ပြဇာတ်များအတွင်း စိတ်ကူးယဉ် ဇာတ်ကောင်ဖြစ်သော နဂါးကြီးများကို ပုံဖော်ပြသရာ၌ လူအများ ဝင်နေရသည့် အရုပ်ကြီးများကို အသုံးပြုခဲ့သော်လည်း Fannyကမူ ယင်းထက်ပို၍ စမတ်ကျသည်ဟု ဆိုနိုင်မည် ဖြစ်သည်။
နဂါးကြီး Fannyသည် ကမ္ဘာပေါ်တွင် တည်ဆောက်ပြီးသမျှ အကြီးမားဆုံး လမ်းလျှောက်နိုင်သည့် စက်ရုပ်ကြီးအဖြစ် သတ်မှတ်ခံထားရကြောင်း သိရသည်။ ဂျာမနီနိုင်ငံရှိ အီလက်ထရောနစ် ကုမ္ပဏီ တစ်ခုဖြစ်သော Zollner Elektronik AGက ယင်းနဂါးကြီးကို ဒီဇိုင်းထုတ် ဖန်တီးခဲ့သည်။ Fannyသည် အမြင့် ပေ(၃၀)ရှိသော စက်ရုပ်ကြီးဖြစ်ပြီး ခြေ(၄)ချောင်းလုံးဖြင့် ဟန်ချက်ညီစွာ လမ်းလျှောက်နိုင်သည်။ ၎င်း၏ အတောင်ပံကြီးများကို ဆန့်ထုတ်လိုက်ပါက အရှည်ပေ(၄၀)ထိ ရှိနေမည် ဖြစ်သည်။
Fannyသည် အာခံတွင်းမှ မီးများကိုလည်း မှုတ်ထုတ်နိုင်သည်။ ၎င်းကို ဒီဇယ်တာဘိုအင်ဂျင် နှစ်လုံးဖြင့် မောင်းနှင်ပြီး အဝေးထိန်း ကိရိယာ (၄)ခုဖြင့် ထိန်းချုပ်နိုင်ကြောင်း သိရသည်။ ထိုစက်ရုပ်ကြီးကို ဂျာမန်ရိုးရာ ပြဇာတ်တစ်ခုဖြစ်သည့် Drachenstichအတွက် ဖန်တီးခဲ့ခြင်း ဖြစ်သည်။ Fannyကို (၂၀၁၄)ခုနှစ်အတွက် ထုတ်ဝေမည့် ဂင်းနစ် ကမ္ဘာ့မှတ်တမ်း စာအုပ်တွင် လမ်းလျှောက်နိုင်သည့် ကမ္ဘာ့အကြီးမားဆုံး စက်ရုပ်ကြီးအဖြစ် စာရင်းသွင်း ဖော်ပြထားသည်။ Drachenstichသည် လွန်ခဲ့သော နှစ်ပေါင်း(၅၀၀)ခန့် ကတည်းက အစဉ်အဆက် ပြောဆိုလာသည့် ယုံတမ်းပုံပြင် တစ်ခုကို အခြေခံထားသည်။
နဂါးကြီး Fanny၏ လှုပ်ရှားလည်ပတ်မှုကို ဟိုက်ဒရောလစ် ပတ်လမ်း(၂)ခုဖြင့် ထောက်ပံ့ပေးထားပြီး ဒီဇယ်ဆီ (၁၆၅)လီတာထိ ဖြည့်တင်းပေးရသည်။ နဂါးကြီး၏ ကိုယ်ထည်အတွင်းတွင် အရှည် (၂၄၆၅)ပေရှိသည့် ဝါယာကြိုးများ သွယ်တန်းထားသည်။ ထို့အပြင် စင်မြင့် ဖျော်ဖြေမှုများ၌ အသုံးပြုရန် သွေးတု လီတာ(၈၀)ကိုလည်း ထည့်သွင်းပေးထားသည်။ ပြဇာတ်ထဲတွင် လှံဖြင့် အစိုက်ခံလိုက်ရချိန်၌ ယင်းသွေးများကို မှုတ်ထုတ်စွန်းထင်းစေမည် ဖြစ်သည်။ Fanny၏ ခြေထောက်များသည် (၇)ဒီဂရီ လှည့်ပတ် လှုပ်ရှားနိုင်ပြီး ယင်းအခြေအနေကြောင့် ထောင့်စွန်းနေရာများထိ စည်းချက်ကျကျ ဦးတည် သွားလာနိုင်မည် ဖြစ်သည်။
Zollner Elektronik AGမှ ပြောရေးဆိုခွင့်ရ ပုဂ္ဂိုလ်တစ်ဦးက "ဒီစက်ရုပ်ကြီး ဖန်တီးနိုင်တာက တီထွင်သူတွေ၊ ဒီဇိုင်နာတွေ အားလုံးအတွက် တက်ကြွစရာ ဖြစ်ခဲ့ပါတယ်။ Fannyဟာ အဝေးထိန်း ကိရိယာနဲ့ ခြေ(၄)ချောင်းလုံးကို စည်းချက်ညီညီ လှုပ်ရှားအောင် ခိုင်းစေနိုင်တယ်။ ဂျာမနီရဲ့ သက်တမ်းအရင့်ဆုံး ရိုးရာပြဇာတ် တစ်ခုမှာ ခေတ်အမီဆုံး နည်းပညာတစ်ခု ပါဝင်လာတာကတော့ ထူးခြားလွန်းပါတယ်"ဟု မှတ်ချက်ပြု ပြောဆိုသွားသည်။ Fannyကို (၂၀၁၂)ခုနှစ်၊ စက်တင်ဘာ (၂၇)ရက်နေ့တွင် အောင်မြင်စွာ အပြီးသတ် တည်ဆောက်နိုင်ခဲ့သည်။
Planet Myanmar Network
0 comments:
Post a Comment