ရင်းနှီးမြှုပ်နှံမှုများ ၀င်ရောက်လာခြင်းကြောင့် ရန်ကုန်မြို့ရှိ အိမ်ငှားနှင့် မြေနေရာ ဈေးနှုန်းမြင့်တက်

ဗဟန်းမြို့နယ်ရှိ တိုက်ခန်းများကို တွေ့ရစဉ် (ဓာတ်ပုံ-အောင်ဇော်ထွန်း)

မြန်မာနိုင်ငံ အတွင်းသို့ နိုင်ငံတကာမှ ရင်းနှီးမြှုပ်နှံရန်အတွက် စိတ်ဝင်စားလျက်ရှိပြီး လုပ်ငန်းအများစုတွင် စတင်ရင်းနှီးမြှုပ်နှံနေပြီ ဖြစ်သောကြောင့် ရန်ကုန်အိမ်ခြံ၊ မြေဈေးကွက် အတွင်းတွင် အိမ်ငှားရမ်းခ ဈေးနှုန်း များ မြင့်တက်လာကြောင်း ရန်ကုန်အိမ်ခြံ၊ မြေ ဈေးကွက်အတွင်းမှ စုံစမ်းသိရှိရသည်။ 

"အိမ်ငှားခဈေးနှုန်းတွေက ကမ္ဘာအေးဘက်ခြမ်း၊ ဗဟန်းမြို့နယ်၊ မရမ်းကုန်းမြို့နယ် အတွင်းတွေမှာ လုံးချင်း အိမ်ငှားခ ဈေးတွေက နှစ်ဆနီးပါး မြင့်တက်လာတယ်။ ရိုးရိုး တိုက်ခန်းတွေဆိုရင် တစ်သိန်းနဲ့ ငှားဖို့ မလွယ်တော့ဘူး။ အခုလို ဈေးတွေတက်နေတဲ့အတွက် မဖြစ်မနေ အိမ်ငှားရတဲ့ သူတွေပဲ ငှားကြတော့ တယ်" ဟု ရွှေဥဒေါင်းမင်း အိမ်ခြံမြေ လုပ်ငန်းမှ ဦးကျော်စွာလင်းက ပြောကြားသည်။ ယခုအခါ တွင် မြန်မာနိုင်ငံ အတွင်းသို့ နိုင်ငံတကာမှ ရင်းနှီးမြှုပ်နှံရန် အတွက်သော်လည်းကောင်း၊ ထို့အပြင် ခရီးသွား မြို့တော် ဖြစ်လာသည့်အတွက် နိုင်ငံခြားသားများ အများအပြား ၀င်ရောက်လာခြင်း တို့ကြောင့် မြင့် တက် လာ ရခြင်းဖြစ်ကြောင်း ယင်းကပြောသည်။

"အရင်ကဆို နိုင်ငံခြားသားတွေက ဟိုတယ်တွေမှာငှားပြီး နေလည်းနေတယ် ရုံးခန်းလည်း ဖွင့်တယ်။ အခု ဆို ဟိုတယ်တွေက သီးသန့်နေခွင့်ပဲပြုတော့တယ်။ ရုံးခန်းဖွင့်ခွင့် မပြုတော့ဘူး။ အဲဒါကြောင့် လုံးချင်း အိမ်တွေ ကို အခု အငှားများလာတယ်" ဟု ၎င်းကပြောသည်။ မရမ်းကုန်းမြို့နယ်၊ ဗဟန်း မြို့နယ်၊ ကမ္ဘာအေးဘုရားလမ်း စသည့်မြို့နယ်များရှိ လုံးချင်းအိမ်ငှား ဈေးနှုန်းမှာ ယခင်က သိန်းသုံးဆယ်သာ ရှိခဲ့ရာမှ ယခုအခါတွင် သိန်း ၅၀၊ သိန်း ၆၀ ထိ ဈေးမြင့်တက်ခဲ့ပြီး ရိုးရိုးတိုက်ခန်း အိမ်ငှားခတွင်မူ ကျပ်ငွေ တစ်သိန်းဖြင့် ငှားရမ်းမရတော့ဘဲ ၁၂၀၀၀၀ မှ ၁၅၀၀၀၀ ထိ မြင့်တက်သွားကြောင်း သိရသည်။ မြို့တွင်း အချက်အချာကျသည့် နေရာနှင့် နီးစပ်သည့် မြို့နယ်များဖြစ်သော သာကေတ၊ ဒေါပုံကဲ့သို့ နေရာများတွင် လမ်းမတန်းများရှိ မြေနေရာများမှာ တစ်ပေလျှင် တစ်သိန်းခွဲ၊ နှစ်သိန်းမှ သုံးသိန်းအထိ ပေါက်ဈေး ရှိကြောင်း အဓိကအားဖြင့်မူ မြို့တွင်းသို့ လွယ်ကူစွာ သွားလာနိုင်ခြင်း၊ လမ်းမတန်းဖြစ်ခြင်း စသည့် အချက်ပေါ် မူတည်ကာ ဈေးကစားလေ့ရှိကြကြောင်း Estate Myanmar အိမ်ခြံမြေ ၀န်ဆောင်မှုလုပ်ငန်းမှ ဦးဟိန်းမိုးမြင့်လွင်က ပြောကြားသည်။

 

ယင်းသို့ အိမ်ခြံမြေဈေးများ မြင့်တက်လာသည်မှာ လွန်ခဲ့သည့် တစ်နှစ်၊ နှစ်နှစ်ခန့်ကပင်ဖြစ်ပြီး အခြေခံ လူတန်းစားများ နေထိုင်သည့် ရပ်ကွက်များတွင်လည်း စပေါ်ငွေ ကြီးမြင့်ကာ အိမ်လခ ငါးသောင်းမှ ၁၂၀၀၀၀ အထိရှိကြောင်း။ တစ်နယ်တစ်ကျေးမှ လာရောက်လုပ်ကိုင်ကြသော အလုပ်သမား များမှာလည်း အဆောင်နေထိုင်ခများ ဈေးမြင့်မားနေကြောင်း သိရသည်။