စက်တင်ဘာလ ၁၇ ရက်နေ့တွင် ကျင်းပသည့် ရန်ကုန်တိုင်းဒေကြီး လွှတ်တော် အစည်းအဝေးတွင် ဆေးလိပ်နှင့် ဆေးရွက်ကြီး ဥပဒေ အသက်ဝင်စေရေးနှင့် ပတ်သက်၍ ဆွေးနွေးစဉ်၎င်းက ယင်းသို့ ပြောကြားခဲ့ခြင်း ဖြစ်သည်။
စတင်ဖမ်းဆီးမည့် ရက်ကိုမူ အသေးစိတ် ပြောကြားခြင်းမရှိသေးပေ။
ဆေးလိပ်များကို အလိပ်လိုက် ရောင်းဝယ်နေမှု များသည် ဆေးလိပ်၏ ဘေးထွက်ဆိုးကျိုး များကို ပိုမိုကျယ်ပြန့် လာစေသောကြောင့် အရေးယူ ဆောင်ရွက်မည် ဖြစ်ကြောင်း ဗိုလ်မှူးကြီးတင်ဝင်းက ဆိုသည်။
"အလိပ်လိုက်ရတော့ လွယ်လွယ်ကူကူပဲ တွေ့တဲ့နေရာမှာ သောက်နေကြပါတယ်" ဟု ၄င်းကဆိုသည်။
ဆေးလိပ်ရောင်းဝယ်မှုကို ထိန်းချုပ်ခြင်းဖြင့် လူမှုရေး၊ စီးပွားရေးနှင့် နိုင်ငံရေး အတွက် အဓိကကျသော အနာဂတ်လူငယ် များအတွက် ကောင်းမွန်သော အလားအလာများ ရှိလာနိုင်မည် ဖြစ်ကြောင်း ရန်ကင်းမြို့နယ် တိုင်းဒေသကြီး လွှတ်တော် ကိုယ်စားလှယ် ဦးသောင်းကျော်က ပြောကြားသည်။
ကမ္ဘာ့နိုင်ငံအများစုတွင် ဆေးလိပ် အလိပ်လိုက် ရောင်းချခြင်းမရှိကြောင်း၊ မြန်မာနိုင်ငံတွင်သာ ဆေးလိပ် တစ်လိပ်ချင်း ရောင်းဝယ်မှု ပြုလုပ်နေကြောင်း ၄င်းကဆိုသည်။
"ရောင်းတဲ့သူ ကတော့ ရောင်းမှာပဲ၊ ဆေးလိပ်သောက်တာ ထိန်းချုပ်ချင်ရင် အစိုးရရဲ့ ဆေးလိပ်ကုမ္ပဏီတွေ လိုင်စင်ချ ပေးမှုကို ပြင်သင့်တယ်" ဟု ပန်းဘဲတန်း မြို့နယ်တွင် နိုင်ငံခြားဖြစ် စီးကရက် အမျိုးမျိုးရောင်းချသူ တစ်ဦးကဆိုသည်။
ယင်းသို့ ဆေးလိပ်တိုက်ဖျက်ရေး လုပ်ဆောင်ရာတွင် ဆေးလိပ် တစ်လိပ်ချင်း ရောင်းဝယ်မှုကို တားဆီးခြင်း၊ အများပိုင်ဧရိယာ များတွင် ဆေးလိပ်သောက်ခြင်းကို ထိန်းချုပ်ခြင်း အပြင် ဆေး၊ ဆေးလိပ်နှင့် ဆေးရွက်ကြီး သွင်းကုန်ဆိုင်ရာ အခွန်စနစ် နှင့် ဆေးလိပ်ထုတ်လုပ်သော ကုမ္ပဏီ များကို အခွန်မြှင့်တင်ခြင်း ပြုလုပ်မှသာ ထိထိရောက်ရောက် ထိန်းချုပ်ရာ ရောက်မည် ဖြစ်ကြောင်း ကျန်းမာရေးဆိုင်ရာ ပညာရှင်များက သုံးသပ်ကြသည်။
"စင်ကာပူဆို ဆေးလိပ် ကုမ္ပဏီတွေ အခွန်အများကြီးသွင်းရတော့ ဆေးလိပ် ဈေးကြီးတယ်။ ကျွန်တော်ဆို ဝယ်မသောက်နိုင်လို့ ဆေးလိပ်ပြတ်သွားတယ်" ဟု စင်ကာနိုင်ငံတွင် သွားရောက် အလုပ်လုပ်ကိုင်နေသူ အသက် ၂၄ နှစ် အရွယ်ရှိ ကိုငြိမ်းမောင်က ဆိုသည်။
စက်တင်ဘာ ၁၃ ရက်နေ့တွင် ကျင်းပသော ရန်ကုန်တိုင်းဒေသကြီး လွှတ်တော် အစည်းအဝေးတွင် ရန်ကင်းမြို့နယ် တိုင်းဒေသကြီး လွှတ်တော်ကိုယ်စားလှယ် ဦးသောင်းကျော်က ဆေးလိပ်နှင့် ဆေးရွက်ကြီး ဥပဒေ အသက်ဝင်စေရေး ပြည်နယ်အစိုးရက အမြန်ဆုံး ဆောင်ရွက်ပေးရန် တိုက်တွန်း ကြောင်း အဆိုတင်သွင်းခဲ့ခြင်း အပေါ် ယင်းသို့ ပြန်လည်ဆွေးနွေးခြင်း ဖြစ်သည်။
