်ပွားပုံအကြောင်းကိုလည်း
တစွန်းတစ သိခွင့်ရခဲ့ပါတယ် ။ ၁၅-၆-၁၃ ညနေ ၄နာရီခွဲခန့်မှာ အိမ်က အတူနေ
မိသားစု(၄)ယောက် ကိစ္စကိုယ်စီဖြင့် အပြင်သို့ ခဏတာရောက်နေခဲ့ပါတယ်တဲ့ ။
တအိမ်လုံးမှာ အသက် ၉၆ နှစ်အရွယ် အဖွားဒေါ်ခင်မေ တစ်ယောက်တည်းသာ ကျန်ခဲ့ပါတယ်
။ အသက်ရွယ်ကြီးရင့်ပေမယ့် ကျန်းမာရေးကောင်းပြီး ကိုယ့်ဝေယျာဝစ္စ
ကိုယ်လုပ်နိုင်သေးကြောင်းလည်း သိရပါတယ် ။ အဖွားဒေါ်ခင်မေရဲ့ သမီးဖြစ်သူက
အပြင်ရောက်နေချိန် နေအိမ်မီးလောင်တာကို သိသိချင်း ၊ အိမ်သို့
ပြန်ပြေးခဲ့ပေမယ့် အိမ်ရောက်တဲ့အခါမှာ မီးလောင်ပြီးပြာတောင် ကျနေခဲ့ပါပြီ။(
ဘယ်အိမ်က စပြီး ဘယ်လို မီးလောင်ခဲ့သလဲဆိုတာတော့ အပြင်ရောက်နေချိန်မို့
ရေရေရာရာ မသိခဲ့ဘူးလို့လည်းပြောပါတယ် )အမေဖြစ်သူ အဖွားဒေါ်ခင်မေ တစ်ယောက်
မီးထဲပါသွားပြီလို့ထင်ပြီး ယူကြုံးမရုဖြစ်ကာ ငိုကြွေးနေတုန်း ၊ ဘေးလူတွေက
ဒီအိမ်က အဖွားကို တာဝန်သိ မီးသတ်ဝန်ထမ်းတစ်ဦးက ခဲရာခဲဆစ်ကယ်ထုတ်ခဲ့ပြီး
ဆေးရုံသို့ပို့လိုက်ပြီဆိုတဲ့ သတင်းကို ပေးခဲ့ပါတယ်တဲ့ ။
သတင်းကြားကြားချင်း ဆေးရုံကိုလိုက်လာတဲ့အခါ အခုလို
အရေပြားတွေလောင်ကျွမ်းခံရတဲ့ ဒဏ်ရာတွေနဲ့ ဝေဒနာ ပြင်းထန်စွာ ခံစားနေရတဲ့
အမေဖြစ်သူကိုတွေ့ရတာပါပဲလို့ပြောရင်း မျက်ရည်ကျရှာပြန်တယ် ။ ပိုင်ဆိုင်သမျှ
ဆုံးရှံးရတဲ့ ပူဆွေးသောကအပြင် ၊ အသက်မသေသော်လည်း မီးလောင်ဒဏ်ရာကြောင့်
ဝေဒနာပြင်းထန်စွာ ခံစားနေရပြီး လိုအပ်တဲ့ ဆေးကုသမှု ခံယူဖို့
စိတ်ဒုက္ခရောက်နေရှာတဲ့ သမီးဖြစ်သူရဲ့ ဗျာပါဒကို မျက်မြင်တွေ့ ခဲ့ပြီး
ကိုယ်ချင်းစာစိတ်ဖြစ်မိခဲ့တာကြောင့် ၊ ရွာထဲမှာ
အစပြုပြီးသိကျွမ်းခွင့်ရခဲ့တဲ့ ပြောမနာ ဆိုမနာ သူငယ်ချင်းဖြစ်သူ
ကိုအမတ်မင်း ၊ကိုသူရဇော် ၊ ကိုအာဂ ၊ မနွယ်ပင် ၊ မရွှေအိတို့နဲ့ တိုင်ပင်ပြီး
တတ်နိုင်သလောက် ဆေးကုသစရိတ် လှူဒါန်းကြဖို့ စိတ်ကူးရခဲ့ပါတယ် ။
ပို့စ်ဖတ်ပြီး မီးသင့်ဒဏ်ပြင်းထန်စွာခံစားနေရသူ အဖွားဒေါ်ခင်မေအတွက်
ကျွန်မတို့နဲ့အတူဆေးကုသစရိတ် အကူညီပေးလိုစိတ်ဖြစ်လာလျှင်လည်း အောက်ပါ
ဖုန်းနံပါတ်များကို ဆက်သွယ်ပြီး ကုသိုလ်ယူနိုင်ပါတယ် ။
နေ့စဉ်နှင့်အမျှကုသမှုခံယူနေရတာကြောင့် ဆေးကုသမှုစရိတ်
ပါဝင်ကုသိုလ်ယူလိုသူများအနေဖြင့် ၂၃-၆-၁၃ (တနင်္ဂနွေ) မနက် ၁၀
နာရီထက်နောက်မကျပဲ ဆက်သွယ်ပေးကြပါလို့ မေတ္တာရပ်ခံချင်ပါတယ် ။
ကိုသူရဇော် – ၀၉၄၂၀၀၆၉၅၀၂ကိုအာဂ – ၀၉၄၂၁၀၂၉၁၁၇
ကိုအမတ်မင်း – ၀၉၅၀၈၁၉၆၉
Etone – ၀၉၇၃၁၄၄၄၂၁
မရွှေအိ – ၀၉၇၃၁၈၉၂၆၁
မနွယ်ပင် – ၀၉၄၂၀၁၄၃၂၉၀
မီးလောင်ဒဏ်ခံစားရသူ အဖွားရဲ့ ဓါတ်ပုံကိုလည်းခွင့်တောင်းပြီးရိုက်ယူခဲ့ပါတယ်…။မိမိစိတ်ကို နိုင်မှသာ အောက်ကိုသွား ကြည့်ကြပါလို့ ကြိုအသိပေးပါရစေနော် ။
-
-
-
-
-
-
Ref:mandalaygazette.org
0 comments:
Post a Comment