ဆေးလိပ်တစ်လိပ်ချင်း ရောင်းချသူများကို ပထမကြိမ် ဖမ်းဆီးရမိပါက ငွေဒဏ် ကျပ်တစ်သောင်းမှ ကျပ်သုံးသောင်းအထိ အပြစ်ပေးနိုင်ပြီး ဒုတိယအကြိမ် ဖမ်းဆီးမိပါက ငွေဒဏ် ကျပ်သုံးသောင်းမှ ကျပ် တစ်သိန်းအထိ အရေးယူနိုင်ကြောင်း ၂၀၀၆ ခုနှစ် ဆေးလိပ်နှင့် ဆေးရွက်ကြီး ထွက်ပစ္စည်းများ ထိန်းချုပ်ရေးဥပဒေတွင် ဖော်ပြ ပါရှိသည်။
မြန်မာနိုင်ငံတွင် ရောင်းချနေသည့် စီးကရက်ဘူးများတွင် အသက် ၁၈ နှစ် မပြည့်သေးသူများ ရောင်းချခြင်းမပြုရ၊ စီးကရက် သောက်ခြင်းသည် ကျန်းမာရေးကို ဆိုးရွားစွာ ထိခိုက်နိုင်သည်ဟု ဖော်ပြ ထားသော်လည်း ယင်းအပေါ်ရောင်းချသူများ ရော၊ သောက်သုံးသူများပါ အလေးအနက် ထားခြင်း မရှိသဖြင့် ထိရောက်ခြင်းမရှိပေ။
ဆေးလိပ်နှင့် ဆေးရွက်ကြီးထွက် ပစ္စည်းထိန်းချုပ်ရေး ဥပဒေတွင် အသက်၁၈ နှစ် မပြည့်သူများကို ဆေးလိပ်ရောင်းချခြင်း၊ စာသင်ကျောင်းများ အနီးတွင် ဆေးလိပ်ရောင်းချခြင်း၊ အခွန်ဆောင်ထားသည့် အမှတ်အသား မပါဝင်သော ဆေးလိပ်များကို ရောင်းချခြင်း၊ အသက် ၁၈ နှစ် မပြည့်သောသူ များကို မရောင်းရဟူသည့် သတိပေး စာသား မပါသောဆေးလိပ်များ ရောင်းချခြင်းတို့ကို ပထမအကြိမ် ဖမ်းဆီး ရမိပါက ငွေဒဏ် ကျပ်တစ်သောင်းမှ ကျပ် သုံးသောင်းအထိ အရေးယူနိုင်ပြီး ဒုတိယအကြိမ် ဖမ်းဆီးရမိပါက ငွေဒဏ် ကျပ်သုံးသောင်းမှ ကျပ်တစ်သိန်းအထိ အပြစ်ပေး အရေးယူနိုင်ကြောင်း ဖော်ပြထားသည်။
နိုင်ငံတော် အေးချမ်းသာယာရေးနှင့် ဖွံ့ဖြိုးရေးကောင်စီ လက်ထက် ၂၀၀၆ ခုနှစ် ကတည်းက ထုတ်ပြန် အတည်ပြုပြီးဖြစ်သည့် ဆေးလိပ်နှင့်ဆေးရွက်ကြီးထွက် ပစ္စည်း ထိန်းချုပ်ရေးဥပဒေ အသက်ဝင်စေရန် အစိုးရက ဆောင်ရွက်မည်ဖြစ်ကြောင်း ပထမအကြိမ် အမျိုးသားလွှတ်တော် သတ္တမပုံမှန် အစည်းအဝေးတွင် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန ပြည်ထောင်စုဝန်ကြီး ဦးဝင်းမြင့်က ပြောကြားထားသည်။
ပြည်တွင်းတွင် ရောင်းချနေသည့် ဆေးလိပ်များတွင် ဈေးကွက်ဝေစု အများဆုံး ရရှိထားသည့် Red Ruby ၊ Premium Gold ဆေးလိပ်များကို မြန်မာ့စီးပွားရေး ဦးပိုင်လီမိတက်က ထုတ်လုပ်နေခြင်း ဖြစ်ပြီး ဈေးကွက်အတွင်း ပြန်လည် ဝင်ရောက်လာသည့် နာမည်ကျော် London စီးကရက် မှာလည်း မြန်မာ့ စီးပွားရေးဦးပိုင် လီမိတက်နှင့် လန်ဒန်ကုမ္ပဏီတို့ ဖက်စပ် လုပ်ကိုင်နေခြင်း ဖြစ်သည်။
The Voice Weekly
0 comments:
Post a Comment